Ураҙа – ҙур ҡыуаныс

Күңелемде нурландыра

Ураҙа тотоуҙарым.

Ауыҙ асҡанда кинәнес –

Тәмләп һыу йотоуҙарым.

Сәхәргә торған мәлдәрҙә

Иҫкә төшә баласаҡ.

Өләсәйемдең йөҙөнә

Шатланып ҡараған саҡ.

“Өләсәй асыҡмайһыңмы

Көн буйы ашамағас?” –

Шулай һорай торған инем,

Бер ни ҙә аңламағас.

Ул яй ғына әйтә ине:

“Һәр ризыҡ – оло ниғмәт.

Асыҡҡанда, балаҡайым,

Ҡатҡан икмәк тә ҡиммәт.

Ауыҙ асҡанда беленә,

Ҡыҙым, ризыҡ ҡәҙере,

Аслыҡтың һәм һыуһыҙлыҡтың

Ҙур ғазап икәнлеге”,

Олоғайғас мин аңланым:

Ураҙа – ул сабырлыҡ.

Асыу тотмау, ғәфү итеү –

Ошо икән батырлыҡ.

Ураҙа – ас тороу түгел,

Ураҙа – ул ғибәҙәт,

Ниәт әйтеп, ғәмәл ҡылыу –

Ҙур илаһи тәғлимәт.

Ураҙа тотоп теләйем:

Күңелдә иман булһын.

Хоҙайым, һинән һорайым:

Донъялар имен торһон!

Гөлирә Фәйрүзова, Архангел районы