Бирешмә!
Иңеңдәге йөгөң, елкә баҫып,
Күтәрмәҫлек булып тойолһа,
Барыр юлың, һикәлтәләр үтеп,
Ҡарурманға бер саҡ боролһа,
Ҡурҡма!
Тайғаныңда таянырға теләп,
Яҡыныңа ҡулың һуҙғанда,
Ул яҡының, ялҡыныңдан ҡурҡып,
Икеләнеп йөҙөн борғанда,
Тотма!
Офоҡтағы йәйғор, юйып төҫөн,
Әйләнгәндә һоро күпергә,
Ауыр уйҙар йомғаҡтарын бер саҡ
Кәрәк булһа яңғыҙ һүтергә,
Бирешмә!
Көсө етмәҫ, теҙен бөгөр, тиеп,
Көткәндәр бар, ситтән күҙәтеп.
Үҙ гонаһы ярҙан ашһа ашһын,
Ул маташа һине төҙәтеп.
Килешмә!
Үҙ һуҡмағың. Яҙмыш ҡушҡан икән –
Ғорур атла. Һаҡла йөҙөңдө.
Ҙур бәхеткә урау юлдар аша
Хоҙай йүнәлтә бит үҙеңде!
Ышан!
