Ни өсөн Мөхәммәд Пәйғәмбәрҙе ﷺ яратырға кәрәк?

14 августа Рәбиғел айы башлана. Уны Мәүлит айы тип тә йөрөтәләр, йәғни, Пәйғәмбәребеҙ Мөхәммәд ﷺ ошо айҙың 12-се көнөндә, дүшәмбелә, сәхәр ваҡытында донъяға килә. Күркәм ай алдынан һәр беребеҙҙең йөрәгендә йәшәгән оло мөхәббәт тураһында һөйләшеп алайыҡ.

Пәйғәмбәребеҙҙе ﷺ яратыуы-быҙҙың әһәмиәте бик ҙур. «Ғашиҡ кеше һөйгәне артынан эйәрә», – тип яҙған бер шағир. Аллаһтың Рәсүленә ﷺ эйәреп, уның тормошонан өлгө алған кеше – был донъ-яла иң бәхетлеһе, сөнки Аллаһу Сөбхәнәһү үә Тәғәлә бөтә ғаләмде Үҙенең Хәбибе – Пәйғәмбәре ﷺ өсөн яратҡан һәм һөйөклө ҡолон бөтәбеҙгә өлгө итеп ҡуйған.

Изге Ҡөрьәндә әйтелә (мәғәнәһе): «Хаҡтыр, Әхирәт көнөндә Аллаһ менән ҡауышыуға ышанғандар өсөн һәм Аллаһты күп зекер иткәндәр өсөн Пәйғәмбәрҙә ﷺ үрнәк сифаттар бар» («Әхзәб (Төркөмдәр)» сүрәһе, 21-се аят).

Аллаһ Илсеһен ﷺ яратыуҙың иң ҙур файҙаһы – Ҡиәмәт көнөндә Пәйғәмбәребеҙ ﷺ янында булыу, уның шәфәғәтенә ирешеп, Йәннәт баҡсаларында уның менән күрше булып йәшәү бәхетенә өлгәшә алабыҙ, ин шәә Аллаһ!

Бер ваҡыт Аллаһ Рәсүле ﷺ йома вәғәзен һөйләгәндә, бер бәҙәүи ҡапыл урынынан һикереп тора ла, Пәйғәмбәребеҙҙе ﷺ вәғәзенән бүлдереп: «Ҡиәмәт көнө ҡасан етә?» – тип һорай. Аллаһ Илсеһе ﷺ был иргә ултырырға ҡуша. Вәғәзен һөйләп бөткәс, Пәйғәмбәр ﷺ: «Миңә һорау биргән кеше ҡайҙа әле?» – тип өндәшә. Бәҙәүи урынынан тора ла: «Мин ул, мин бында, эй Аллаһ Рәсүле ﷺ», – ти. Мөхәммәд ﷺ был кешенән: «Хисап көнөнә нимәләр әҙерләнең?» – тип һорай. Тегеһе шулай тип яуап бирә: «Эй Аллаһ Илсеһе ﷺ! Ҡиәмәт көнөнә ҡарата махсус әҙерлегем юҡ, намаҙым, тотҡан ураҙаларым, яҡшы ғәмәлдәрем менән дә маҡтана алмайым, әммә мин Аллаһты ﷻ һәм Уның Рәсүлен ﷺ яратам». Пәйғәмбәребеҙ ﷺ был иргә: «Ҡиәмәт көнөндә яратҡаның менән бергә булырһың», – тип әйтеп ҡуя.

Шул ваҡиғаға шаһит булған сәхәбә Әнәс былай тигән: «Ислам килгәндән һуң, беҙҙә ошо көн кеүек шатлыҡлы көн булманы. Сөнки беребеҙҙә лә Пәйғәмбәребеҙҙеке ﷺ кеүек, Әбү Бәкер һәм Ғүмәрҙеке кеүек изге ғәмәлдәребеҙ юҡ. Әммә, уларға булған һөйөүебеҙ беҙҙе Яуап көнөндә бәхетле итәсәк, беҙ уларҙың янына баҫасаҡбыҙ, тип, бөтәбеҙ ҙә сикһеҙ шатландыҡ» (әл-Бохари, Мөслим).

Ҡыҫҡаһы, ике донъяла ла бәхетле булыуыбыҙ, Аллаһтың Яратыуы, Ризалығы, Уның Рәхмәтенә ирешеүебеҙ – быларҙың барыһы ла Пәйғәмбәребеҙгә ﷺ булған һөйөүебеҙгә бәйле. Пәйғәмбәребеҙҙе ﷺ ни тиклем нығыраҡ яратабыҙ, шул тиклем нығыраҡ һөйөүе менән солғап аласаҡ беҙҙе Аллаһу Сөбхәнәһү үә Тәғәлә.

«Мөхәббәт ән-Нәби» китабында былай тип яҙылған: «Аллаһу Тәғәләне ﷻ һәм Уның Рәсүлен ﷺ яратыу, хөрмәт итеү – йән ризығы, ул йөрәгебеҙҙе терелтә, имандың асылы булып тора. Һөйөү менән һуғарылмаһа, ғәмәлебеҙ йәнһеҙ бер һын-кәүҙә кеүек. Аллаһты ﷻ һәм Пәйғәмбәребеҙҙе ﷺ һөйгән кешеләрҙең дәрәжәһе ике донъяла ла юғары буласаҡ, улар бәхеткә ирешәсәк. Тап шундайҙар Әхирәттә Аллаһты күреү, Уның Пәйғәмбәре менән бергә булыуҙың иң ҙур өлөшөн аласаҡ» (116-сы бит).

Йә Раббым! Пәйғәмбәребеҙҙе һөйгән, уға итәғәт иткән, шәфәғәтенә лайыҡ мосолман булыуыбыҙҙы насип әйлә. Бар донъяға рәхмәт өсөн яратылған Пәйғәмбәребеҙ Мөхәммәд ﷺ менән терелт беҙҙе, Мәңгелектә Уны һәм яҡындарын күршебеҙ ит. Аллаһүммә әмин!