Тәүбә ҡылыу доғаһы

Аллаһ Рәсүле ﷺ: «Һәр әҙәм балаһы гонаһлы, әммә хата ҡылған кешенең иң хәйерлеһе – тәүбә иткәне», – тигән.

Тәүбә ҡылыу – ул гонаһтарыбыҙ өсөн Аллаһтан ғәфү итеүен һорау.

Пәйғәмбәребеҙ ﷺ күп төрлө тәүбә доғаларын уҡыған. Шуларҙың араһынан ошоһон тәҡдим итәбеҙ:

أسْتَغْفِرُ اللَّهَ الَّذي لا إِلهَ إِلاَّ هُوَ الحَيَّ القَيُّومَ وأتُوبُ إِليْهِ

«Әстәғфиру-Ллаһа-лләҙии ләә иләәһә иллә һүүәл-Хәййәл-Ҡәййүмә үә әтүүбү иләйһи».

Пәйғәмбәребеҙҙең ﷺ бер хәҙисендә: «Кем йоҡларға ятыр алдынан өс тапҡыр: «Әстәғфиру-Ллаһа-лләҙии ләә иләәһә иллә һүүәл-Хәййәл-Ҡәййүмә үә әтүүбү иләйһи» − тип әйтә, Аллаһ уның диңгеҙ күбектәре һанындағылай гонаһтарын, ағастағы күпме япраҡ бар, шунса гонаһтарын, йәки Ғәлидж тигән сүллектәге күпме ҡом бар, шунсама гонаһтарын, был донъя күпме дауам итәсәк, шунсама көндәргә тиң гонаһтарҙы ғәфү итер», − тигән. (имам Әхмәд, 11074, Тирмиҙи, 3397)

Тәүбә ҡылыуҙа шулай уҡ түбәндәге шарттарҙы үтәү мотлаҡ:

-        Тәүбә ҡылған кеше иң тәүҙә гонаһтары өсөн ысын күңелдән үкенергә тейеш.

-        Шунан, Аллаһтан ҡурҡып, был гонаһты эшләүҙән туҡтарға һәм башҡаса уны ҡылмаҫҡа кәрәк.

Ләйсән Бәхтиева әҙерләне