Шөбһәгә урын юҡ
Шөбһәгә урын юҡ
Бөгөнгө көнгә ҡәҙәр Исламдың хаҡ дин икәнлегенә, Аллаһтың берлегенә һәм Мөхәммәд ғәләйһис-сәләмдең Аллаһ илсеһе булыуына шөбһә белдереүселәр күптер. Әммә Аллаһ ﷻ уларҙың шөбһәләренән пактыр. Ул Үҙенең берлеген үҙ ҡөҙрәте менән донъялағы һәр бер бөртөктә, ғилемдең һәр бер тармағында иҫбатлап тора.
Анкара университетының фән көллийәте студенты Йософ Керкуклу үҙенең бер иҫбатын былай аңлатты: «Жәнәби Хаҡтың берлеген иҫбатлаусы «Ихлас» сүрәһендә бер тәжрибә үткәрҙем. Әүәл сүрәләге хәрефтәр һанын асыҡланым. Төрлө 13 хәреф ҡатнашҡан был сүрә 47 хәрефтән ғибәрәт ине. Был 13 хәрефте сүрәләге тәртибенә күрә линейканың вертикаль һыҙығы буйлап теҙеп сыҡтым. Һуңғараҡ, был хәрефтәрҙең сүрәлә нисә тапҡыр ҡабатланыуын иҫәпләп, был һандарҙы Ҡөрьән-Кәримдең уҡылышы буйынса тәртип менән горизонталь буйынса теҙҙем. Һандарҙы һәм хәрефтәрҙе үҙ-ара киҫештергәс, бер нисә нөктә хасил булды. Был нөктәләрҙе берләштереп, ғәжәпкә ҡалдым, сөнки линейкала «Ихлас» сүрәһе иғлан иткән Илаһи Берлектең исеме асыҡ пәйҙә булған ине!
«Әйтегеҙ: Ул – Аллаһ берҙер» («Ихлас» сүрәһе, 1-се аят).
XIV быуат түгел, XIV мең быуат үтһә лә, хәҡиҡәт хәҡиҡәт булып ҡалыр. Үҙенең барлығын иҫбатлап тороусы Аллаһты инҡар итеп, кешеләрҙе хаҡ юлдан яҙҙырыусы ҡайһы бер кешеләр өсөн ғилми, тәбиғи дәлилдәр һанһыҙ.
Иң мөһиме, кешелә үҙен танырға теләк булһын. Шул саҡ уны һис ҡасан иман ситләтеп үтмәҫ.
