Ил-йортҡа именлек теләү

Ил-йортҡа именлек теләү

Йәә Аллааһу, йәә Рахиим, именлек тә үҙеңдән,
Һиллеген дә насип ит йылға, күлдә, диңгеҙҙә,
Илдең аяҙ күгендә, ерҙең аҫты-өҫтөндә,
Ҡуйы урман, тауҙарҙа, йәнә иркен ҡырҙарҙа,
Йәйрәп ятҡан далала, бар ауылда, ҡалала.
Донъялар имен торһон, ил-йорттар тыныс булһын,
Йәшәгән еребеҙҙә ҡот-бәрәкәт һаҡланһын.
Берүк үҙең арала зарар-зыян, зәхмәттән,
Ут-һыуҙың афәтенән, ел-дауыл, ғәрәсәттән.
Йәә Аллааһу, йәә Рахиим, именлек тә бер һиндә.
Хызыр, Ильяс юлдаш булһын, сыҡҡан саҡта сәфәргә.
Хәүеф-хәтәрҙән арала барыһы юлда йөрөгәндә.
Йәә Аллааһу, йәә Сабуур, яҡшыларға олғаштыр,
Көс-ҡөҙрәт, ғәйрәт биреп, ямандарҙан яҙлыҡтыр.
Йәә Аллааһу, йәә Рахмәән, мәрхәмәтле, шәфҡәтле,
Миһырбанлы яҙмыш менән һәммәһен дә бүләклә:
Һөйөп-һөйөлөп кенә парлылар йәшәп ятһын,
Ишен көтөп зарыҡҡан яңғыҙҙар ишен тапһын,
Тулы ғаиләләр артһын, сабыйҙар күпләп тыуһын,
Ислам динен ҡеүәтләп, яңы быуын ҡалҡынһын,
Эшләгәндең уңын бир, эшһеҙеңде лә йүнлә,
Һөҙөмтәле кәсеп менән һәр икеһен бүләклә,
Хәсрәтленең хәсрәттәре, ҡайғылары таралһын,
Сирҙәре булһын үтеүсән, сырхауҙар − ваҡытлыса,
Хәйерле уй-ниәт менән оло быуын йәшәһен,
Үҙ йорттары нигеҙендә тигеҙ ғүмер кисерһен,
Көткән генә донъялары мәнфәғәтенә яҙһын,
Бөртөкләп йыйған донъяһы ят бауырға ҡалмаһын

ЗӨБӘЙҘӘ ҠӘЛӘМОВА

Учалы районы, Сораман ауылы