Һигеҙ ожмах ишектәрен үрелеп асһаҡ икән...

Мөнәжәт – ул көйләп кенә Аллаһҡа һығыныуым.
Хәйерле ғүмер ҙә теләп Үҙенә ялбарыуым.
Ер-күктәрҙең хужаһы – бер Аллаһу Тәғәлә,
Иманыбыҙҙан айырма, ләә иләәһә илләллаһ.
Барлығына инанып, берлегенә ышанһаң,
Терәк-таяныс табырһың, йәнә үҙең ҡымшанһаң.
Камил тәһәрәтләнеп, намаҙға эйеләйек,
Һигеҙ ожмах асҡысы – намаҙҙы үҙ итәйек.

Иман менән йәшәү фарыз, фани ғына донъяңда.
Әҙ ауырыу, еңел үлем бир, әжәл мәле еткәндә.
Аҙаҡҡы минуттарҙа әйтһәк икән; йәә Аллаһ,
Ләә иләәһи илаллаһ Мөхәммәдур-расулүллаһ.
Аллаһ ризалығы өсөн ҡылған ғәмәлдәребеҙ
эйәреп тә барыр инде, юлдаш булыр иманыбыҙ.
Сират күперен үткәндә, ҡултыҡлап та барыусы,
Мизан янында үлсәүсе, йәһәннәмдән һаҡлаусы.
Рухыбыҙға бағышлатҡан Ҡөръәндең сүрәләре,
Гүр ғазабынан аралар, Тәбәрәк сүрәләре.
Рәхмәт фәрештәләре ҡаршы ла алырҙар,
Мөнкир, Нөкир яуаптарҙан риза булып ҡалһындар.
Һигеҙ ожмах ишектәрен.үрелеп асһаҡ икән,
Ошо дуҫтар менән бергә йәннәттә ҡалһаҡ икән…
Аллаһ ризалығы өсөн, ҡылған ғәмәлдәребеҙ,
Ҡабул ғына булһын инде барлыҡ доғаларыбыҙ…
Ләә иләәһә илаллаһ, ләә иләәһи илаллаһ,
Кәүҫәр янында ҡаршылар, Мөхәммәдур-расулүллаһ

ЗӨБӘЙҘӘ ҠӘЛӘМОВА.

Учалы районы, Сораман ауылы