РикI пашманвиликай гьикI хуьда?

РикI пашманвиликай гьикI хуьда?

Чи уьмуьрда «иммунитет» гафуни мягькем чка кьунва. И гаф гьамиша духтуррин меслятрай ван къвезва, ам чаз витаминар авай кьватийрал аквазва ва мукьвабурухъ галаз кефидикай ийизвай ихтилатра веревирд ийизва.

Пандемиядилай кьулухъ беден хуьзвай къуватриз куьмек гун гзафбуруз аннамишнавай игьтияжвал хьана: маркетингрин ахтармишунрин малуматри лугьузвайвал, са паюнилай гзаф россиянвийри иммунитет мягькемарун патал витаминар кьабулзава.

Иммунитет – лап четин къенепатан манийвал, беден хуьнин гзаф дережайрин къурулуш я.

Руьгьдин иммунитет – къенепатан къуват, рикIин дурумлувал я, адаз «патогенар» чир жедай ва зарарсуз ийидай ихтияр гузвай: пис фикирар, харапIдай гьиссер ва темягьар. Бедендин иммунитет хьиз, ам кьуд дестекдал бинеламиш жезва, ам зайиф хьуни чун ажугъвилин, пехилвилин, мунафикьвилин ва лап умудсузвилин «тIегъуьнрин» вилик зайифарзава.

Режим ва «руьгьди гужлуз кар авун»: чарасуз тежрибаяр

ЖакIумрин къуват ва дурумлувал хуьн патал бедендиз гьамиша къайдадалди ийизвай юкьван гьалдин кIвалах герек я. Руьгьдиз – руьгь вердишаруниз ухшар авай чарасуз ибадатдин гьерекатар. Абур Исламдин дестекар я, абуру уьмуьрдин сагълам дигайвал-дуьзгуьнвал гуьнгуьна хутазва ва нефс вердишарзава.

• КапI – Халикьдихъ ﷻ галаз авай гьар йикъан алакъа «цIийи хъувун», нубатсуз ката-калтугуна ара гун я, ада рикI михьи ийизва, юзунри лимфа михьи ийизвайвал.
• Сив хуьн – им «михьи авун» я, неинки беден патал, гьакI руьгь патални, нефс хуьз, сабур ийиз ва кIандай крарал гуьзчивал ийиз вердишарун я.
• Закат – им мискьивилиз гузвай «иммунитетдин жаваб» я, рикIе жумартвал ва муьгьтежбурухъ рикI кун мягькемарзавай.

И «режим» кваз такьуни руьгьдин хуьнуьх зайифарзава, рикI бушарзава ва адак гунагьдин «азарар» ва нагьакьан ерияр акатдайди ийизва.

«Руьгьдин ял ягъун» ва рикIин «стресс» идара авун

Хъсан ери авай ахвари беден цIийи кьилелай кIвалахдик кухтазва, къуват хгузва. РикI патал ахьтин «тамам ял ягъун» - Аллагьдиз ﷻ зикир авун ва рикIин сидкьидай Адаз дуьа авун я. Ибур чун къеце патан ванерикай атIузвай ва рикI нурдай ацIурзвай вахтар я. Абуруз акси яз руьгьдин гьамишан «галат хьун» - им рикIелай фин, нубатсуз ката-калтугуник акатун я.

РикI патал стресс – им хъел атун, дуьньядин крарин патахъай къалабулух акатун, агакь тийирдахъ калтугун я. Ина стрессдиз къуват гузвайди чи хсуси нефс я, тадиз кьилиз акъудун истемишзавай. Идан дарман – Аллагьдик ﷻ кIеви умуд кутун ва сабур авун я, абуру кIеви гьевесрин харапIдай къизмишвал тIимиларзава ва руьгьдин секинвал хкизва.

Руьгь патал «нутриентар»: иманди вуч «незва»

Бедендиз витаминар ва минералар герек я. РикIиз – кьетIен «микроэлементар»:

• Чирвал – кьилин «эцигдай затI» я. Им диндин, дуьнья туькIуьр хьунин, инсан тайин авунин гъавурда хьун я, ада гьакъикъат табдивай, хийирлуди зарарлудавай чара ийиз куьмек гуда. Ам галачиз иммунитетдин къурулуш буьркьуь я, рецепторар авачир клетка хьиз.
• РикIин сидкьивал – гзаф гужлу «антиоксидант» я, гьар са кар къалурун патал тир ва кьуру такабурвилин муьрхъуькай михьиз куьмек гузвай, чи крарин «клеткаяр» вичиз-вич бегенмиш хьуни чIуруникай хуьзвай.
• Разивал – руьгь патал виридалайни хъсан «пробиотик» я. Ада рикI жуваз авайдал рази хьунин сагълам микрофлорадай ацIурзава ва пехилвилинни гьамиша вичин кьисметдал рази тахьунин зарарлу бактерияр акъудзава.
• Фикир авун – руьгьдиз «витамин D» я, аннамишунин «рагъ» ахварай авудзавай. Ада Аллагьдин ﷻ лишанрал нур къурзава, уьмуьрдин тарсар «къачун» таъмин ийиз ва авамвилинни къайгъусузвилин нетижа тир «тIуьр затIар иливарун» чIур хьунин ва «кIалуб дегиш хьунин» вилик пад атIуз.

И «нутриентар» кьит хьун – чIехи пай «рикIин азаррин» асул себеб я.

Руьгьдин «зарарлу хесетар» кьабул тавун

ПIапIрус чIугуни ва ички хъуни беден харапIзава. Руьгь патал ахьтин кьиникь гъидай хесетар ихьтинбур я:

• Масадакай пис рахун, ада инсанрин араяр чIурзава ва ихтирбарвал терг ийизва.
• МутIлакьвал, ада руьгь девлет хуьнин тапан гьиссдалди пиянарзава, гьа са вахтунда адаз «муьрхъ язава», садазни хийир тагуз.
• Такабурвал – вич чIехиз кьуна кIан хьунин ва гзаф лавгъавилин бейгьуш я, гьакъикъат чIурувилихъди дегишарзавай ва инсан мукьва инсанривайни Аллагьдин ﷻ регьимдивай яргъа ийизвай.

Абур кьабул тавун – им магьрумвал туш, ам зурба кьезилвал ва уьмуьрдин рехъ экв патал азад авун я.

РикIин азарар ва абур сагъар хъувун

Руьгьдин иммунитет зайиф хьайила, рикIиз регьятдиз «вирусар» фида. Ингье абурукай бязибур, Къуръандайни Суннадай «сагъар хъувунин схема» галаз:

1. Пехилвал – «вирусрин инфекция» я: ам себеб яз, масадаз ганвай няметри пехилвал ийизвайдаз тIарвал ва азиятар гузва. И дуьшуьшда вирусриз акси тир затI – вуна пехилвал ийизвай инсандиз хийир-дуьа авун я, «иммунностимулятор» лагьайтIа, ризкьи Аллагьди ﷻ кьисметнавайдакай фикирун ва жуваз авайдай шукур авун.
2. Масадан бахтсузвилел шадвал авун. Язух чIугунин ва регьимлувилин дарманар авун герек я. Чун вири Са Халикьдин ﷻ махлукьатар тирди рикIел хкун ва стхадиз регьят хьана кIан хьун важиблу я, гьатта ам гьахъ туштIани.
3. Пашманвал, умуд атIун – им Аллагьдин ﷻ регьим вал агакь тийидайди хьиз жедай гьал я. Лап гужлу «антидепрессант» - гьихьтин гьалара хьайитIани Аллагьдик ﷻ умуд кутун. Пайгъамбарди ﷺ чирнай хьи, гьатта виридалайни чара авачир гьаларани Аллагьдикай ﷻ умуд атIана виже къведач, вучиз лагьайтIа Аллагьдин ﷻ регьимдикай умуд атIун – чIехи гунагьрикай я.

Малика Воронина