Ислен йикъалай башламишда
Квез мукьвал-мукьвал ихьтин фикир къвезвани: «КIвалахар куьтягьда ва фадлай рикIик квай кар гъиле кьада»? Дустарихъ галаз гуьруьшар, машгъулатар, сиягьатар ва гьатта гьакIан шадвилерни кваз «хъсан вахтарал» вегьезвани? Эгер гьакI ятIа, куьн тек туш.
Алай девирдин алемда гзаф инсанар ахьтин гьисс аваз яшамиш жезва хьи, гуя халис уьмуьр гьеле алукьнавач. Ам са гьина ятIани масана ава, вилик кума – вахт, пул, гуьгьуьл хьайила ва я кIвалахар куьтягь хьайила, ахпа гатIумда. Амма гьа «ахпа» гзаф вахтара гьич алукьзавач.
Психологри къейд ийизва хьи, эхиримжи йисара а судур гзафбуруз хьанва. Чун «лап хъсан вахтунал» вил алаз яшамиш жезва, амма ам сакIани алукьзавач. Ина «агалкьунар хьанвай инсанрин» шикилар къалурзавай соцсетрин тахсирни ава, «гатIумун патал чун бес кьадар хъсанзавач» лугьузвай чи фикирарни.
Вучиз акI жезва? Себебар гзаф ава. Чун яшамиш жезвай девир – гьамиша са кардал машгъул хьуниз ва агалкьунриз къимет гузвай вахт я. Чун акI вердишарнава хьи, сифте «везифаяр тамамарна» кIанда, ахпа – «лезет къачуна». Соцсетри а гьисс гужлу ийизва: чаз аквазва, гьикI масабур сиягьатриз физватIа, проектар кьилиз акъудзаватIа, уьмуьр дегишарзаватIа, - ва чаз акI жезва хьи, гуя чун гуьгъуьна ама. Къалабулух арадал къвезва: «зун гьеле гьазур туш», «сифте гзаф крар хъувун лазим я». Гьа икI уьмуьр ахпадал вегьедай хесет арадал къвезва.
Перфекционизмдини вичин пай кутазва. Чна лап хъсан шартIар гуьзетзава: ашкъи къведайвал, план туькIуьрдайвал, гьалар сад-садан гуьгъуьналлаз дуьз жедайвал. Амма уьмуьр сад хьтин дуьзди туш. ШартIар лап тIимил вахтара лап хъсанбур жезва – абур жува арадал гъун лазим я.
Жуваз алай вахт гьикI хкида? ТIимилдалай башламиша. Ислен йикъал ва я цIийи йисал вил алаз акъвазмир. Гьа къе 15 декьикьа шадвал гъидай кардиз чара ая: ктабдин са кьил кIела, паркдиз сейрдиз алад, мукьва инсандиз кхьихь.
Жув масабурухъ галаз гекъигун акъвазара. Соцсетра авай чарадан уьмуьр – ам анжах вилин ишигъ тухузвай кIусар я, тамам шикил туш. Куь рехъ надир я – ам гьамиша кьулухъ вегьин герек туш.
Жуваз лап хъсанди тежедай ихтияр це. Гьатта инанмишвал авачтIани, кар башламишайтIа жеда. Фидай чкаяр лап хъсандиз фагьумнавачтIани, сиягьат авуртIа жеда. Уьмуьр ахтармишунрикай ва гъалатIрикай ибарат я.
РикIел хуьх: вахт – им тек са шей я ахцIун тийизвай. Кутугай вахтунал вил алаз акъвазмир. Ам алукьнава. Гьа исятда – куьне йисаралди кьулухъ язавай уьмуьр патал – сад лагьай кам къачудай югъ я. Са регьят кардилай башламиша. Квез фадлай ийиз кIанзавай кар къе ая. Куь уьмуьр гила ина ава – планра авач, кардик ква.
