Мусурманар гьуьжетрал гъайи ктаб

Мусурманар гьуьжетрал гъайи ктаб

Махачкъалада авай Дагъустандин Исламдин университетда Каранайдай тир Абдулжалил эфендиди чапдай акъуднавай ктабдиз къимет гун патал тешкилнавай илимдин межлис кьиле фена.

А ктабда Мугьаммад Пайгъамбардин ﷺ мавлид чIун галаз кlелун пис амал яз гьисабзава, гьатта мавлид кlелзавайбур, ам тешкилнавайбур ва ана иштиракзавайбур вири Ислам диндай акъатзава лугьузва. Ктаб кlелай жергедин мусурман и къайда гъавурда акьазва.

Межлисда иштиракзавай са касди икl лагьана: «Заз а ктабдин автор, тlарикъатдин чlалар ишлемишуналди мавлид къадагъа ийиз кlанзавай вагьабит хьиз хьанай».

Дагъустандин Муфтиятди разивал ганачтlани, ктаб 2013-йисан гатфариз чапдай акъатна. Гьатта Дагъустандин Муфтий, шейх Агьмад эфендиди ам акъуд тавун меслят къалурнай, амма авторди вичиз чидайвал авуна. Нетижада а ктаб себеб яз мусурманрин арада пис гьуьжетар хьана.

Ктаб чапдай акъатайдалай кьулухъ Каранайдай тир Абдулжалил эфендиди адаз видео-баянарни гуз хьана. Ада вичин рахунра мавлидар чlун галаз кlелзавайбуруз ачухдиз туьгьметар ийизвай.

Авайвал лагьайтlа, Абдулжалил эфендидин туьгьметар сифтени-сифте адан вичин шейх Саид эфендида акьазва. На лугьуди ада (Саид эфендиди) Накъшубанди тlарикъатдин пак бинеяр дегишарна ва мавлидар тешкилиз гатlумна. Гьа са вахтунда Абдулжалил эфендиди икl лугьузва: «Саид эфендиди вичин девирда мавлидрин куьмекдалди инсанар Ислам диндал ялна, гьавиляй адаз уьзуьр (себеб) авай».

Конференциядал рахай Шариатдин илимрин духтур Къагьибдай тир Мегьамедов Мугьаммада а туьгьметриз жаваб гана: «Саид эфендиди Накъшубанди тlарикъатдиз акси тир гьич са кlвалахни авунач, ада мавлид кlелун вичин муьруьдриз вирд хьизни гьич садрани гайиди туш».

Гуьгъуьнлай рахай Исламдин илимрин духтур Рамазанов Мугьаммадарифа икl лагьана: «Ктабда «чlун галаз кlелун», «мавлид», «нашид», «музыка» акадарнава. Гьавиляй ам кlелай жергедин мусурманрин арада гъавурда такьунар гзаф жезва, гьатта абурун рикlериз чlуру, хаталу хиялар къвезва».

Гьакlни инал Исламдин илимрин духтур Аргъванидай тир Мугьаммадов Мугьаммад рахана. «Ктабда тlарикъатдин шейхерин гафар гъанва, амма тамамдиз ваъ. Гьавиляй абурун гъавурда чlурукlа акьазва. Мад и ктабда садбур масабурухъ галаз кьан тийидай, чеб чпиз акси ихтилатарни гзаф ава», - къейдна ада.

Къуй и межлис мусурманар патал менфятлуди хьурай!