Дуьнья ислягь хьурай!
Арабрин чил
Арабар гьаниз акъатдалди,
Къумлух, кьуру чуьллер тир.
Са стlал яд жагъидалди,
Чан акъатай вахтар тир.
Чабалмишиз, чlугваз зегьмет,
Арадиз гъана шегьерар.
Гуьрчегвилиз авач къимет,
Акурла вилиз меркезар.
Йифиз-юкъуз алимри
Гьуьжетдивди ийиз икьрар,
Къуръан кlелиз имамри,
Муьгьтеж тунач чпин халкьар.
Мягьтел я чара гьукуматар,
Пехилвиляй квахьна ахвар,
Чlурда лугьуз дараматар,
Башламишна гьужумар.
Куш-куш ягъиз пачагьри,
Чпи-чпиз гуз суалар,
Гьикl кьунва жал къумари,
Акьван зурба ятахар.
Хаинвили чlулаварна,
Пачагьрин пехил рикlер,
Дугъри халкьар алцурарна,
Кутуна чпин хци кlирер.
Ислягьвилин «Ислам уьлкве»,
Вуч ава жал а ви чиле?
Темягьар жез гьакьван еке,
Гьукуматар туна кlеве.
Цаварай къвез кудай къапар,
Аялрални ийиз къабар,
Шумудра хьурай чаз и хабар?!
Кукlварнава лугьуз арабар?!
Вуч кlанзава квез а чиляй,
Къумари кьур кьуру чуьлдай?
Экъечl лугьуз вичин кlваляй,
Кичlе туш жал Аллагьдихъай?!
Сусанна Мамедова,
Дагъустандин Огни
Советский хуьр
Иер кьакьан кӏвалер ава,
Мублагь бул чуьллер ава.
Бегьер гудай багълар ава,
Чан азиз, Советский хуьр.
Хатур-гьуьрмет аваз хьурай,
Мел-мехъерар аваз хьурай.
Шад ванерни аваз хьурай,
Чан азиз, Советский хуьр.
Гуьрчег, иер рушар ава,
Кьегьал игит хваяр ава.
Лайихлу вахъ ксар ава,
Чан азиз, Советский хуьр.
Советскийдин агьалияр,
Кьабула зи шиир.
Жуван рикӏяй атай чӏалар,
Кьабула гьуьрметдивди.
Хайи ватан
РикӀ гъурбатда аватӀани,
Хайи ватан рикӀелай фидач.
РикӀ ватандихъ кузватӀани,
Ери-бине рикӀелай фидач.
Хайи дагълар, хайи макан,
Лезги чилер рикӀелай фидач.
Диде-ватан, бубайрин хуьр,
Ери-бине рикӀелай фидач.
Дидед чрай хьран чими фу,
Са чӀавузни рикӀелай фидач.
Дидед авур хуьрек дадлу,
Гьич садрани рикӀелай фидач.
Дидед лайлай, дидед мани,
Гьич рикӀелай алатдач.
Дидедин чӀал, дидед зегьмет,
Гьич рикӀелай алатдач.
Акьуллу свас
Чи мурад я акьуллу са свас гьалтун,
Чи мурад я лайихлу веледар хьун.
Чи мурад я вафалу яз хизан хьун.
Ин ша Аллагь, гуда гьардаз Аллагьди.
Чи мурад я диндал мягькем хизан хьун,
Чи мурад я гьар са инсан бахтлу хьун.
Чи мурад я гьар мусурман Меккада хьун,
Ин ша Аллагь, гьардаз гуда Аллагьди.
Чи мурад я дин-имандал кӏеви хьун,
Чи мурад я дин-Ислам дуьз тухун.
Чи мурад я гьар са хуьре мискӏин хьун,
Ин ша Аллагь, Аллагьди рехъ ачухрай.
