Я Аллагь, Вуна заз ихьтин аялар вучиз гана?
Гьуьрметлу стхаяр ва вахар! Аллагь Таалади чаз и дуьньяда яшамиш жедай къайда - Шариат къалурнава. ГьикI гьар са гъвечIи ва я чIехи алатдин конструкторди «эксплуатациядин къайдаяр» кхьизватIа, гьакI и Шариатни Халикьди Вичин махлукьатрикай виридалайни ажайиб, къимет авай - инсан патал эцигнавай къанун я.
Эгер инсанди вири крар Шариатдал асаслу хьана ийиз хьайитIа, неинки адан вичин, гьакI адан уьмуьрдин юлдашдин ва аялрин беденарни руьгьер сагъ жеда. Гьатта мукьва-кьилийризни кваз адан хъсан насигьатрикай пай жеда.
Гила чун Шариатди инсанривай вуч истемишзаватIа килигин. Агакьнавай жаван гадади гьа сифтедлай, вичиз гележег уьмуьрдин юлдаш - паб хкядайла ам диндарди хкяйна кIанда. ГьикI хьи, диндихъ галаз девлетни гуьзелвал санал жезва. Ахпа вири шартIар кьиле хвена, диндин чирвилер авай касди некягь авуна кIанда. Идалай кьулухъ гьалал тир, яни музыка, ички ва маса гьарамнавай шейэр квачиз мехъер ийида. Ахпа аял хайила адан эрчIи япал азан ва чапла япал икъамат кIелна са хъсан, мусурман тIвар гуда. Гьатта аял авай кьеб эчIядайлани Аллагьдин ﷻ зикир кIелда. Диде-бубади адаз гьамиша тек са хъсан чешне къалурда ва адан ирид йис хьайила диндин гъавурда тваз башламишда. Сифтени-сифте Мугьаммад Пайгъамбардин ﷺ уьмуьр чирда, ахпа капI ийиз ва диндин маса гьерекатар. Агакьайди эвленмишна кIанда.
Алай вахтунда чаз аквазвай шикил гьихьтинди я!? Диде-бубайри Аллагьдихъ ﷻ элкъвена лугьузва: «Я Аллагь, вуна чаз ихьтин кьадар вучиз авуна? Вучиз Вуна чаз чи чIалаз килиг тийидай аялар багъишна!?» Инсанри фикирзава хьи, чак гьич са тахсирни квач ам Аллагьди ﷻ я чаз ихьтин кьадар кхьенвайди. Бес Аллагь Таалади абуруз и дуьньяда авай са гъвечIи уьмуьр кечирмишдай къайда чирначни? Эхь, ам чирун патал Ада вири ктабар, пайгъамбарар ракъурна. Анжах инсанри Шариатдикай чпиз менфят хкудзавач, гьа им я виридалайни чIехи бала!
Винидихъ чна хьана кIанзавай къайда кхьенвай, гила чна алай вахтунда вуч жезватIа кхьин. Гьа сифтедлай, агакьнавай жаванди вичиз свас диндиз килигна ваъ, адан иервилиз, девлетдиз килигна хкязава. Ахпа некягь эцигдалди рушни гада, итимни паб хьиз, сад-садахъ галаз гуьруьшар жезва. Некягь ийидайла гзафбуру адан шартIар кьиле хуьзвач. Чизвай, кIелнавай касдин кьилив фена некягь ая лагьайла, инсанри лугьузва: «Ада чаз жуьреба-жуьре суалар гузва, са гагьда насигьатар ийизва, са кьадар шартIар истемишзава!» Абуруз некягь гьакIан са къугъун хьиз ава, гьавиляй абур адаз са бегьеман фикир тагана, акатайдан кьилив физва. Идалай кьулухъ вуч жезва? Мехъер - гъана музыкантар, къачуна чехир, эрекь, кьиляй кьилди гьарам межлис кьиле тухузва. Жегьилриз садаз-сад кьисмет хьана лагьана, Аллагьдиз ﷻ шукур гъидай чкадал, инсанар генани аси жезва. ИкI хьайила чамранни сусан гележегдин рехъ берекатсуз жезва. Ахпа абуруз Аллагьди ﷻ са аял багъишзава, аял хьана лугьуз абуру мад гьарам межлис кьиле тухузва. Гьа и савкьват – аял чIехи жердавай адаз кIвале аквазвайдини диде-бубадин чIуру чешне я. КапI тийизвай, сивер хуьн тийизвай, сад-садахъ галаз кикIизвай дидени-буба аквазва. Диндин тербиядикай магьрум яз чIехи хьанвай, гьа ихьтин диде-бубадилай чешне къачур аял, гьелбетда, чIехидан чIалаз килиг тийидайди жезва. Са бязи вахтара ихьтин аялри чпин диде-бубайриз куьн кафирар я лугьузва, гьатта абурал гъилни хкажзава. Ингье, гила чаз чир хьана Аллагьдин ﷻ къанундай яшамиш тахьунин нетижа вуч ятIа.
Къуй Аллагь Таалади гьар са мусурмандиз вичин уьмуьр Шариатдихъ галаз кьадай къайда тухудайвал куьмек гурай! Амин.
