Мавлиддин чlалар
Мавлиддин чlалар
МАВЛИДДИН ВАРЗ АТАНА МАД
Атана мад, атана мад,
Мавлиддин варз атана мад!
Дуьньядиз нур къалана мад:
Мавлиддин варз атана мад!
Атана Рабиул-Аввал,
А мубарак нури жамал.
Къарагъ, эллер, вири кIвачел,
Мавлиддин варз атана мад!
Юлдаш хьана Абубакар,
Умар, Усман, Али-Гьайдар.
Шадвал ая куьне, эллер,
Мавлиддин варз атана мад!
Асмауллагь зикир авур,
Шариатдиз фикир авур,
Душманарин эхир авур,
Мавлиддин варз атана мад!
ЦIийи дин баян авуна,
Сувабар залан авуна,
Худадиз чун кIан авуна,
Мавлиддин варз атана мад!
Гваз атана чаз гуьзел дин,
СултIан хьана кьве дуьньядин,
Мекка, Равза Мединадин,
Мавлиддин варз атана мад!
Мужизатар загьир авур,
Дуьнья, эхират чир авур,
Гьар са кардиз фикир авур,
Мавлиддин варз атана мад!
Худадин нурдикай гайи,
Амина дидедиз хьайи,
Зайиф умматдихъ рикI кайи,
Мавлиддин варз атана мад!
Чилер - цавар, Шамси-Къамар,
Сада садаз гана хабар,
Мугьаммадан мубарак тIвар,
Мавлиддин варз атана мад!
Рабби, Худа ваз хьуй шукур,
Чун адан уммат халкь авур,
Зулуматдай рагъ хьиз акур,
Мавлиддин варз атана мад!
Субгьаналлагь, я Зулжалал,
Игьсан ая чаз СиратIдал,
Чи Пайгъамбар рази жервал,
Мавлиддин варз атана мад!
Авур ксар мавлид, игьсан,
Женнет жеда чпиз макан,
Фирдавусда гьуьри-илман,
Мавлиддин варз атана мад!
Ша фин чун макьсад авуна,
И межлис иршад авуна,
Худадиз имдад авуна,
Мавлиддин варз атана мад!
Суннат яхъ куьне аманат,
Аллагьди квез гуй гьидаят,
Ашкъидалди гъваш салават,
Мавлиддин варз атана мад!
Зулжалалди гана салам,
Багъишна а гуьзел Калам,
Мелек, инсан, жуьмле алем,
Мавлиддин варз атана мад!
Даим гъиле кьуна къелем,
Гуьзел дин авуна мягькем,
Араб, турки, фарси ажам,
Мавлиддин варз атана мад!
ТIарикъат баб машгьур авур,
Муьжуьд Женнет нурлу авур,
Тамам чилер-цавар акур,
Мавлиддин варз атана мад!
Цаварал тIвар я ви Агьмад,
Чилерал тIвар я Мугьаммад,
Шафаат магьшерда Магьмуд,
Мавлиддин варз атана мад!
ШейтIандиз авуна лянет,
Тамам ая вад ферз, суннат,
Аллагьди квез гуда нуьсрет,
Мавлиддин варз атана мад!
Ярали, на Мавлид ая,
Ви гунагьар алуд ая,
Женнет макан умуд ая,
Мавлиддин варз атана мад!
Аллагь, Аллагь ферйад Аллагь,
Аллагь, Аллагь имдад Аллагь,
Аллагь, Аллагь, я Сад Аллагь,
Мавлиддин варз атана мад!
МАВЛИДДИЗ ША ДАТIАНА
Мавлиддиз ша датIана,
РикI ашкъидив ацIана,
Суваб гунагь кьатIана.
Вирида са сивяй лагь:
Ла илагьа иллаллагь.
Ша агатна ацукь куьн.
Садни жемир кьве рикIин.
Герек туш маса луькIуьн.
Вирида са сивяй лагь:
Ла илагьа иллаллагь.
Пайгъамбардин и мажлис
Шад мярекат я халис.
Акъваз мийир хьана кис,
Вирида са сивяй лагь:
Ла илагьа иллаллагь.
КIанзаватIа сувабар,
РикIел гъана Пайгъамбар,
Аллагьдиз ийиз ялвар,
Вирида са сивяй лагь:
Ла илагьа иллаллагь.
Виридаз гьатдач и бахт -
Им язва лап хъсан вахт.
Женнетра жеривал тахт,
Вирида са сивяй лагь:
Ла илагьа иллаллагь.
Зикир авун хъсан я,
Расуллюллагь масан я,
Пайгъамбардин игьсан я.
Вирида са сивяй лагь:
Ла илагьа иллаллагь.
Мавлидрихъ вил галаз хьуй,
Мецел зикир алаз хьуй,
Жегьнемрикай яргъаз хьуй.
Вирида са сивяй лагь:
Ла илагьа иллаллагь.
Гаф кIан жемир туьгьметдай.
Пайгъамбардин гьуьрметдай
Чка це чаз Женнетдай.
Вирида са сивяй лагь:
Ла илагьа иллаллагь.
Мад техжедайвал гунагь,
Ийин астагъфируллагь
Кьабула, я Аллагь.
Вирида са сивяй лагь:
Ла илагьа иллаллагь.
Девлетриз мийир умуд:
Туна фена са шумуд
Сад Аллагьдик кваз умуд,
Вирида са сивяй лагь:
Ла илагьа иллаллагь.
Дуьнья карвансара я,
Ада кайибур пара я.
Эхиратдиз чара ая.
Вирида са сивяй лагь:
Ла илагьа иллаллагь.
Гъибетрикай къерех хьухь,
Йифиз, юкъуз уях хьухь,
Ша чахъ галаз уртах хьухь,
Вирида са сивяй лагь:
Ла илагьа иллаллагь.
Пайгъамбар – гьахъ, Аллагь - Сад
Лугьуз чира минет, дад.
Адалай хъсан гаф жеч мад.
Вирида са сивяй лагь:
Ла илагьа иллаллагь.
Чи Пайгъамбар рикIева,з
Дин Исламдин рекьеваз,
Акьул камал кьилеваз,
Вирида са сивяй лагь:
Ла илагьа иллаллагь.
Алахъ хъсан кар патал,
Исламдин шартIар патал.
Хатам-Пайгъамбар патал,
Вирида са сивяй лагь:
Ла илагьа иллаллагь.
Я Мугьаммад МустIафа,
Чун патал чIугур жафа,
Ви тIварцIе экв, нур ава.
Вирида са сивяй лагь:
Ла илагьа иллаллагь.
Гъазаватра хьайибур,
Дин патал чан гайибур,
Мавлидрихъ рикI кайибур,
Вирида са сивяй лагь:
Ла илагьа иллаллагь.
Зи гафар квез аманат:
Хуьх гьахъ-дуван, адалат,
Пайгъамбардал Салават
Вирида са сивяй лагь:
Ла илагьа иллаллагь.
Гьажи, авуна фикир,
ЦIийи чIал ая туькIуьр.
Яваш тахьурай зикир,
Лугьудайвал ма ша Аллагь,
Ла илагьа иллаллагь.
ЖЕННЕТДИН ТАРИФ
Женнетда булахар ргаз,
Ава Аллагь лугьуз, лугьуз,
Исламдин билбилрин аваз
Къвезва Аллагь лугьуз, лугьуз.
Вацралай нурлу яз чинар,
Шекердилай ширин чIалар,
Десте-десте малаикар
Къвезва Аллагь лугьуз, лугьуз.
Беденарни тежез зайиф
Къуръан эзбер ийиз югъ-йиф,
Ахъай жезвай цуьквер зериф,
Ава Аллагь лугьуз, лугьуз.
Садбуру нез, садбуру хъваз,
Малаикар рагьмет рахаз
Идрис набид халат храз,
Субгьаналлагь лугьуз, лугьуз
Юнус ашукь я Аллагьдал,
Вил алаз даим Панагьдал,
Рази яз ви гьар са йикъал,
Ава Аллагь лугьуз, лугьуз.
И дуьнья гьакI хьанва туькIуьр,
Мийир куьне маса фикир.
Ша, чнани ийин зикир:
Гьахъ я Аллагь лугьуз, лугьуз.
ТАВГЬИД ЗИКИР
Элдин юкьва хьана шагь,
Гуьгьуьлар жеда гумрагь,
РикIяй акъудмир Аллагь:
Ла илагьа иллаллагь.
Виридаз чир хьухь, гьелбет,
Им я лап чIехи девлет,
Муьжуьд Женнетдин къимет:
Ла илагьа иллаллагь.
Расулюллагьдин Къуръан
КIела жезмай кьван.
Вири дердерин дарман:
Ла илагьа иллаллагь.
Къакъудун патал иман,
Чи геле ава шейтIан.
Адаз гун тийиз майдан:
Ла илагьа иллаллагь.
Женнетда чаз мензил хьуй,
Сурун суал кьезил хьуй,
ШейтIан-иблис сефил хьуй:
Ла илагьа иллаллагь.
Гьатна нефсинин хура,
Девлет кIан жемир пара.
Жегьеннемрикай чара:
Ла илагьа иллаллагь.
Чунни вири рекьида,
Девлетарни чкIида,
Зикир ая вирида;
Ла илагьа иллаллагь.
Чун мусурман миллет я,
Мугьаммадан уммат я,
Чир хьун еке девлет я:
Ла илагьа иллаллагь.
Пис крарив агатмир,
Дуьз рекьелай алатмир,
Зикир ая, галатмир:
Ла илагьа иллаллагь.
Вад капI ая гьар юкъуз,
Ислам дин кьамир ужуз.
Герекди магьшардин (ю)къуз:
Ла илагьа иллаллагь.
Шак авач, Аллагь тек я.
Къиямат гьахъ-керчек я.
СиратI муькъвел герек я:
Ла илагьа иллаллагь.
Къемаз авуртIа чара,
Жедач чун уьзуькъара.
Юлдаш я мичIи сура:
Ла илагьа иллаллагь.
Гегьенш дуьнья дар тахьуй,
Хажалатдин пар тахьуй,
Саданни рикI тIар тахьуй:
Ла илагьа иллаллагь.
Жегьеннемрин цIувай хуьз,
Тухудайвал Женнетдиз,
Эзбера юкъуз-йифиз:
Ла илагьа иллаллагь.
Эзбер авуртIа Ихлас,
РикIелай алатда пас.
Яваш тежез гьар са кас:
Ла илагьа иллаллагь.
Такуна Жегьеннемрин цIай,
Женнетрикай къачу пай.
Малаикриз жеда тай:
Ла илагьа иллаллагь.
Зикир авуртIа йикъа,
Жеда муъминрин юкьва.
Фирдавусда яхъ чка:
Ла илагьа иллаллагь.
Гъиз Келима-Шагьадат,
Мягькем ая ибадат.
Кьабула зи насигьат:
Ла илагьа иллаллагь.
МАВЛИД МУБАРАК
Расуллюллагь гъана рикIел,
КIватIна Пайгъамбардин тIварцIел,
Зикир алаз халкьдин мецел,
Квез и мавлид мубарак хьуй!
Квачир вичик гьич са нукьсан,
Чаз и рехъ эцигай хъсан,
Пайгъамбардин руьгьдин игьсан,
Квез и мавлид мубарак хьуй!
Квез сувабар артух хьуй бул,
Берекатлу хьурай куь къул,
Аллагьди авурай кьабул,
Квез и мавлид мубарак хьуй!
Къени хьуй чи хуьрер, кIвалер.
Квез даим хьуй мелни мехъер.
Межлис эгьли сивеллаз хъвер:
Квез и мавлид мубарак хьуй!
Гьалал девлет артух хьуй мад,
Пайгъамбардин руьгь жеда шад.
Кьиле фий куь рикIин мурад.
Квез и мавлид мубарак хьуй!
КIватI хьайила ихьтин межлис,
РикIяй (а)къатда ниятар пис,
Яргъаз жеда шейтIан-иблис.
Квез и мавлид мубарак хьуй!
Мавлид гайи жегьил, кьуьзуь,
Аллагь квелай хьурай рази.
РикIин гафар кьабула зи.
Квез и мавлид мубарак хьуй!
Чи Пайгъамбар хайи юкъуз,
Чилер, цавар къвазна нур гуз,
Малаикри муштулух гуз.
Квез и мавлид мубарак хьуй!
Чи Амина дидеди хъвай,
Дадмиш ая, шуьрбетдикай.
Пай гурай квез Женнетрикай.
Квез и мавлид мубарак хьуй!
Шерифали, рахух яваш,
Муъмин ксар хьуй ваз юлдаш.
Хъвана шуьрбет салават гъваш.
Квез и мавлид мубарак хьуй!
