Абу Бакр ас-Сиддикьакай кьисаяр
Абу Бакра дуван гьакI ийизвай
Абу Бакран патав инсанар чпин суалар гваз атайла, ам сифте нубатда Аллагьдин ﷻ ктабдиз килигзавай. Эгер адаз анай жаваб жагъайтIа, ада Къуръандал асаслу яз вичин къарар акъудзавай. Нагагь ана ганвай суалдиз жаваб авачиртIа, ам Аллагьдин Расулдин ﷺ Суннадиз килигзавай. Эгер адаз Суннадайни гьа суалдай са шейни малум тахьанайтIа, ам асгьабрин вилик экъечIзавай ва абуруз лугьузвай: «Зи патав флан кас атанва, квекай садан кьванни рикIел аламани и месэладай Аллагьдин Расулди ﷺ къарар акъудайди?» Асгьабар Абу Бакран патав кIватI жезвай ва эгер садан рикIел а суалдай Аллагьдин Расулди ﷺ акъудай къарар рикIел аламайтIа, ада Абу Бакраз ам лугьудай. Асгьабривай къарар жагъайла, Абу Бакра лугьудай: «Шукур хьуй Аллагьдиз, чаз Пайгъамбардин ﷺ Сунна хвейи кас гайи».
Нагагь Абу Бакраз асгьабривай жаваб жагъун тавунайтIа, ада Аллагьдин Расулдиз ﷺ кьетIендиз мукьвабур кIватIдай ва абурал меслят гъидай. Эгер абур са къарардал атанайтIа, ада абурун фикирдал асаслу яз къарар акъуддай.
Абу Бакра ахварриз баян гузвай
Абу Бакраз арабрин ва кьилди къачуртIа, къурайшитрин ата-бубайрилай эгечIна вири несилдин эвледрин тIварар виридалай хъсандиз чидай. ГьакIни ада лап хъсандиз ахварриз баянар гудай. Абу Бакра гьатта Аллагьдин Расулдал ﷺ чан аламаз ахварриз баян гудай. Мугьаммад ибн Сирина (ам ахварриз баян гузвай виридалайни хъсанбурукай сад тир) лугьузва: «Абу Бакр Пайгъамбардилай ﷺ гуьгъуьниз и умматдин ахварриз баян гузвайбурукай виридалайни хъсанди тир».
Абу Бакран сабур
Абу Гьурайради агакьарайвал, садра Аллагьдин Расул ﷺ алай чкадал са касди Абу Бакраз экъуьгъунар авуна. Абу Бакр кисна ацукьнавай. Аллагьдин Расул ﷺ адаз килигзавай ва хъуьрезвай. Амма а касди лап гзаф пис гафар лагьайла, Абу Бакравай эхиз хьанач ва адан бязи гафариз жаваб гуз хьана. И карди Аллагьдин Расул ﷺ пашманарна ва ам къарагъна хъфена. Абу Бакра хъфидай рекье адахъ агакьарна ва лагьана: «Я Аллагьдин Расул ﷺ, ада заз экъуьгъзавай ва вун а вахтунда ацукьнавай, амма за адан бязи гафариз жаваб гайила, ваз хъел атана ва вун хъфена». Пайгъамбарди ﷺ лагьана: «А вахтунда ви патав малаик гвай ва ви паталай ада жаваб гузвай. Амма вуна адан бязи гафариз жаваб гудайла, шейтIан атана ва заз шейтIандихъ галаз ацукьиз кIан хьанач».
