Пайгъамбардиз ﷺ салават гъунин фазилатлувал
Пайгъамбардиз ﷺ салават гъунин фазилатлувал
Аллагь Таалади лагьана: «Гьакъикъатда, Аллагьдини Адан малаикри Пайгъамбардал салаватар кIелзава. Эй, инанмиш хьанвайбур, адаз мукьвал-мукьвал салаватар кIела ва салам це!» («Аль-Агьзаб» сура, 56-аят).
Салават – им Аллагь Таалади чаз ганвай Вичин регьим я. Ам Аллагьдин Пайгъамбар ﷺ виняй кьунихъ галаз алакъалу я. Ам гьакIни Аллагьдин Расулдиз ﷺ вири халкь авунвай затIари - малаикри, чинерри ва тIебиатди ийизвай дуьа я. Са суал арадал атун мумкин я: мегер чан алачир тIебиатдивай дуьа ийиз жедани? Эхь, гьадисди и кар тестикьарзава. Мугьаммад Пайгъамбардиз ﷺ, инсанрикай хелвет хьайила, къванерини тарари «Ассалату вассаламу алайка, я Расулюллагь» лугьудай ванер къведай.
Салаватдин кьилин макьсад – им кIани Мугьаммад Пайгъамбар ﷺ патал Аллагьдин ﷻ регьим тIалабун я. Гьар сеферда, салават кIелайла, Аллагь Таалади адан дережа хкажзава.
Маса ибадатра Аллагьди ﷻ чаз къуллугъ (ибадат) авун ва адан къайдаяр хуьн эмирзава, амма Пайгъамбардиз ﷺ салават Аллагь Таалади сифте Вичи гъана, ахпа малаикриз, гуьгъуьнлайни вири мусурманриз гьа кар авун эмирна. Инай чаз аквазвайвал, Аллагьдин Пайгъамбардиз ﷺ салават гъун виридалайни багьа ибадат я («Танбигьу-ль-гъафилин», 388-389 чинар).
Пайгъамбардин ﷺ салаватдиз жуьреба-жуьре къайдаяр ава. Ам гьи жуьреда хьайитIани кIелиз жеда. Абур гьар сад масадалай къиметлу я ва гьар садай чаз сувабар къведа.
Аллагьдин Пайгъамбардин ﷺ салават им Аллагьдин ﷻ патай чаз ганвай еке регьим я, чна Адаз а кардай кьадар авачир кьван шукур гъана кIанда.
Пайгъамбардиз ﷺ салават гъунай мусурмандиз гзаф нурар къведа. Гьадан берекат себеб яз, ам Пайгъамбардихъ ﷺ галаз алакъада жеда, гьам Пайгъамбардив ﷺ агакьардай ксарихъ галаз гьуьруьшмиш жеда, иллаки а кас дуьз рекьел алаз хьайитIа. Инсанривай дуьздини чIуруди тафаватлу ийиз тежезвай чи девирда ам лап чарасуз кар я. Инсанар дуьз рекьел гъиз кIанзавай касди виридаз дуьз меслятар къалурна кIанда, мукьвал-мукьвал истигъфар (тавбу) авуна кIанда, яни Аллагьдивай ﷻ гунагьрилай гъил къачун тIалабна ва гзаф кьадарда салаватар гъана кIанда.
