Пак гьадисрай къачунвай насигьатар
1. Аллагь Таалади лугьузва: «Эй, инсанар! Куьн и куьтягь жезвай, фана дуьньяда яшамиш хьун патал гьикьван чалишмиш жезва, квез гьикьван и куьруь уьмуьр кIанда? Гьакъикъатда, муьтIуьгъбуруз Женнет тайинарнава, абур гьаниз Адан муьжуьд къапудай фида.
Гьар са Женнетда 70 агъзур багъ ава; гьар са багъда якъутрин 70 къеле ава; гьар са къеледа 70 агъзур зумруддин кIвалер ава; гьар са кIвале 70 агъзур яру къизилдин утагъар ава; гьар са утагъда 70 агъзур гимишдин кьилди-кьилдин кIвалер ава; гьар са кьилдин кIвале 70 агъзур руквадин ранг алай хуьрекар недай столар ава; гьар са столдал 70 агъзур гевгьердин тIуьнар (хуьрекар) жеда; гьар са хуьрекдик 70 агъзур гьар жуьредин няметар жеда; гьар са кIвал элкъвена яру къизилдин 70 агъзур чарпайди кьунва; гьар са чарпайдал ипекдин ва парчадин 70 агъзур мес жеда; гьар са чарпайдин патав 70 агъзур цин (маульгьаят), некIедин, виртIедин ва Женнетдин шарабдин вацIар жеда. Гьар са вацIун юкьвал 70 агъзур жуьреба-жуьре емишар; гьар са кIвале 70 агъзур махпурдин алачух; гьар са месел чIулав вилер авай гьуьри, гьар садан вилик 70 агъзур дишегьли къаравушар жеда. Абур вири агал хьанвай кака хьиз я, гьар са къеледин винел 70 агъзур къуба; гьар са къубада 70 агъзур гьич садрани вилериз такур хьтин, япариз ван тахьай хьтин ва инсаниятдин фикирдивай кьатIиз тежедай хьтин Регьимлудан савкьватар жеда.
«Абуруз Женнетда чпиз рикIиз кIан хьайи гьар жуьредин емишар, чпиз кIан хьайи къушдин як ва гьакIни (гъетрен япа) кьватида жедай гевгьерриз ухшар авай чIулав вилерин гьуьрияр жеда. Ибур вири и дуьньядин уьмуьрда авур хъсан крарай гузвай багъишар я». Ана абур я рекьидач, я кьуьзуь жедач, я хажалатдик жедач, я абуру сив хуьдач, я капI ийидач, я абур кефсуз жедач, я къециз экъечIдач ва абур садрани Женнетдай акъуддач.
Вуж Женнет жагъуриз аватIа, вуж Зи Гъилин ачухвал, Зи Мукьвавал ва Зи Регьим рикIел гъиз аватIа, къуй ам гьахъвал гваз и дуьньядин малдихъ вил галачиз ва тIимилдал рази яз Захъди мукьва хьуй».
- Аллагь Таалади лугьузва: «Эй, Адаман хва! И девлет – Зи девлет я, вун Зи лукI я. Вахъ Зи девлетдикай, вуна тIуьрдалай, харж авурдалай, алукIна куьгьне хьайидалай ва я вуна гайи садакьадилай (идалди вуна девлет хвена) гъейри, са затIни авач.
Зи вилик вахъ пуд пай ава: са пай Зун патал я, кьвед лагьайди – вун патал, пуд лагьай пай чи арада ава (уртахди я). Заз талукь тирди – им ви руьгь я, ваз махсус тирди – ибур вуна авур крар-амалар я, Зинни ви арада авайди – им ви дуьа я, Зи патай – ви дуьадиз жаваб гун я.
Эй, Адаман хва! Иманлу хьухь, Аллагьдихъай кичIез хьухь ва ваз гайидал рази хьухь, гьакI хьайитIа ваз Зун аквада, Заз ибадат ая, вун Зи патав агакьда. Зун жагъура, ваз Зун жагъида.
Эй, Адаман хва! Эгер вун чпин явавиливай Жегьеннемдиз фидай гьукумдарриз, яб тагузвайвиляй Жегьеннемдиз фидай арабриз, чпин пехилвиляй Жегьеннемдиз фидай алимриз, алцурарзавайвиляй Жегьеннемдиз фидай савдагарриз, алишверишчийриз, чпин авамвиляй Жегьеннемдиз фидай джабарийриз, чеб винелай хъсан къалурзавайвиляй ва кьве чин алайвиляй Жегьеннемдиз фидай ибадатзавайбуруз ва пешекарриз, чпин лавгъавиляй Жегьеннемдиз фидай девлетлуйриз ва таб ийизвайвиляй Жегьеннемдиз фидай кесибриз – ухшар ятIа, бес ам вуж я Женнет жагъурзавайди?!
Кьатl ама.
