Дастамаз къачудайла дуьаяр кlелун
Суал: Дуьз рекьелай алатнавай са бязибуру лугьузва хьи, дастамаз къачудайла (гъилер, кIвачер чуьхуьдайла) дуьаяр кIелун бид’а я, гьавиляй абур кIелдай ихтияр авач. И гафар дуьзбур яни?
Жаваб: Ваъ, дуьзбур туш. Дуьа гьина хьайитIани ва мус хьайитIани ийидай ихтияр ава, анжах гьажетханада ва маса чиркин чкайра ам кIеви ванцелди кIелдай ихтияр авач. Дуьа - им виридалайни къиметлу ибадатрикай сад я. Дастамаз къачузвайдаз, кисна акъваздалди, дуьа кIелайтIа хъсан я. «Магьалли» ктабда кхьенва: «Ибн Гьиббана зайиф иснад авай гьадис агакьарна. Гьадисда лугьузвайвал, Пайгъамбардини ﷺ и дуьаяр кIелдай тир». Чаз малум тирвал, хъсан крарикай кхьенвай зайиф гьадисдал амал авуртIа, яни ам ишлемишайтIа жезва (1-том, дастамаздикай кхьенвай кьил). Эгер Пайгъамбарди ﷺ вичи кIелнавачиз хьайитIани а дуьаяр кIелайтIа жеда, вучиз лагьайтIа гьич санални ада абур дастамаз къачудайла кIелмир лагьанвач.
