Адалатлувал – им жуван нефсинин гьевесриз аксивал авун я
Пайгъамбарди лагьана: «Са сятина адалатлувал тайин авун пудкъад йисуз ибадат авурдалай хъсан я». Мусади u Аллагьдивай фиръаван телеф авун тIалабайла, Аллагьди адаз вагьйу ракъурна: «Я Муса, адан имансузвили Заз зарар гузвач, амма Зи лукIариз адан адалатлу къайдадикай хийир ава». Фиръавана инсанриз гужар ийиз гатIумайла, Аллагьди ам терг авуна.
Аллагь патал кIанивални такIанвал
Чир хьухь, эй мусурманар, низ дуьньядин уьмуьр кIанзаватIа, са чIавузни инсанрикай садаз такIан хьуникай ам къутармиш жедач. Дуьньядихъай элкъуьн инсанрин кIанивилихъ галаз галкIуруналди, идан гъавурда Пайгъамбарди туна.
Ада лагьана:
«Инсанрин гъиле авайдакай элкъуьгъ ва абуруз вун кIан жеда».
Гьавиляй, гьикьван гзаф инсандиз дуьнья кIан хьайитIа, гьакьван душманар адаз гзаф жеда. Ваз са кас Аллагь патал гзаф такIан хьайила, ваз такIан хьана кIанзавайди анжах инсанрин ерияр ва крар я, амма, Аллагьдин лукIар хьиз, инсанар чеб ваъ. Вучиз лагьайтIа инсандин гьакъикъат халкьнавайди Аллагь я, ва ам Адан яратмишун я, ва ам дегиш жезвайди туш.
Пайгъамбарди серкикай лагьай гафарикай фагьума:
«И набататдин ни заз такIан я».
Фикир це, Аллагьдин Расулди серг такIан я лагьанач, ада вичиз адан ни такIан я лагьана. Эй мусурманар, за квез уьлчмеяр чирда, абурун куьмекдалди квевай тайин ийиз жеда, квез инсанрихъ авай такIанвал Аллагь патал яни, я тахьайтIа нефсинин къариба мурад патал. Куьне квез такIан касдин крар Къуръандихъ ва Суннадихъ галаз гекъиг. Нагагь абура ада ийизвай крарилай тариф ийиз хьайитIа, квез ам кIан хьухь.
Амма эгер абура адан крарал айиб гъиз хьайитIа – такIан хьухь. Яни, квез инсандихъ авай кIанивал ва я такIанвал куь нефсинин къариба мурадар патал тежедайвал. Чав незуьр ийиз туна, чаз мусурманрикай са кас жуван нефсинин къариба мурадар патал такIан тежедайвал. Ачухдиз гунагьар ийизвай чIалаз килиг тийизвайбуруз ва гунагькарриз талукь яз лагьайтIа, АллагьТаала патал абур такIан хьун чун мажбур я. Им масадакай пис фикир хьуник акатзавач (Чаз адан гунагь такIан я, ам вич ваъ. Гьар са инсан кьилдин кас хьиз кIан хьун чун мажбур я).
ДАГЪУСТАНДИН МУФТИЙ, ШЕЙХ АГЬМАД ЭФЕНДИ АБДУЛАЕВ
