Къуръандин «Алю Имран» сура
Къуръандин «Алю Имран» сура
эвел алатай нумарайра
- Марьяма лагьана: «Рабби! Заз гьикI хва жеда кьван, эгер зак са итимни хкIун тавурла?» Ада (малаикди) жаваб гана: «Гьа тегьерда Аллагьди Вичиз вуч кIандатIа, гьа кар ийизва! Ада са затI (яратмишиз) кьетI авурла, Ада гьакI «Хьухь!» лугьун бес жезва – ва ам арадал къвезва.
- Ада (Аллагьди) чирда адаз Ктаб ва арифдарвал, Таврат ва Инжил.
- (Аллагьди адакай ийида) Исраилан несилрин патав ракъурдай пайгъамбар. (Исади абуруз лугьуда): «За квез лишан гъана (зун дугъриданни пайгъамбар тирди тестикьарзавай аламат) куь Раббидин патай. За квез чепедикай нуькIрез ухшар авай затI туькIуьрда, адаз уф гуда ва адакай Аллагьдин ихтиярдалди нуькI жеда. За буьркьуьди ва жузам азар квайди сагъар хъийида ва Аллагьдин ихтиярдалди кьейибурал чан хкида. За квез ахъайда куьне вуч незватIа ва куь кIвалера вуч хуьзватIа. Гьакъикъатда, и крара квез лишан ава, эгер куьн иман гъанвайбур ятIа.
- (Зун атанва) Зал къведалди Тавратда (ракъурнавайдан) гьакъикъатвал тестикьариз ва квез къадагъа тир затIарикай бязи шейэр ихтияр гун патал. За квез куь Раббидин патай лишан гъана. ГьакI хьайила, Аллагьдихъай кичIе хьухь ва заз муьтIуьгъ хьухь! (Рабиади агакьарайвал, Исадин шариат Мусадин шариатдилай кьиле тухуз хейлин регьят тир. ГьакI, месела, Тавратда гьайванрин къене авай пи, къармахар авай гьайванрин як, деведин як, бязи жуьре балугъар ва къушар тIуьниз ишлемишун къадагъа тир, гьакIни киш юкъуз кIвалахун къадагъа тир. Исадин Инжилди чувудриз са жерге кьезилвилер гъана).
- Гьакъикъатда, Аллагь – зи Рабби ва куь Рабби я. Адаз ибадат ая! Гьа им дуьз рехъ я».
- Исади абурун (чувудрин) имансузвал аннамишайла, лагьана: «Аллагьдин рекье зи куьмекчи вуж жеда?» Апостолри (лап мукьва асгьабри) лагьана: «Чун Аллагьдин куьмекчияр я. Чун Аллагьдихъ инанмиш хьана. Чун мусурманар (Аллагьдиз муьтIуьгъбур) тирди шагьидвал ая!
- Чи Рабби! Чун инанмиш хьана Вуна ракъурайдахъ ва пайгъамбардин гуьгъуьна аваз фена. Чун шагьидвал ийизвайбурун арада (Валай гъейри маса худа авачирди ва Иса – Ви пайгъамбар тирди) кхьихь».
- Абуру (имансузри) фитнеяр туькIуьрзавай, амма Аллагьди абурун фитнеяр чукIурна. Аллагьди пис фикиррай жаза гузва!
- Ингье Аллагьди лагьана: «Я Иса! Гьакъикъатда, За вун къахчуда, хкажда (чан аламаз) За кьакьанарнавай чкадал (кьвед лагьай цавал) (Антропоморфистри (мушаббигьа) и гафар гуя Аллагь Вичин Асул Манадалди цава авайдан делил хьиз ишлемишзава, амма им вири ашкара Шариатдин ва акьуллу делилриз акси я. И гафарин гьарфба-гьарф гъавурда акьун герек туш. Ина ихьтин мана хьун мумкин я хьи, Аллагьди ﷻ Исадиз Вичин патай кьетIен регьим гуда, я тахьайтIа ам ахьтин чкадиз хкажда хьи, гьина Аллагьдин ﷻ гьукумдилай гъейри садан гьукумни авач (ар-Рази)) ва вун михьда (къутармишда) имансузрикай (Чувудри Иса яна кьин къаст авуна, амма Аллагь Таалади ам цаварал хкажна. Пайгъамбар гьина аватIа лагьай хаиндиз Раббиди ﷻ Исадин къамат гана ва адаз пайгъамбардин паталай кьиникьин жаза гана), ви терефдарар лагьайтIа, имансузрин винел хкажда, лап Дувандин йикъал кьван. Ахпа куьн Зи патав хкведа ва куь (фикирар) куьн патахъай чара жезвайтIа, За адан патахъай къарар акъудда.
- Амма имансузриз За и дуьньядани ва гьамишалугъ уьмуьрдани кIеви жаза гуда. Абуруз куьмекчияр жедач (абур жазадикай къутармишиз жедай)».
- Хъсан крар авур иман гъайибуруз Ада (Раббиди) тамамвилелди суваб гуда. Аллагьдиз пис ксар кIанзавайди туш.
- Им Чна ваз (я Мугьаммад) аятрай ва арифдар РикIел Гъунай кIелзавай затIар я.
- Гьакъикъатда, Исадин мисал Адаман мисал хьиз я (абуруз кьведазни буба авачир): (Аллагьди) ам (Адам) накьвадикай халкьна, ахпа адаз лагьана: «Хьухь! (Чан акьалт)» - ва адал чан акьалтна.
- (Им вири) Ви Раббидин патай гьакъикъат я. Шаклу шезвайбурукай (и карда) жемир!
- Амма ваз чирвал хьайидалай кьулухъ (Аллагьдин патай, шак гъун виже текъвер), ни вахъ галаз (я Мугьаммад) адан (Исадин) патахъай гьуьжет ийиз хьайитIа, лагь: «Ша чна чи рухвайризни куь рухвайриз, чи дишегьлийризни куь дишегьлийриз эверин, чун (къведа) ва куьн (къведа) ва Аллагьдивай тIалабда, Адан лянет тапархъанрал атана аватдайвал!» (Эгер куьне Иса худа я лугьуз тестикьариз хьайитIа, гьазур яни куьн куь вири хизан кIватIиз ва и месэлада таб ийизвайбуруз ва я ягъалмиш жезвайбуруз лянет ракъуриз?!).
- 62. Им, гьакъикъатда, дуьз кьиса я (Марьяман хва Исадикай). Аллагьдилай гъейри маса худа авач. Гьакъикъатда, Аллагь – Лайихлуди, Арифдарди я.
- Нагагь абур элкъвейтIа (гьакъикъатдихъай), (чир хьурай хьи), зиян гузвайбур вири Аллагьдиз чизва (ва къведай уьмуьрда абуруз жаза гуда).
- Лагь (я Мугьаммад): «Эй Ктабдин инсанар! Ша чун са фикирдал къвен – чун ва куьн – ва Аллагьдилай гъейри са касдизни ибадат тийин, Адаз шериквиле са затIни тегъин ва Аллагьдилай гъейри сада-сад агъавиле такьан». Эгер абуру ваъ лагьайтIа, лагь: «Шагьидвал ая, гьакъикъатда, чун мусурманар тирди» (Аллагьдин Расулди ﷺ вичин кагъазда Византиядин император Ираклияз кхьена: «Ислам кьабула ва куьн бахтлу жеда. Аллагьди ваз кьве сеферда артух суваб гуда! Эгер вуна кьабул тавуртIа, ви раятрин вири гунагь ви хиве жеда» (Бухари). Ахпа кагъазда и аят гъизва ва идалди чун ачухдиз гъавурда акьазва хьи, виридан фикир, вичел Ктабдин инсанар сад хьана кIанзавай – Ислам я. Гьавиляй и аятдиз «вун ви динда хьухь, зун зи динда жеда, амма ша чун са фикирдал къвен» хьиз баян гузвайди, анжах Аллагьдин Ктаб чIурувилихъди дегишариз кIанзавай кас я).
- Эй Ктабдин инсанар! Вучиз куьне Ибрагьиман патахъай гьуьжет ийизва (ам чувуд тирни ва я хашперес тирни лугьуз), Тавратни Инжил адалай кьулухъ ракъурнавайла. Яраб куьн гъавурда акьазвач жал (куьн ягъалмиш жезвайди)?!
- Куьне гьатта квез чизвай шейэрикайни (Тавратдайни Инжилдай) гьуьжет ийизва. Бес вучиз куьне квез течизвай затIарикай (Ибрагьиман имандикай) гьуьжет ийизва? Аллагьдиз чизва, амма квез чизвач (Ибрагьиман гьакъикъи гьал ва адан инанмишвилер).
- Ибрагьим я чувуд тушир, я хашперес. Ам гьаниф – Аллагь Сад тирдахъ инанмишди (адав гьакъикъи иман ва михьи дин гвай), мусурман тир ва ам бутперес тушир.
- Гьакъикъатда, Ибрагьимаз виридалайни мукьва инсанар – адан гуьгъуьна аваз фейибур я (адал чан аламаз), гьакIни и Пайгъамбар (Мугьаммад) ва иман гъанвайбур (Мугьаммадан терефдарар). Аллагь – иман гъанвайбурун Арха я.
- Ктабдин инсанрикай бязибуруз куьн (эй мусурманар, гьакъикъи рекьелай) алудиз кIанзава. Амма абуру (идалди) анжах чпи-чеб рекьелай алудзава ва (гьатта ам) гьиссзавач.
- Эй Ктабдин инсанар! Вучиз куьн Аллагьдин лишанрихъ (Мугьаммадан пайгъамбарвилин гьакъикъат тестикьарзавай) инанмиш жезвач, квез аквазватIани (абур – Пайгъамбардин аламатар)?
- Эй Ктабдин инсанар! Вучиз куьне гьакъикъат табдалди кIевзава (дуьзвал чIурувилихъди дегишариз алахъиз ва ам таб хьиз къалуриз), чиз-чиз гьакъикъат чуьнуьхиз?
- Ктабдин инсанриз са паюни лугьузвай (чпи-чпиз): «Иман гъанвайбуруз (мусурманриз) ракъурнавайдахъ инанмиш хьухь йикъан сифте кьиляй ва инанмиш хьун акъвазара йикъан эхирдай. Белки абуруни (мусурманри) хиве кьан хъийидач (чпин инанмишвилер квехъ галаз санал).
- Анжах куь динда авайбурухъ инанмиш хьухь (куь фикирар садазни ачухмир, квехъ галаз иман гъанвайбурулай гъейри)». Лагь (абуруз, я Мугьаммад): «Гьакъикъатда, Аллагьдин рехъ (дин) – им тек са дуьз рехъ я». (Ктабдин инсанриз кичIезва) Абуруз авай затI масабуруз жез ва я Раббидин вилик чпихъ галаз гьуьжет ийиз. (Аллагьдин гафариз «Абуруз авай затI масабуруз жез ва я Раббидин вилик чпихъ галаз гьуьжет ийиз» кьве баян гун мумкин я: 1) Аллагьди Вичин Пайгъамбардиз ﷺ эмирзава им чувудриз ва хашпересриз лугьун: квез кичIезва, квез гайи хьтин дин ва Ктаб масабуруз гунихъай ва квехъ галаз ийизвай гьуьжетра абур квелай викIегь жез. 2) Им Ктабдин инсанрин ихтилатар давамарун я: яни мусурманрин вилик куь чирвилер ачухмир, тахьайтIа абуру гьа чирвилер Дувандин юкъуз гьуьжетра делил хьиз квез акси яз гъида (аль-Байдави, Ибн Касир). Лагь (я Мугьаммад): «Гьакъикъатда, вири няметар Аллагьдив гва. Ада абур Вичиз кIандайдаз гузва. Гьакъикъатда, Аллагь – Вири КьатIудайди, Чидайди я».
- (Аллагьди) Вичин регьимдалди Вичиз кIандайди чара авуна тайин ийизва. Аллагь – чIехи жумартвилин Иеси я.
КьатI ама.
«Калям Шариф» (Къуръандин манайрин таржума) ктабдай.
