Сура аль-А`раф (Манийвилер)

эвел алатай нумрада

59. Гьакъикъатда, Чна Нугь адан халкьдин патав ракъурна (пайгъамбар яз) ва ада лагьана: «Эй зи халкь! (Анжах) Аллагьдиз ибадат ая ва квез Адалай гъейри маса худа авач. Гьакъикъатда, заз кичIезва квел жаза агакьиз ЧIехи юкъуз (эгер куьне анжах са Гьадаз ибадат тийиз хьайитIа)».

60. 60. Адан халкьдикай тир чIехи ксари (а гафариз) жаваб гана: «Чаз аквазва хьи, вун ачухдиз ягъалмиш жезва».
61. 61. Ада (Нугьа) лагьана: «Эй зи халкь! Зун ягъалмиш жезвач. Аксина, зун (куь патав ракъурнавай) – алемрин Раббидин пайгъамбар я (ва гьавиляй зун виридалайни дуьз рекьел ала).
62. 62. За квел зи Раббиди ракъурай шейэр агакьарзава ва квез насигьатар ийизва (квез анжах хъсанвилер хьана кIанз). Заз Аллагьдин патай квез течизвай шейэр чизва.
63. Куьн тажуб жезвани, Аллагьди куь рикIел гъизвай крар квекай (куь халкьдикай) тир инсандал атана лугьуз, ада куьн хабардар ийидайвал ва куьне куьн хуьдайвал (имансузвиликай ва гунагьрикай)? Гьа чIавуз квез, мумкин я, регьим ийида».
64. 64. (Вири насигьатризни килиг тавуна) Абуру ам тапархъандай гьисабна, амма Чна ам ва адахъ галаз гимида авайбур къутармишна, ва Чи лишанар таб яз гьисабайбур вири батмишарна. Гьакъикъатда, абур буьркьуь инсанар тир (гьакъикъат акун тавур).
65. 65. (Чна ракъурна) Адитрин патав абурун стха Гьуд. Ада лагьана: «Эй зи халкь! (Анжах) Аллагьдиз ибадат ая ва квез Адалай гъейри маса худа авач. Яраб квез кичIезвач жал (Аллагьдин жазадихъай)?» (Гьуда вичин халкьдиз эвер гузвай, Нугьан халкьдихъ галукьай жазадихъай кичIе жедайвал, вучиз лагьайтIа адитар яд акьалтайдалай кьулухъ лап гзаф вахт алат тавунвай вахтунда яшамиш жезвай ва абурун кьадар-кьисметдикай чизвай, яд акьалтунин нетижаяр амай хьи).
66. 66. Адан халкьдин имансуз чIехибуру жаваб гана: «Чаз анжах аквазвайди вун ахмакь тирди я (вучиз лагьайтIа вун ата-бубайрин диндилай элячIнава) ва чна вун тапархъан яз гьисабзава (вуна вун пайгъамбар я лугьуз ийизвай тестикьарунра)».
67. 67. Ада лагьана: «Эй зи халкь! Зун ахмакь туш, гьакъикъатда, зун – алемрин Раббидин пайгъамбар я (куь патав ракъурнавай).
68. 68. За квел зи Раббиди ракъурзавай шейэр агакьарзава ва зун куьн патал – ихтибардиз лайихлу тир меслятчи я. (И кьве аятди пайгъамбардиз хас тир важиблу ва чарасуз тир кьве ери къалурзава – акьул ва вичин халкьдал малуматар агакьарунин карда ихтибарлувал).
69. 69. Куьн тажуб жезвани, куь Раббиди рикIел гъизвай кар квекай (куь халкьдикай) тир инсандал атана лугьуз, ада куьн хабардар ийидайвал? РикIел хкваш, гьикI Ада (куь Раббиди) квекай Нугьан халкьдин кар давамарзавайбур ва генани кьакьан буй авайбур (ва абурулай къуватлубур) авунатIа. Аллагьдин регьим рикIел хуьх, (а кар себеб яз) квехъ агалкьунар жедайвал (кьве дуьньядани)».
70. 70. (И насигьатриз жаваб яз адитри) Лагьана: «Яраб вун чи патав чна са Аллагьдиз ибадат авун патал ва чи ата-бубайри ибадат авурбурухъай элкъуьн патал атанва жал? Эгер вуна дуьз лугьузватIа, вун чаз квелди кичIе гузватIа, гьам (жаза) ракъура».
71. 71. (Гьуда) Лагьана: «Куь Раббидин жаза ва ажугъ квез гьеле виликамаз тайинарнава. Яраб куьне захъ галаз тIварарин патахъай гьуьжетар ийида жал, куьне ва куь ата-бубайри туькIуьрнавай (куь бутар – анжах гьакIан тIварар я; абур гьакъикъатда авайбур туш)? Аллагьди абурун патахъай (абур ибадат авуниз лайихлу тирдан) са делилни ракъурнач. (Ма куьне гьакьван насигьатризни килиг тавуна, куь терсвиле кIевивал ийизватIа) Вил алаз акъваз (жазадал, куь кьилел атана аватдай) ва зунни вил алаз акъвазда (адал) квехъ галаз санал».
72. 72. Чна ам ва адахъ галайбур (иман гъанвайбур) Чи регьимдалди къутармишна (жазадикай, имансузрал агакьай). Чна терг авуна (сад амай кьван) Чи лишанар кьабул тавурбур ва иман тагъайбур. (Суддидин, Мугьаммад ибн Исгьакъан ва маса тарихчийрин баянрихъ галаз кьурвал, адитри чилел гунагьар раиж ийизвай ва Аллагьди ﷻ абуруз ганвай къуват нагьакьан мурадар патал ишлемишиз, маса инсанриз зулум ийизвай. А тайифа Аллагьдиз ﷻ ибадат авунихъай элкъвена ва бутриз ибадат ийиз хьана ва а чIавуз Аллагьди ﷻ абурун патав пайгъамбар яз Гьуд ракъурна, гьа тайифадин асул-несил авай тухумдай тир).
73. 73. (Чна ракъурна) Самудянрин патав абурун стха Салигь. Ада лагьана: «Эй зи халкь! (Анжах) Аллагьдиз ибадат ая ва Адалай гъейри квез маса худа авач. Квез делил атанва (зи гьахъвилин ва зи пайгъамбарвилин) куь Раббидин патай. Аллагьдин и деве (рагай экъечIай) – куьн патал (аламатдин) лишан я. Ада Аллагьдин чилел векь тIуьрай ва адаз писвал ийимир (адахъ чIурай калтугиз ва я рекьиз алахъиз), тахьайтIа квел тIарвал гудай жаза къведа.
74. 74. РикIел хуьх, Аллагьди квекай адитрин кар давамардайбур авуна ва куьн чилел гьарма сана яшамиш жез ацукьарна. Адан дуьзенлухра куьне чIехи кIвалер эцигзава (гатуз яшамиш жезвай), дагълара лагьайтIа, кIвалер атIузва (хъуьтIуьз яшамиш жезвай). Аллагьдин регьим рикIелай алудмир ва чилел къанунсузвал раиж ийимир».
75. 75. Адан халкьдикай тир такабурлу чIехибуру хабар кьуна (ягьанатар ийиз) зайиф (ва кесиб) иман гъанвайбурувай: «Квез дуьз чизвани Салигь (куь патав) Раббиди ракъурнавайди?» Абуру жаваб гана: «(Эхь!) Ам вуч гваз ракъурнаватIани, чун абурухъ виридахъ инанмиш я».
76. 76. Такабурлубуру (имансузри) лагьана: «Чун инанмиш туш куьн инанмиш жезвай затIарихъ!»
77. 77. (ГьакI лагьана) Абуру деве кьена (сифте адан метIин дамарар атIана), чпин Раббидин эмирдиз яб тагана (деведиз зарар гумир лагьай), ва лагьана: «Я Салигь! Вуна квелди кичIе гузватIа, ам (жаза) чаз ракъура, эгер вун дугъриданни (Аллагьдин) пайгъамбар ятIа». (Салигь пайгъамбардин халкьди адаз лагьана: «Салигь, вуна чаз жаза гуналди кичIе гузвай, нагагь чна яб тагана деве кьейитIа, амма чна яб ганач ва ам кьена, бес гьинава жаза?» Абуру адакай ягьанатар ийиз акI лугьузвай, вучиз лагьайтIа абур жаза къведайдахъ агъазвачир).
78. 78. Абуруз залзала хьана ва пакамаз абур чпин кIвалера ярх хьана (кьена).
79. 79. (Салигь) Абурухъай элкъвена ва лагьана: «Эй зи халкь! За квел зи Раббидин хабар агакьарна ва квез насигьатар авунай, амма квез насигьатар ийизвайбур такIан я». (Мукьва жезвай жазадин лишанар акурла, самудянриз чпин пайгъамбар рекьиз кIан хьана. Амма Аллагь Таалади, Салигь ва иман гъанвайбур адахъ галаз санал къутармишна, абуруз хатасуз чкадиз куьч хьун эмирна. Имансузрихъ лагьайтIа, жаза галукьна: Жибриль малаикди зегьле ракъурдай саягъда гьарайна, адан гужлувиляй абур вири гьа алай чкайрал кьена. Абур кьейидалай кьулухъ пайгъамбарди гьайиф чIугваз, гила телеф хьанвай вичин халкьдихъ элкъвена лагьана: «За квел хабар агакьарна, жазадикай куьн игьтиятлу авуна, рикIин сидкьидай вири къуватар эцигна квез насигьатар авуна, амма квез насигьатар ийизвайди такIан жез ва куьне адахъ галаз душманвал ийиз давамарзавай»).
80. 80. (Чна ракъурна) ЛутIни (пайгъамбар яз адан халкьдин патав). Ада вичин халкьдиз лагьана: «Яраб куьне явавал ийида жал, квел къведалди дуьньяда садани тавур?!
81. 81. Куьн (итимар) къизмишвилелди итимрихъ галаз мукьва жезва дишегьлийрин еринда. Куьн – (ахлакьдин) вири сергьятрилай элячIнавай (ва квез куьн гьахълу ийидай са делилни авачир) инсанар я».
82. 82. Жаваб яз адан халкь анжах са гафунал акъвазна: «Чукура абур (яни ЛутI ва адан терефдарар) куь хуьряй. Гьакъикъатда, а инсанри чеб михьибурай кьазва (а гунагьдай кьацIун тавунвай)».
83. 83. Чна ам (ЛутI) ва адан хизан къутармишна, адан (имансуз) папалай гъейри, ам амукьайбурун арада хьана (ва абурухъ галаз санал кьена). (ЛутI пайгъамбардин папа адан эвер гун кьабулнач ва амай имансузрихъ ам галаз телеф хьана (атI-ТIабари).
84. Чна абурун кьилел марф къурна (къванерин). Килиг садра, тахсиркаррин нетижа гьихьтинди хьанатIа! (ЛутI Ибрагьиман стхадин хва тир. ЛутI вичин ими Ибрагьимахъ галаз Харрандай куьч хьайила, Ибрагьим Палестинадиз фена, ЛутI лагьайтIа, Иорданияда яшамиш жез ацукьна. Аллагь Таалади ам Содомдин агьалийрин патав ракъурна, ада абуруз Сад Аллагьдиз ибадат авуниз эвер гудайвал ва абур а пис гунагьдикай хуьдайвал).

КьатI ама.

«КАЛЯМ ШАРИФ» (КЪУРЪАНДИН МАНАЙРИН ТАРЖУМА) КТАБДАЙ.