Къуръандин «Алю Имран» сура
Къуръандин «Алю Имран» сура
эвел алатай нумарайра
- Гьакъикъатда, цавар ва чил халкь авунин карда, гьакIни йиф ва югъ дегиш хьунин карда – акьул авайбуруз лишанар ава.
- (Абур) КIвачин кьилел, ацукьна ва къвалал (ярх хьана) Аллагьдиз зикир ийизвайбур я, гьакIни цаварни чил яратмишуникай фикирзава, (икI лугьуз): «Чи Рабби! Вуна ибур (вири) гьавайда халкьнавач. Вун михьи я (гьар са нукьсандикай)! Чун Жегьеннемда азаб гуникай хуьх!
- Чи Рабби! Вуна Жегьеннемдиз гадарайди беябур жеда. Писбуруз куьмекчияр авач!
- Чи Рабби! Чаз, гьакъикъатда, имандихъ эвер гузвай, хабар гудайдан (Мугьаммад Пайгъамбардин) ван хьана: «Куь Раббидихъ инанмиш хьухь!» - ва чна иман гъана. Чи Рабби! Чи гунагьрилай гъил къачу, вири пис крар чIура ва чун диндар ксарихъ галаз секинара.
- Чи Рабби! Вуна чаз Ви пайгъамбаррилай агакьарна гуда лагьана гаф ганвай шей (сагъ-саламатвал ва агалкьун) чаз це ва Дувандин юкъуз чун беябурмир. Гьакъикъатда, Вуна гайи гаф чIурзавайди туш».
- Абурун Раббиди абуруз жаваб гана: «Гьакъикъатда, квекай хъсан крар ийизвайбурун крар За къиметсуз ийидач (эвез тавуна туна), кIантIа ам итим хьурай ва я дишегьли. Квекай садбур муькуьбурулай я (аял хунин карда гьикI дидеди иштиракзаватIа, гьакI бубадини иштиракзава.). Вуж (дин патал) куьч хьанатIа ва я кIваляй акъуднатIа, я тахьайтIа Зи рекье азиятар чIугунатIа ва дяве авунатIа, ва ана яна кьенатIа – (абуруз виридаз) За гьикI хьайитIани абурун пис крар багъишламишда ва (Женнетдин) багълариз ракъурда, чпин кIаникай вацIар авахьзавай. Им – Аллагьдин патай пишкеш я. Аллагьди виридалайни хъсан пишкеш гуда».
- Имансузар чилел санлай санал (азаддиз) къекъуьни вун алдатмиш тавурай. (Агакьарзава хьи, бязи мусурманри, имансузрин бахтлу уьмуьрдиз килигиз лугьузвай: «Чаз аквазва, гьикI Аллагьдин душманар абад жезватIа, чун лагьайтIа, гишинвиляй ва кесибвиляй рекьизва». Абуруз жаваб яз и аятар ракъурнай (аль-Байдави)).
- (Чилел жезвай уьмуьр абуруз анжах) Са куьруь вахтунин лезет я, ахпа акъваздай чка Жегьеннем жеда. Гьикьван пис я а чка!
- Амма чпин Раббидихъай кичIе хьайибуруз, - (Женнетдин) багълар жеда, чпин кIаникай вацIар авахьзавай. Абур ана гьамишалугъ яз амукьда. Им (абуруз) Аллагьдин патай пишкеш я. Аллагьдиз авай затI диндар ксар патал хъсан я (и дуьньядин няметрилай).
- Гьакъикъатда, Ктабдин инсанрикай Аллагьдихъ ва квез ракъурнавай ва гьабуруз ракъурнавай затIарихъ инанмишбур ава. (Бязи чувудрини хашпересри Пайгъамбар ﷺ авай вахтунда Ислам кьабулна, месела, Абдуллагь ибн Салям. Абур Аллагьдихъ ﷻ, Къуръандихъ ва гьакIни виликдай ракъурай пак Ктабрихъ рикIин сидкьидай инанмиш я. Гьакъикъатдикай чир хьанмазди ам кьабулуналди абуру субутна хьи, гьамиша рикI михьи тирди – гьатта Ислам кьабулдалди. Мужагьида агакьарна хьи, и аят виридаз талукь я: ана виликдай хашперес ва я чувуд тир, ахпа Ислам кьабулай гьар садакай лугьузва (аль-КъуртIуби). Абур Аллагьдиз муьтIуьгъ я ва усал къиметдихъ Аллагьдин аятар маса гузвач. Абуруз – чпин Раббидин патай пишкеш жеда. Гьакъикъатда, Аллагьди гьахъ-гьисаб тадиз ийида.
- Эй иман гъанвайбур! Сабурлу хьухь ва генани сабурлу хьухь (имансузрилайни), сергьятар хуьх (Аятда «рабитIу» гаф ишлемишнава, адан мана «мусурман уьлкведин сергьятар хуьх» хьун мумкин я. ГьакIни адан мана «Шариатдин эмирар тамамара, ферзер ая ва гьарамдивай къерех хьухь» хьун мумкин я» (Ибн Жузай аль-Кальби)) ва Аллагьдихъай кичIе хьухь, агалкьун къазанмишун патал!
