КапI тавун къиямат я!
КапI тавун къиямат я!
Вилер ахъайиз кIанзавачир…генани къарагъна чингъил чуьхуьдай ашкъи авачир. «Бррр…яд къайиди я эхир!» ФатIимадин и карни рикIел хтана ва ам генани яргъандик алчуд хъхьана.
«Къе гьяд югъ я. Мектебдизни физвайди туш, гьавиляй яргъалди ксайтIа жезвайди я, Фатимади вичивичикди фикирна. – КпIунизни гьяд югъ вучиз ийизвайди туш?» И келимаяр ада, гьелбетда, ван акъудна лагьанач. Дидеди лагьайтIа, пуд сеферда атана, вичин руш капI авун патал ахварай авудна. Эхирки, кIанзнитакIанз ФатIима къарагъна гъилер чуьхуьн къачуз фена.
Экуьнин тIуьн недайла, бубади лагьана: «Къе вучиз ятIани ФатIима капI ийиз къарагъун патал гзаф вахт фена. Белки, ам начагъ хьанватIа?». Диде мукъаятдаказ рушаз килигна, ахпа адан пелел гъил эцигна ва ам секин хьана.
Аквазвайвал, ваъ, ам сагълам я.
Са вуч ятIани хьанва жеди. ТахьайтIа вучиз ам экуьнин кпIунал икьван яргъалди къарагъзавачир? мад хабар кьуна бубади.
Буба, зун, дугъриданни сагъ я, кефсуз туш, лагьана ФатIимади. – Къе гьяд югъ тирвиляй за са тIимил кьван геждалди ксун кьетIна.
Бес капI гьикI хьурай?! – мягьтел хьана буба. – Вавай ам ахъа жедачирни бес!
Гьафтеда садра хьайитIани ам вахтунда тавуртIа жезвачни? – лагьана явашдиз ФатIимади. – Са сеферда хьайитIани жувахъ ял ядай югъ жедайвал…
Гьяд югъ лугьузвани? – буба вичин рушан ихьтин гафарал са тIимил хъуьруьнни авуна. – Вуна жуван нефесдиз ял ядай югъ авуртIа вуч жеда: гьафтеда са сеферда нефес къачун тийиз гьавалат хьухь! Къуй ви жигерри ял ягърай, абуру сагъ гьафтедин къене акьван кIвалахзава хьи…
АкI жедайди яни ахпа? – ихьтин ихтилатрихъ ФатIима ягъунач. – Нагагь нефес къачун тийиз хьайитIа, чун рекьида!
Бес гьафтеда садра хьайитIани ви жигерризни секинвал, саламатвал кIанзавачни? – лугьузвай бубади вичин гафунал кIевивална хьиз, амма жизви хъуьрезвай.
ФатIимади гьасятда столдин кьилихъ нефес къачун тийиз гьавалат хьана, амма са декьикьани алатнач мад адавай ихьтин гьал эхиз хъхьанач… дерин нефес акъадарна.
Ваъ, чан буба, икI жедач, жигерривай ял ягъиз жедайди туш, абуру датIана кIвалахун лазим я! – инанмишвилелди лагьана ФатIимади.
КапIни гьакI я ман, ам тийидайла нефес кьунва лагьай чIал я. Чун гьамиша адахъ муьгьтеж я, лагьана бубади. – Ваз чизва хьи, капI – им Аллагьдихъ ﷻ галаз ийизвай рахунар я. Аллагь Таала адахъ муьгьтеж туш, адахъ муьгьтежбур чун, Адан лукIар я. КапI галачиз чи руьгьер нефес галачир беден хьиз телеф жеда.
ГьакI я кьван! Заз лагьайтIа, ял ядай югъ ийиз кIанзавай… кпIуниз. Вуч жедайтIа ахпа! Къиямат! – гьарай акъатна ФатIимадай.
Икьван гагьди столдихъ секиндаказ ацукьнавай гъвечIи Рамазана вичин капаралди столдин чин гатана ва куьруь чIаларалди лагьана: «Къиямат, къиямат! КапI галачиз къиямат!»
- Эхь, чан руш ФатIима, туькIуьр техжедай хьтин кар жедай, - лагьана дидедини.
И йикъалай ФатIимадиз капI ахъай тавунин важиблувал чир хьана. Пакадин юкъуз мектебдай хтайла, ада вичин нисинин капI авун патахъай кьетIендаказ тади ийизвай.
