Аламатдин дуьньяда
Вад рангунин вир
ТIебиатдин нубатдин аламат Китайда, Цзючжайгоу тIвар алай милли паркуна ава. Лагьана кIанда, паркунин мулкарал хейлин вирер, чарчарар (водопадар) ала. Абурун арада виридалайни кьетIенди, фикир желбзавайди вад ранг алай вир я.
Вир элкъвена дагълари хуьзва. Деринвал саки 5 метр я. Винелай килигайла, регьятдиз вирин кIан аквазва. Вирел гагь хъипи, гагь къацу, гагьни бирюзадин, сапфирдин, чIулав нефритдин рангар акьалтзава.
Къваларив гвай вирерин яд муркIади кьаз авагъзаватIани, бязи вирер кьуразватIани, и вире авай яд хъуьтIуьз муркIади кьазвач, я чими гатуз цин кьадарни тIимил жезвач. Ихьтин кьетIенвилериз килигна, чкадин агьалийри адаз пак вир лугьузва.
Илимдин жигьетдай тухвай ахтармишунри тестикьарайвал, вире авай цик киреж, кальцийдин карбонат, жуьреба-жуьре рангарин гидрофитар ква. Абуру циз гьар жуьредин рангар гузва. Яд муркIади кьун тавунихъни себеб ава. Чилин кIаник квай кудай цин чешме вире авайвиляй вад ранг алай вирин яд садрани муркIади кьазвач.
