Къуват гунин дуьшуьш
КьетIен гуж тагана инсандивай вичин къуват маса касдиз гуз жеда. Ам гьикI ийидатIа чириз кIанзавани?
Садра туьквенда, кассадин патав нубат къведалди акъвазнавайла, зун кассадин аппарат кардикай хкатунин шагьид хьана. Муьштерияр гзаф авай, касса лагьайтIа – анжах сад. Зун кассадив агакьайла, анал гзаф кьадар инсанар кIватI хьанвай. Учирда акъвазнавайла заз акуна хьи, са касдилай гъейри, виридак хъел квай ва кассирдиз суалар гузвай: «ЧIур хьанвайди мус дуьзар хъийида?», «Гила инал чун са сятина акъваздани?..»
Галат хьана ва аман атIанвай кассирди гьар са муьштери абур вил алаз акъвазунин себебдин гъавурда твазвай; галат хьуниз килигна адан далу акваз-акваз агъуз акIаж жезвай. Секиндиз акъвазнавай итимдал нубат атайла, ада ачухдиз кассирдиз са тIимил къуват гун кьетIна. Кассир рушаз куьмек кIанзавайди гьисабна, ам рикIин сидкьидай лугьуз алахънавай. Ада икI лугьузвай: «За куь дурумлувилиз ва чалишмишвилиз чIехи къимет гузва. Гьал дугъриданни четинди я. Заз аквазва куьн гьикьван алахъзаватIа ва за фикир гана, куьн инсанрихъ галаз гьикьван эдеблу ва сабурлу ятIа. Ам чIур хьуна куь тахсир авач.
Заз квез чухсагъул лугьуз кIанзава куьне ихьтин зурба ва важиблу кIвалах авунай, квевай и кардал дамах ийиз жеда». Вичин тереф хвейила, кассирди регьятдиз нефес акъадарна: са кас кьванни адан гъавурда акьазва! «Чухсагъул, - разивал малумарна ада таниш тушир итимдиз. – Куь гафар – гьа заз герекзавай затI тир». Кассадин аппарат дуьз хъхьайла ада завай пул къачуна ва вилик фена, зун элкъвена адаз килигна.
Ада маса муьштерийриз къуллугъзавай ва адан далу дуьз хъхьана ва ам мад вич-вичихъ агъуна. И асуллу гъейратлу инсанди адаз ам гзаф муьгьтеж тир къуват гана. Адаз гьикьван регьят тир гьа дишегьлидиз чухсагъул лугьуз ва вичин нубатда, адаз а гафар гьикьван важиблу хьана! Учирда авай итимди неинки кассадихъ ацукьнавай дишегьлидиз къуват гана, гьакI амайбурузни виридаз ва арадал атай гьал гуьзчивилик кутуна. Квевай са-кьве гаф лагьана куь къуват масадаз гуз жедани? Квез хъсан къуват хьурай, гьуьрметлу газет кIелзавайбур!
РЕНАТ ДУБКИНСКИЙ
