Бедбахтвили чанар къутармишна
Бедбахтвили чанар къутармишна
Са лап ачух чими юкъуз лежбер къулай шартIар авай гъвечIи кIвалин дакIардай вичин бегьердиз килигзавай. Вилиз аквазвай кьван чкадиз экIя хьанвай никIер, векь незвай гьайванар. Яргъал варцарин залан давамлу зегьметди бегьер гъана. Техилдин магьсулар, салан майваяр – вири чпин вахтунай физва.
Йифиз фермадал цифер акьалтна. ТIурфан пехъи къуватдалди и кьил а кьил авачир никIерал тепилмиш хьана. Лежберди варцаралди къайгъударвилелди битмишарайбур юргъади гьасятда терг авуна. Ахвар авачир, куьтягь тежер йиф пакаман вахтуни дегишарна. Кьуьзуь касди, никIе къекъвез, барабар тушир женгинилай кьулухъ, сагъдиз амукьайбур жагъурзавай. Гьеле умуд ама! Папа бегьердин амукьаяр кIватIиз куьмек гана. «Сагъ са вацра бес жеда», - рикI кIеви ийиз лагьана папа, гъуьлуьз кIвализ эверна.
Гьаятдай кицIерин элуькьунин ван къвезва. ДакIардай кьил экъисна килигна, итим чукурна куьчедиз экъечIна. Гьайванар чах-чахралди кIевнавай чкадай экъечIна къутармишай бегьер незвай. Вафалу кицI галаз лежберди гьайванар элкъуьрна рахкурна. Малум хьайивал, гужлу гару чах-чахар агалнавай зайиф тIуб галудна. Ам туькIуьр хъийидайла яшлу паб «тахсиркаррин» патав атана. Кайваниди гьайванар гьисабзавай вахтунда са цIегь къуватсуз хьана къвалал ярх хьана. Адан гуьгъуьнал алаз муькуьди, пуд лагьайди. Гьайванар азарлу жез гатIумна.
«Им вуч бала я?» - фикирна лежберди. Ада маларин духтурдиз эверайла чир хьана хьи, гьайванар лежберди вичин къутармишун яз гьисабзавай бегьерди зегьерламишна. Сагъсуз тIуьна миянардай шейэрик акатай химикатар квай.
Пашман кьиса? Михьиз ваъ. Ша чун и агьвалатдиз михьиз санлай килигин. Уьмуьрдин кар, гьакъи, ризкьи тир затI терг хьана. Эгер лежберди бегьер маса ганайтIа, гзаф кьадар инсанар, мумкин я, кьисадин игитар чебни азарлу жедай. Чин тийиз лежберди чIур хьанвай бегьер туна ва адалди адан гьайванар зегьерламиш хьана.
Гьа течирвилихъ кьилин метлеблувал ава. Чахъай гзаф кьадар себебар чуьнуьхнава ва абуру чаз вири шикил санлай акуниз манийвал ийизва.
«Кунг-фу панда» мультфильмдин са персонажди лагьана: «Хабар хабар я, кIантIа хъсанди хьурай, кIантIа писди». Хабардик вичик са затIни квач. Гьалдиз килигна адал лишан эцигзавайди чун я.
Сифте акунрай пис хабардикай нямет хьун ва я аксина – хъсан кардикай зиян хкатун мумкин я. Акьулдалди ам анжах а чIавуз кьатIуз жеда хьи, жезвай кардин гьакъикъи асул мана дуьздал акъатайла. Нагагь ахьтин крариз фикир гайитIа, гележегда жуьреба-жуьре гьалариз секиндиз ва гъавурда аваз килигиз регьят жеда. Чахъай кIевнавай гьакъикъатдал вил алаз хьуни чаз сабур ийиз чирзава.
