Мугьаммад Пайгъамбардин ﷺ мавлид

Агьмадан (Мугьаммадан) ﷺ нур Адам пайгъамбардилай несилрилай несилрал физ, АбдулмутIалибал агакьна. Са сеферда АбдулмутIалибаз ахварай вичин кьулан тарцяй зунжур акъатиз акуна.

Нурдикай тир и зунжур цавуз хкаж хьана, ахпа чилел эвичIна ва къацу тарциз элкъвена. Адаз тар кьунвай са кьуьзуь кас акуна. Адавай хабар кьуна: «Вун вуж я?» «Нугь», - жаваб гана ада. АбдулмутIалибазни, Нугьа кьунвайди хьиз, тар кьаз кIан хьана, тахьайтIа са хел кьванни, амма адаз лагьана хьи, и тарцик адан пай квач ва и арада ам ахварай аватна.

АбдулмутIалиба хизан кутурла, адаз кьуд хва хьана: Абу Лагьаб, Абу ТIалиб, Аббас ва Абдуллагь. Ахпа ам Вугьайбан руш Халатал эвленмиш хьана ва ада Гьамзат хана. АбдулмутIалибал агакьай Гьабибуллагьдин ﷺ нур адан хва Абдуллагьал фена.

Абдуллагь тамам яшдив агакьайла, АбдулмутIалиба ам эвленмишуникай фикир ийиз хьана. Ам Вагьбан патав Амина це лугьуз фена ва кьведанни разивал аваз аялар эвленмишна. Гьа йифиз АбдулмутIалибни Вугьайбан руш Халатал эвленмиш хьана. Гьа икI бубадикайни хцикай гьа са вахтунда чамар хьана.

Агьмадан ﷺ нур дидедин руфуниз фейила, лугьуз тежер хьтин вакъиаяр хьана. Гьа йифиз къурайшитрин гьайванар рахана ва абуру Амина Аллагьдин КIанидал ﷺ руфунал залан хьанвайди хабар гана. Лянет хьайи иблис Абу Къубайс дагъдал хкаж хьана, кIевиз гьарайна вири шейтIанриз эверна ва абуру регьимдин Пайгъамбар ﷺ дидедин руфуна хьуникди кIеви ванцелди шехьун тешкилна. И йифиз Аллагьди ﷻ Ризваназ Фирдавусдин къапуяр ахъаюн эмирна, гьакIни Адан эмирдалди малаикди идан гьакъиндай чилел ва цавара хабар чукIурна.

Аминадиз вич руфунал залан тирди гьасятда чир хьанвачир, ада гьатта адет яз руфунал залан дишегьлийри синемишдай (гьиссзавай) четинвални гьисснач. Йифиз чил рагъакIидай патай рагъэкъечIдай патаз кьван, рагъ алай юкъуз хьиз, нурлу хьана. Сирияда авай Бусрдин къелеяр патав гвайди хьиз вилериз акуна.

Амина сад лагьай вацра руфунал залан тирла, адан патав са кьакьан инсан атана ва шад хабар гана: «Ви руфуна авай гада – пайгъамбаррин пачагь я». Аминади адавай хабар кьуна: «Вун вуж я?» Ада жаваб гана: «Зун Адам я, адан буба». Гуьгъуьнин вацра, сад лагьай сеферда хьиз, маса касди адаз гьа шад хабар хгана. «Ви руфуна авайди – сифтебурун ва эхиримжибурун пачагь я», - дуьзар хъувуна ада. «Вун вуж я?» - хабар кьуна Аминади. «Шис пайгъамбар», - жаваб гана ада. Пуд лагьай вацра Нугь пайгъамбар атана ва адани Аминадиз и шад хабар гана. Кьуд лагьай вацра Идрис пайгъамбар атана, гуьгъуьнин вацра – Гьуд пайгъамбар , ругуд лагьайди – Ибрагьим Халилуллагь , ирид лагьайди – Исмаил Забигьуллагь , муьжуьд лагьайди – Муса ва кIуьд лагьайди - Иса Ругьуллагь . Абурукай гьар сада Аминадиз мубаракна ва адан руфуна авай гада – пайгъамбаррин муьгьуьр я лагьана.

Раби аль-авваль вацран 12-юкъуз инсанриз Аллагьдин ﷻ хазинайрин хазина къалурна. Халикьдин ﷻ сирлу нурдин вилик квай перде къакъудна ва чилни цавар ишигълаван хьана. Цавай малаикар эвичIна, абурун гьар садан гъиле пайдах авай. Малаикри чпин гъилералди пуд пайдах акIурна: рагъакIидай пата, рагъэкъечIдай пата ва Кябедин къавал. Цава авай гъетер агъуз куьрс хьана ва алемдиз куькIуьрнавай чирагъриз ухшар хьана. Цавар ахъа хьана. Багьа къванерин (зубаржат ва якъут) лувар квай къушарин луж атана. И иер къушарин акунра аваз малаикри Аминадин кIвал элкъуьрна кьуна ва ТIагьа ﷺ дуьньядиз атунал шадвал ийиз, экв жедалди, Кябедал хьиз, адал элкъвез хьана.

Амина кьилди кIвале авай, гьавиляй ада перишанвал ва къалабулух синемишзавай (гьиссзавай). И вахтунда адаз цава къизилдин зунжурар галай гимишдин гичинар гвай малаикар акуна. Цихъ къанихвал гьиссна, ада гъил яргъи авуна, гичинрикай сад къачуна ва икьван гагьди чин тийидай живедилай къайи затI хъвана. Адан цихъ къанихвал кьена, адаз регьят хьана, амма кIвале ам кьилди хьуниз килигна, адан рикIе гьеле секинсузвал амай.

И арада адан патав гьич такур хьтин иервал авай са шумуд дишегьли атана. И гьуьрийрин арада, залум Фиръавана азабар гана кьейи Асиятни авай. Лагьанва хьи, Аминадин аял кьабулайди гьа Асият я. Маса жуьрени ава, адал асаслу яз, адан аял Абдуррагьман ибн Авфан диде Аминади кьабулна.

Амина Женнетдин гьуьри-перийрин арада авай вахтунда, адан тIалар къати хьана. Гьасятда лув гана са чIехи иер къуш атана ва вичин цIакулар Аминадин руфунихъ галукьарна. Агьмад ﷺ хайила, Аминадиз малаикди лагьай: «Рагьимакиллягь» (Аллагьди ﷻ вун вичин регьимдик кутурай) гафар ван хьана.

Гьабибуллагь ﷺ гьуьлуьн кIане жедай гевгьер хьтин михьиди яз хана, адан чин ацIай вацраз ухшар тир. Хьанмазди ада такбир кIелна (Аллагьу акбар), саждадиз фена Мергьяматлудаз шукур авуна, Адавай вичин уммат Жегьеннемдин цIукай хуьн тIалабна. Халикьди ﷻ и йиф Лайлат аль-Къадрдин йифелайни багьади яз авуна.

Чун, вичин умматдилай гъейри маса са затIунини рикIик секинсузвал кутан тийизвай ва вич дуьньядиз атанмазди адакай къайгъу чIугваз башламишай Гьабибдин ﷺ уммат хьуниз килигна, ша чун адан гьуьрметдай кIвачел къарагъин. Чи патай Агьмад ﷺ патал им гъвечIи кар я, вучиз лагьайтIа Аллагь Таалади Вичи ам виниз акъуднава.

Чавай Шафидиз ﷺ, вич патал вири махлукьат халкьнавай, лазим къайдада чухсагъул малумариз жедач. Чавай гьуьлуьн кIане авай гзаф багьа шейиниз лайихлу къимет гуз жедач. Ам регьим яз ракъурнавай Пайгъамбар ﷺ хьуниз килигна, чавай жедай къайдада чна адан тарифар ийин.

Маргьаба, Гьабибуллагь, маргьаба, Нуруль-гьуда,

Маргьаба, Гьабибуллагь, маргьаба,

Иззуль-араб,

Маргьаба, Гьабибуллагь, маргьаба, Абуль-Къасим,

Маргьаба, Гьабибуллагь, маргьаба,

Абу ТIаййиб.

Маргьаба, Гьабибуллагь, маргьаба, Ни`матуллагь,

Маргьаба, Гьабибуллагь, маргьаба, Ругьуль-Къуддус,

Маргьаба, Гьабибуллагь, маргьаба, Айнуль-Иззи,

Маргьаба, Гьабибуллагь, маргьаба, Айнуль-Наим.