Уьмуьр лап ширин я, ажал — туькьуьл
Эй, инсан!
Эй, инсан, гьахьмир вун хиялриз дерин,
Дар жемир ара ваз цавунни чилин.
Дад акваз гьар са няметдин ширин,
Руьгьдиз сабур гуз, ая жув секин.
Халкь авур Халикьди халкьна вун, инсан,
Дуьнья язва ваз вад йикъан мугьман.
Кьисметдал рази яз, уьмуьр хьухь масан,
Физ тахьуй дуьньядай гвачиз вун иман.
Шадвал ая чилел-цавал, гъетерал,
Гатфарин багъда — гуьзел цуькверал,
ЭкъечIиз акIизвай ракъинал, вацрал,
Куьруь легьзеда яргъи уьмуьрдал.
Рагъ, варз акунал шад хьухь вун, инсан,
Тамам тIебиатда жерид туш нукьсан.
Ашукь яз тIебиатдал гуьзел-гуьлуьшан,
Руьгьдиз гуз майдан гьала на девран.
Вилериз аквазватIа дуьнья гуьлуьшан,
Япаризни къвезватIа шад сесерин ван,
Кьилини кьатIузватIа писди ва хъсан,
Гьамни ви са бахт я, рази хьухь, инсан.
Эй, инсан, уьмуьрдал жемир вун пашман,
Руьгьдин хиялдайни тахьуй вун яван.
Рази яз кьисмет хьай паюнал жуван,
Кечирмиша уьмуьр, рикIиз гуз майдан.
Дуьнья мублагь я — гуьзел-гуьлуьшан,
Ам дар ийизвайди инсан я, инсан.
Мублагь уьмуьрдин жеч гьисабиз сан,
Эгер, инсан, вакай тахьайтIа шейтIан.
Эй, инсан, жемир вун акьван такабур,
Дуьшуьшдайни квадармир на жуван сабур.
Четин ятIани, хуьз алахъ жуван абур,
ТахьайтIа язва вун запундин куркур.
Уьмуьр лап ширин я, ажал — лап туькьуьл,
Нукьсанри инсанар ийида сефил.
ЯтIани уьмуьрдихъ галамаз са вил,
Дегишариз фейид я несилри несил.
Хъваз кIан ятIа ваз уьмуьрдин шуьрбет,
Шад жеривал руьгь, хкажиз гуьгьуьл,
Жувани ая хатур ва гьуьрмет,
Жув хьана кIан я атир гудай гуьл.
Эгер ви руьгьда авачтIа майдан,
Каинатдани гьакьич ви виждан.
Гьисс авуначтIа вуна муьгьуьббат,
Уьмуьрдин дад на акуна бажагьат.
Хайи диде ваз хьаначтIа масан,
РикIелай фида ви хайи Ватан,
Эгер къилихда аватIа нукьсан,
Бахтлу уьмуьр на гуьзетмир, инсан.
Гьич са чIавузни акъатич гуьлле,
Фикир адакай хьаначтIа кьиле.
Жедач гьакIа садрани дяве,
БашламишдачтIа руьгьда ва рикIе.
Эгер ви тарци гузвачтIа бегьер,
Алахъмир чуьхуьз хилер ва пешер.
Дувулриз килиг духтурдин тегьер,
АватIа гьанава азардин зегьер.
Сефибег Гьажибегов
Кьудар
***
Темен гузва марфади чилиз,
Чил хъуьрезва милиз-милиз.
Инсанарни гьейран жезва,
И сегьнедиз килигиз.
***
Сифтедай, дуст кас, лам туна цура,
Агал ая рак, яна хьиз тIапIар.
Авачиз кIусни рикIе шаклувал,
Аллагьдал ахпа ая ихтибар.
***
Хьун паталди тапархъан
Ваз ви уьмуьр амай кьван
Бес жезва са сеферда
Са таб авун нагьакьан.
***
Мийир куьне хъуьтIуьн тариф,
Вахт алукьна акъатдалди.
Кавхадинни гьа тегьерда,
КIвалахдилай алатдалди.
***
Дустар цIуд ава захъ, душманар — цIусад,
Вад тIуб хьиз чида заз абур гьарма сад.
Тийижирди заз я анжах са кар:
Вуч ятIа чидач угърашрин макьсад.
***
Зи багъри халкь кьегьал халкь я,
ВикIегь халкь я гьар са кардиз.
Чи къанунни дуьзвал — гьахъ я,
Вафалу жедай, Эмин хьиз, ярдиз.
***
Кимел атана са къуз ламраллаз наиб, —
Са шумуд хуьруьнни райондин сагьиб,
“Ламрал акьахун ятIа эгер са айиб,
ЭвичIун я лугьуз кьвед лагьай айиб”.
***
Мисал ава, дуст кас, ихьтин:
Буш чувал гьич тик акъваздач.
Ватандихъ чан кузвай касдин
Жизвидилай рикI акъваздач.
***
Вири жемят — чуьлда, Али кIвалева,
И гьал акваз, хуьруьн кавха хъилева.
Али хьтин темпелриз, дуст, къурху гуз,
Къамчи, адан гъиле къугъваз, цавава.
***
Са бязибурук, кьаз чеб тамам арифрай,
Са хесет ква акъваз тийиз тарифдай.
Ахьтин инсан, шак алачиз, кьазва за
Инсанвилин барадай лап зайифдай.
***
Жанавурдиз гьикьван кIантIан тIуьн це на,
Туьмер ийиз, чан-рикI ийиз, хуьн це на,
Ам килигда вичин багъри ерийриз,
На ийизвай туьмеррикай куьцIена.
***
Куьрпе къвезва гунагь квачиз дуьньядиз,
Дири жезва, фад-фад къвезва арадиз.
Ахпа анжах, чун — чIехибур себеб яз,
Гунагьрин сан кIватI жезва харадиз.
***
Я саил кас, я язух кас, авара,
Къушраз ава муг, севрез — магъара,
Вахъ мус хьурай ви кIвал, ви югъ,
Уьмуьрдикай куьцIенвай фугъара?
***
Марифатлуди хьайитIа инсан,
Диде-Ватандал рикI жеда адан.
Булахдин яд хьиз, михьиди жеда
Ватандин вилик ягь-намус, виждан.
***
Къе кациз, дуст, кьиф кьун паталди
Гун тавуртIа тIуьн тухдалди,
Алачиз рахун, за ваз лугьун,
Килигда ам ваз ажугъдалди.
Майил Эфендиев
