Цlийи Филерин хуьре диндин межлис

Мегьарамдхуьруьн райондин Филерин хуьре мавлид-межлис кьиле фена.

Къуръандин чlалар кlелуналди ачухай мярекатдал сад лагьай гаф Кьиблепатан Дагъустанда РД-дин Муфтиятдин векил Рамазанов Къурбаназ гана. Ада алай аямдин хаталувилерикай мукъаят хьунин важиблувиликай насигьат авуна.

Гуьгъуьнлай Дербент райондин Белиж хуьруьн имам Гьабибов Ризван рахана. Ада мусурмандин буржийрикай ихтилат авуна.

Ахпа Дагъустандин Огни шегьердин са жуьмя мискlиндин имам Гьуьсейнов Нурудиназ гаф гана. Ада вичин вяз мавлиддин лайихлувилериз талукьарна.

Адалай кьулухъ Стlал Сулейманан райондин имамрин Советдин председатель Рагьманов Шамил рахана. Ада веледриз диндин тербия гуникай ва диде-бубайриз гьуьрмет авуникай насигьат авуна.

Гьакlни инал Мегьарамдхуьруьн райондин имамрин Советдин председатель Магомедов Агьмадаз гаф гана. «Ингье шумуд йисар я хьи, «Ас-Салам» газет кхьинал гьалтайла, Цlийи Филерин хуьруь чи районда сад лагьай чка кьаз. Къуй абурулай Аллагь ﷻ рази хьурай», - къейдна Агьмад гьажиди.

Мад инал агъсакъалар – Жабраил, Михаил ва Абдуллагь халуяр рахана.

Эхирдайни Филерин хуьруьн имам Рагьманов Абдурагьманаз гаф гана. Ада межлисдал кlватl хьайибуруз чухсагъул лагьана.

Насигьатрин арайра Гьамидов Ислама мавлидар кlелна.

Къуй Аллагьди ﷻ кьабулрай и менфятлу межлис!