Ам жаваб хьанач
Мегьарамдхуьр «Кьуру къубуди» кьве патал пайнава. Хуьруьн и пад а патахъ галаз алакъалу ийизвайди «Хандин муьгъ» я. Идалай гъейри и дерин кlамун и патай а патаз экъечlдай кlвачин пуд рехъни ава. И рекьерикай сад чи кlвалин патавай, яни виликан Кьадидин багъдай фенвай. Исятда и кlвачин гуьтlуь рекьерихъ виликан шикилар амач, абурукай шегьреяр хьанва.
Кьадидин багъда (исятда адаз Макьарин магьле лугьузва) Загьир халуди райкомдин балкlанар хуьзвай (50-йисара райкомдиз машинар авачир). Ингье, гзаф йисар алатайла, заз Загьир халуди Желил бубадикай ихьтин ихтилат авуна.
– Са сеферда зун ял ягъиз тутун тарцин кlаник ярх хьанвай. Заз куь кlвалин патавай фенвай кlвачин рекьяй тlуз Желил буба къвез акуна. Чи арада танишвал авайди тушир, амма гьакl яргъалай чидай кас тир. Зи къаншардиз агакьайла, я къадаш кас, зун са ни ятlани хъуьчlерикай кьуна къарагъарайди хьиз, сад лагьана кlвачел акьалтна (Михьи ва гьуьрметлу инсан атай чlавуз инсанар чеб-чпелай кlвачел къарагъай вакъиаяр тарихда гзаф хьанва, абур вири Аллагь Тааладин ﷻ эмирдалди жезвай кlвалахар я. Желил бубадин вилик Загьир халу кlвачел къарагъуни адан (Желил бубадин) паквилин шагьидвалзава – ред.). Ада, салам гана, завай хабар кьуна:
– И рекьяй тlуз фейитlа зун Абасан кlвализ акъатдани, чан хва?
Заз Желил буба вичиз тийижир, дар рекьяй фена кlан хьанач. Завай хьайитlа, адаз вичиз регьят хьун патал, за икl лагьана:
– Желил буба, вун машиндин рекьиз экъечl хъувуна, виняй агъуз ахлад. «Хандин муькъвяй» экъечlайла, кьвед лагьай куьчедихъ элкъвена, сурарин хивез кьван алад…
– Вуна гайиди зи суалдиз кутугай жаваб хьанач, чан хва. За вавай хабар кьазва, и рекьи зун Абасан кlвализ тухудани?
– Эхь, Желил буба, инай фейитlа жеда.
– Аферин. Гила дуьз жаваб гана вуна. Валай Аллагь ﷻ рази хьурай! – икl лагьана Желил буба фена.
