Вун и чилел «малаик» хьухь…
Ватан
Садра гузвай уьмуьр патал
Бинедай инсан хъсан я.
Руьгь шадардай девир патал
Жув хайи Ватан хъсан я.
Шуьрбет аваз кьуна гичин,
Пайин ам дустариз вичин,
Мани алаз мецел ширин,
Къугъвадай майдан хъсан я.
Авайла ви регьим рикIе,
Атирар кIватI жеда рекье.
Аферинрай ацIай дере,
Багълар гуьлуьстан хъсан я.
Келлегуьз рекьел жедалди,
Багъри касдив хъел жедалди,
Бахтсуз къвадай сел жедалди,
Гатфарин лейсан хъсан я.
Гъурбатдикай Ватан жедач,
Вахъ рикI кудай виждан жедач,
Яд инсандиз вун кIан жедач,
Чаз чи Дагъустан хъсан я.
Вафасуз мугьманни тахьуй,
Фитнекардин ванни тахьуй,
Ахьтиндаз зун кIанни тахьуй,
Багъри Билистан хъсан я.
ТIалдиз гьар са хъач туш шифа,
Виридакай жедач вафа.
Сад Халикь я чи лап Зурба,
Худадин дарман хъсан я.
Усал крар кьамир гъиле,
ЧIуру гафар тахьуй сиве,
Вун ягъалмиш жемир зерре,
Дережа кьакьан хъсан я.
Хъсанвал чир тежедай кас
Акъуд кIваляй, тагана кьас,
Кьаз тахьурай ада вав яс,
Вафалу мугьман хъсан я.
Фагьум ая кIвалахни кар,
Гумир вуна гъилелай цIар,
ЦIамарикай кьамир къавар,
Са яцIу шалман хъсан я.
Жедалди
Гуьзлемишиз амукьна эл,
Чаз гегьенш майдан жедалди.
Маса дердер эхдай хьи за
ИкI кIеви зиндан жедалди.
Шадвал амач чи Ватанда,
Мус квахьда зурзун зи чандай?
Халис инсан хьана кIандай,
ГьакIан са гьайван жедалди.
Тамам и дуьньяда михьиз
Ислягьвал хьун кIанда рикIиз.
Къадирсузрин гъиле гьатиз,
Какахьай харман жедалди.
Садвал гуда гьар садаз за,
Намус, гъейрат гудач маса,
Хъсанни пис ая чара,
Эхирдай пашман жедалди.
Гишилани амукьуй зун,
Селдин кIаник кумукьуй зун,
Лап токдихъни галукьуй зун,
Алчахдаз мугьман жедалди.
Зегьмет чIугу, азиз дустар,
Михьибур хьуй рикIин къастар,
Гьар сад хьухь куьн бахтун устIар,
Чаз ачух девран жедалди.
Хъсан я
Чарадан дерт жуванди хьиз,
Чир хьухь, дустар, кьун хъсан я.
Адан шадвал жуван рикIе
Ашкъидалди цун хъсан я.
ЧIуру фикир рикIе твамир,
Ви рикI михьи хьун хъсан я.
Ваз писвилер авуртIани,
Адан тай тахьун хъсан я.
На ви рикIе инсан патал
Гьамишалугъ чимивал хуьх.
Пехилдан тай тахьун патал
Жув михьиди хьун хъсан я.
Чилел малаикар алач,
Вун и чилел «малаик» хьухь,
Гьар садаз вун кIан жедайвал,
Мез ширин рахун хъсан я.
Тамам михьи тум цайила,
Бегьерарни артух жеда.
Вафасузар аквадалди,
Валлагь, гьич такун хъсан я.
Къараткен цаз аквадалди,
Цуькведавай таз акурай.
Вич туькьуьл емиш жедалди,
Са затIни тахьун хъсан я.
Гьуьрмет, хатур паюн патал
Вун и чилел атайди я.
Берекатдин гьар камуник
Жуван пай кутун хъсан я.
Туькьуьл мезни чIуру рикI гваз,
Пеле яхцIур бириш аваз,
И пак чилел къведалди, ваз
Чилин кIаник фин хъсан я.
Багьа нямет
ГъвечIи бала дидед хурал,
БицIи пацар эцигна,
Нек хъвадайла, мад адалай
Багьа нямет ава жал?
За хайи тир дагъдин хурал
ЧIехи пацар эцигна,
Яд хъвадайла, мад адалай
Багьа нямет ава жал?
Абдурагьман Межидов
Хъсан туш
Гьар вуч валай алакьдатIа, хъсанвал
Авуналди, къалур жуван инсанвал.
Нубат аваз, гьатта нубат авачиз,
Мумкин я жув-жував гваз ва я гвачиз,
Са чIавузни дамах авун хъсан туш!
Вуна дамах авуртIани, тавуртIан,
Вун вуж ятIа аквазва лап хъсандиз.
Ви артухвал вирибуруз такуртIан,
Вал пехил яз, са бязибур дакIуртIан,
Са чIавузни дамах авун хъсан туш!
Вун, ви иеси, аферин ви крариз,
Хкаж хьанва вун мурадрин гурариз.
ЧIулав ятIан, рехи янатIан чIарариз,
Жув адетдин кас яз хуьнуьх залан туш.
Са чIавузни дамах авун хъсан туш!
Зазни чида, квезни
Зазни чида, квезни чир хьухь,
Дуьнья гьа икI амукьдач.
Гьар са касдихъ жуван сир хьухь,
Сирсуздахъ рикI амукьдач.
Зазни чида, квезни чир хьухь,
Чи къадим тир тарихар.
Гьар къеле гьар са хуьр хьухь.
Абур мягькем хуьнуьхар.
Квезни чида, зазни чида,
Ватан гьихьтин затI ятIа.
Ватан ахьтин касди хуьда,
Гафни карни сад ятIа.
Квезни чира, зазни чир хьуй,
Гележег чи гьикI жеда.
Къелеяр чи гьар са хуьр хьуй,
Гьана куз зи рикI жеда!
Диде-буба рекьидач
Диде-буба, хайи ватан, жуван чIал,
Са алемни, са цавни, са чил хьиз я.
Чир хьунухьни, жув дуьньяда авай чIал,
Сагъ беденни, дуьз кIвалахдай кьил хьиз я.
Дидеярни, бубаярни вахтуналд,
Яшамиш жез халкьнавайбур ятIани,
Чун таъминрун хиве авай бахтунал,
Мажал авач, къалабулух кватIани.
ЧIал амай кьван диде-буба амукьда,
На некIедихъ галаз хъвайи, аял яз.
Амай вири чIалар, са кIус кьулухъда,
Дидедин чIал рикIе авай хиял яз.
Акьахдайла вун чIаларин гурарай,
Ширин мецел рахаз гьар са чIаларал.
Эвел камар къачу лезги кIарарай,
Ахпа хкаж жез алахъ вун цаварал.
Хайи дидед чIал алудна рикIелай,
Масадакай диде жедач кьвед лагьай.
Авам жемир, алатай кьил кьилелай,
Калун пехърез, чан зи туртур, къвед лагьай.
Сажидин, на вучиз чинар кузватIа?
Дидедин чIал - рикI акъудич хурудай.
КIанзаватIа, тербия гуз гатIуниз,
Са-са чIар куг, акъудиз ви чурудай!
