Шукур ая Аллагь Тааладиз!
Агъа Стlалар
Шегьре рекьяй физ хьайитlа,
Эрчlи патахъ вил вегь вуна.
Аквада кьакьан тепед чина
Пуд Стlалар экlяй хьана.
Мублагьвилиз авач кьадар,
Берекат авай салар-багълар.
Гьа багълара чlехи хьайи,
Шаиррин хуьр я Стlалар.
Дамах ийиз жеда вавай,
Игитар хайи хуьр Стlалар.
Ата-бубайрилай чаз амукьай,
Ядигар я Агъа Стlалар.
Куьн зи чlалахъ хьухь, инсанар,
Мурк я къайи булахар.
Кlантlа кьан чна гьуьжетар –
Булахрин макан я Стlалар.
Хабар кьуна хци бубадивай:
«Вучиз хуьруьн тlвар я «Стlалар»?»
Жаваб гана лап рикlивай:
«Гьакl аквазвай яргъарай».
Кьакьан живед дагъларай,
Акурла чилин къазмаяр,
Инал-анал эцигай,
Малар хуьзвай тевлеяр.
Чкlана гафар сивяй-сивиз,
Ухшар я марфад стlалриз.
Бегенмиш хьана стlалвийриз
Гайи тlвар хайи ватандиз.
Гила еке я Пуд Стlалар,
Шегьерди хьиз гузва нурар.
Акуна кlан ятlа булахар,
Жагъура машгьур «Кпул ятар».
Бая заз кхьей цlарар,
Рикlе аваз жегьил вахтар.
Диде-ватан Агъа Стlалар,
Бахшзава квез за и гафар.
Эвер тавур мугьман
Вацlу тухуз хьайитlа инсан,
Акьван рикlиз жедач залан.
Эвер тавур жемир мугьман,
Ви дердиниз жагъич дарман.
Кlвалин иеси лал хьайид хьиз,
Ацукьда вав рахан тийиз.
Вун элкъведа лап гьайвандиз,
Ийир-тийир квахьда михьиз.
Кьепlербан хьиз элкъвейтlан эгер,
Иесидиз акуй лугьуз.
Акьалда ада вичин вилер,
Вун фад инай квахьуй лугьуз.
Эвер тавур жемир мугьман,
Фунни вилик гъидач яван.
Рахайтlан вун лугьуз «чан-чан»,
Аквадач ваз къулал чайдан.
Хабар кьадач хизанрикай,
Жува авуртlан ихтилат,
Жаваб акъатич кьурай сивяй:
«Никай я ви агьвалат?»
Гьи дафтарда кхьин ви тlвар,
Эгер чизмачтlа четин вахтар.
Дарда авайла ви хизанар,
Вуж тир гайиди хапlаяр?
Вуна куьмек низ ганатlа,
Гьадаз мугьман жез тахьурай,
Гъалатl хьана акъатайтlа,
Варар гатаз гъил тефирай.
Эвер тавур мугьман жемир
Гзаф залан дерт жеда, дуст,
Гьахьтин кlвалин вар гатамир,
Агал хьана амукьдай, дуст.
Аллагьди Вичи яргъаз авурай,
Къадир авачир инсанривай.
Кlан хьайитlан дуст кьаз жедач,
Бул хапlаяр акурбурукай.
Амукьда жад кьакьан дагълар,
Къван къванцелай алатайла?
Четин жечни инсанд гьалар,
Мукьва-кьили къакъатайла?
Мумкин я, дуст, и шиирдай,
Са нин ятlан суфат акун.
Бейкеф жемир, шаир я зун,
Шаирд рикlе авач къанун.
Сусанна Мамедова,
Дагъустандин Огни шегьер.
Чир хьун кIанда!
Лезги чIалан гафарганда
Лезги гафар аваз кIанда.
ЧIал къайдада хьунин карда
Дидед чIал чаз чир хьун кIанда.
Рахадайла дидед чIалал,
Къерехзава хейлин гафар.
Куьгьне хьана лугьуз абур,
Квадарда лугьуз чIалан абур.
ИкI амач чахъ “рухсат, муьгьлет”,
“Отпуск” хьанва гила адет.
Лугьузмач мад чна “къелем”,
“Ручкадалди” жезва бегьем.
Къуллугъдани идарада
Амач эсиллагь “тенефус”.
“Перерыв” лугьуз и барадай,
ТIвар ганва нисинин чIавуз.
“БирбицI” амач, “справка” я,
Дуьз хъувунни “поправка” я.
“НукьтIадикай” хьана “точка”,
“Челегдиз” лугьузва “бочка”.
Виш йисакай - “асирдикай”,
Шак аламач, хьанва къе “век”.
“Буйругъдикай”, “эмирдикай”
Амайди са “пирказ” я тек.
“Гуьзетзамач” я “гуьзлемиш”,
Буьркуьллагь мад чна “нубат”.
“Пастаянна” из башламиш,
“Только очередь ожидать”.
Худ дегишиз чIалар, гафар,
“Аскердикай” хьанва “солдат”.
“Животновод” хьана “малдар”,
ЧIал, гьайиф хьи, жезва барбатI.
“Пер” лугьур гаф чизмайди туш,
“Лопатка” чаз хьанва къе хуш.
Бес никIиз пер ягъун патал
КIвалахдани лопаткадал?
Лукьман, “гьаким” мад чахъ амач,
Герек я чаз “доктор, врач”.
“Диде-буба” - “маман, пахан”
Им вуч гьал я, ай дад аман?
Я юлдашар! Я эгьлияр!
Ша чIал зай тийин, лезгияр!
Чи рагьметлу Сулеймана
ЧIур тийин чаз тур весияр!
СтIал буба Сулеймана
ЧIал къайдада хуьн паталди
Лагьай гафун къуват - мана
Гужлуди я къенин къалди.
Ана авай насигьатар
ЧIал пак хуьнин язва шартIар.
ЧIехи устаддин теклифар
Кьуна кIанда чна пайгар.
Авун фикир тушир эзбер
ЧIехи Сулейманан эсер.
Бес чи чIалан чIуру тегьер
ГьикI терг ийин чна мегер?
И гафарин язва мурад
Дидед чIалан чир хьун чаз дад.
Дуьз ачухиз гафун макьсад,
Гьарма сад жен чIалан устад.
КIанда рикIиз чIалар чириз,
Дидед чIалан хьунухь Гьафиз.
ТахьайтIани вакай хафиз,
Жуван чIал ваз чир хьун кIанда.
Дидед чIалан гафар инкар
Авун дуьз туш, азиз дустар.
Чир тахьайтIан маса чIалар,
Жуван чIал чаз чир хьун кIанда.
Урус чIалаз туш зун акси,
Ам зи рикIиз язва багъри.
Гьамишалугъ а чIалал зун,
Шак алачиз, я хьи рази.
Урус чIал я зи эрзиман,
Алцумиз жеч къуват адан.
Ада лувар кутур инсан
Жезва цаварин пагьливан.
Урус чIал зи хуш я рикIиз.
КIанда мад заз гьакI ингилис.
Испан чIални хьайтIа чириз,
Лугьун, дустар, жедачир пис.
Ажеб жедай чир хьанайтIа
Грек, китай ва я хинди.
Амма, дустар, дуьз лагьайтIа,
РикIиз чими чIал я лезги.
Дуьньяда авай кьван чIалар
Сад Аллагьди миллетдиз гьар
Пишкешнавай я савкьватар, -
ИкI лугьуда за квез, дустар.
ЧIехи, гъвечIи хьуналд миллет,
Эцигиз жеч чIалал къимет.
Хазина я чIал миллетдин,
Авачир тешпигь девлетдин...
