Насигьатдин чlалар

К. И. Атакишиева

Зи тIалабун

Чун Аллагьдин рекье хьурай,

Адан тIвар чи рикIе хьурай,

Чи кьил даим вине хьурай,

Ля илягьа илля Ллагь.

Кьисмет тахьуй чаз гьич гьарам,

Уьмуьр жервал чи лап хуррам,

ГьакI хьурай ам мадни давам,

Ля илягьа илля Ллагь.

Гунагь крар такIан хьурай,

Чаз чIехи тир иман хьурай,

Диндикай чаз дарман хьурай,

Ля илягьа илля Ллагь.

Гьажимегьамед Гьажимегьамедов

Дустуниз

И дуьньядал кьве шартI кими я:

Акъудна рикI къалур жедач,

Вирибурун арада инсан я лугьуз,

Ахмакьдални крчар жедач.

Вун бахтунихъ къекъвезва,

Бахт гьа ви гъилева, дуст.

Туна къене рикI, чIугу зегьмет,

Вахъ фагьумдай келле ава, дуст.

Зегьметди инсан гуьрчегарда,

Къени мураддихъни агакьарда,

Гьуьрмет, хатур, берекат,

Хъсан кIвалах ийиз, ая гьерекат.

Гьуьрмет хатур кIвалени,

Патални ваъ лугьумир.

Сабурлу яз, викIегь хьухь,

Жув усалдиз къалурмир.

Фитне, шикаят, инсансузвал, –

Абуруз мукьва жемир вун,

Къалура жуван инсанвал,

Виридан гъилерал жеда вун.

Дуьньядилай къачуна гъил,

Дидедилай алуддач вил,

Акъат тийиз, гьатна рикIе,

Гьакьван ширин я заз Диде.

Минетзава за квез, балаяр,

Дидед хатур хамир куьне.

Дидед зегьмет пара я чал,

Мет яна хуьз кьепIин кIане.

Дергес кьуна, векье хьана,

Мукал гъилеваз никIе хьана,

Зегьмет чIугваз, кIвенкIве хьана,

РикIелай фидач азиз Диде.

Хвена чун на шарагар хьиз,

Ава гила асланар хьиз,

Къурбанд хьурай гьа ви рикIиз,

Азиз Диде, масан Диде.

Гьуьрмет ая!..

Сагълам беден гурай ман квез,

Ширин хьурай рахадай мез,

Гъавурда акьукь, минет хьуй квез,

Гьуьрмет ая кьуьзуь касдиз.

Кьуьзуь хьайила, як жеда буш,

РикI сефил яз, гьални нахуш,

Къуллугъда акъваз, жедайвал хуш,

Гьуьрмет ая кьуьзуь касдиз.

Кьуьзуь кас хьайила кьиле,

Гьуьрмет, берекат жеда кIвале.

Гайи насигьат кьуна кьиле,

Гьуьрмет ая кьуьзуь касдиз.

Ваъ лугьумир лагьай кIвалах,

Кьуьзуь касдал ийин дамах,

Ам я хьи чаз кIвалин даях,

Гьуьрмет ая кьуьзуь касдиз.

Дидени буба гьалтай бере,

Кьил агъузна гьатмир рекье,

Гьекьед стIалар авай пеле,

Гьуьрмет ая кьуьзуь касдиз.

Яраб квехъни рикI авач жал,

Кьулаба акъвазмир рекьин юкьвал,

Ажал алайд я япун кIанел,

Гьуьрмет ая кьуьзуь касдиз.

Майудин Абдуллаев

ГьикI хьурай?..

Вуч лугьуда къе аквазвай гьалариз,

Бязибуру акъудзавай къалариз,

Дарман жезвач чи дердериз – тIалариз, –

Бес гьикI хьурай чи эхират, инсанар?

Герек чIавуз кIвале куьмек авачиз,

Кандуда гъуьр, целце къафун амачиз,

Жибиндикни ерли кепек кумачиз, –

Бес гьикI хьурай чи эхират, инсанар?

Жегьилриз чи тади гузва чуруди,

Гаф лагьайла, ягъиз кIанда кIурувди,

Гагь дуьздалда лацу кIараб хурудин, –

Бес гьикI хьурай чи эхират, инсанар?

Инсанвилин квадарзава ухшарни,

Гъуьлуьз физмач чи са бязи рушарни,

Кьурада, валлагь, яд хьайи чи вацIарни, –

Бес гьикI хьурай чи эхират, инсанар?

Жеда лугьуз пака хъсан, – гафари,

Хгузмач дад гьатта кIелай гьарфари.

Тади гузва чанда авай дердери, –

Бес гьикI хьурай чи эхират, инсанар?

Пара хьанва тапарарни гьиллеяр,

Бязибуру квадарнава келлеяр,

Бязибуруз илив жезва къелеяр, –

Бес гьикI хьурай чи эхират, инсанар?

Са кас…

РикIик чIуру хиялар кваз,

Вичив алчах амалар гваз,

Вири рекьер терс аквадай

Са кас гьалтна зал са чIавуз!

Гаф лагьайла, гьарай ийиз,

Хкаждай кьил вичин виниз,

Дуьзенадив рахан тийиз,

Са кас гьалтна зал са чIавуз.

Чидач адаз мукьва-кьили,

Чун акурла жезва дили,

Чапхунзава а кьве гъили,

Са кас гьалтна зал са чIавуз.

Къекъведайла ам а тегьер,

На лугьуди, кас я сердер,

Чиляй физва шалвард кикер,

Са кас гьалтна зал са чIавуз.

Абдулашим Гьажимурадов

Муаллим

Буйдин гуьзгуь туштIани вун,

Йикъа шумуд элкъуьрзава вуна вахъ!

Жуван гъилин, сивин, рикIин михьивал

Ваз кIанзава – тербия хьун гьар садахъ

Ем гуьзетдай шарагри хьиз мукара,

Вал вил алаз, классрава аялар.

Ана жедай алакъайриз тешпигь я

Демди вичи худда тунвай кьавалар!

Гьи устIар я зегьметди шад тийирди!

Ви зегьметди гузва элдиз безекар.

КIанзава ваз ви камара – уьмуьрда

Абур гьар сад хьун Ватандин дестекар.

И дуьньяда чан алай кьван алемрик

Акьул, зигьин, чирвал, гьам чIал, пис-хъсан –

Виридакай ваз пай ганва, эй инсан.

Къадирлу хьухь: чIурмир терез дуьньядин,

Жуван тIварцIихъ таз алахъ са затI хъсан!

Бендер

Акьулдалди ая кар,

Жедач, дуст, ви рикIиз тIар.

Белки, жеда машгьурни

Вири алемда ви тIвар.

***

ТIвал ягъунивай гафариз пара,

Инсандин фикир гьатда гьа гара.

Туьк хьиз къазарин, хуравай гарун,

Гьатна загъамра акатай зурзун.

***

Уьлкве тирвал гьарайда за

Гьахъвал патал Лезгистанда.

Ая кIвалах, алакьдайвал,

Гьарда вичин багъ-бустанда.

***

Ча-а-н лагьайла, ваз акI жемир

Чан гудай хьиз вун патал.

Ваз ийизва ада чан-рикI,

Вичиз къимет гун патал.

Гьарайда за

Са ванцеллаз гьарайда за

Гьахъвал патал Дагъустанда.

Чи са миллет жугъунралди

Чаравунвай Лезгистанда.

Шегьердавай къиметар

Рехъ. Кьуьнтел туьквен –

Мад акъатна рикIяй тIеквен

Ветерандин, хуьряй тир.

Хабар кьазва фан къиметар:

Вилик юкъуз – 37,

Накьан къимет – 38,

Къе лагьайтIа, 40 хьанва.

Хабар кьазва агъсакъалди

Вучиз икI ятIа.

– Кьуьзуь буба, аквазвач ваз,

Хкажнава доллар вич.

Фан къиметни, гьам себеб яз,

Агъуз жедач завай гьич…

Гаф акъатнач,

Кьурана зун.

Себеб сад я –

КIвалах тавун.

Марият Гьажиева

Сифте бала

Чан дидедин сифте бала,

Ви сес рикIин я хьи гъала.

Хурун нефес, руьгьдин гьевес,

Чан дидедин сифте бала.

Амма вучда, масан бала

Фад къакъатна, хьана яргъа.

Ягъайди хьиз бахча цIара,

Къайи хьана кьведан ара.

Чан дидедин сифте бала,

Бубади вун хвена вилив.

Бадедин вун тир хьи билег,

Вахъ гилани вил гала…

Кьегьалдиз

Цавун аршдиз физвай кьегьал,

Виридан вил жеда хьи вал.

Вири крар жеда гьалал,

Жагъайди хьиз, къведа агьвал.

Бахтлу диде я вун хайид.

Аллагь я ваз а бахт гайид.

Даим хьурай кIвале гьуьрмет,

Аквадач гьич са гъвел зегьмет…

***

Гьар жуьредин лифер ава,

И дуьньяда кефер ава.

Гьар инсандихъ дердер ава,

Къекъвей-къекъвей рекьер ава.

Чидач, гьи рехъ я ваз кьисмет,

Хийирлу хьуй физвай сефер.

Маса крар мийир гуьзет,

Бахтари ваз багъишрай хъвер.