Я илягьал аламин!

Я илягьал аламин!

Я Аллагь, Вуна саламат ая чи дуьньяни дин,

Бахш ая тавфикь-тlеат, я илягьал аламин.

Гьар заман Ви лутlфи-игьсан, бул ая чаз, я Муин.

Мягькем ая Вуна чи уьммет, я илягьал аламин.

Чун Ви такъдирдалди, я Рабб, дуьньядиз акъат хьана,

Аси хьана дуьз рекьелай, белки чун алат хьана,

Туба хьуй астагъфируллагь, чаз Вакай рагьмет кlан я,

Гъил къачун ая карамат, я илягьал аламин.

Чун Ви ажуз бендеяр я, я Гъафуру, я Рагьим.

Вун Мукъаддас тир Агъа я, я Гъанийу, я Карим.

Кьисмет ая чаз Ви тавфикьдал, сиратlал мустакъим.

Даим ая чаз гьидаят, я илягьал аламин.

Чаз авач Ваз лайих авай, са амални я Худа.

Тахсирарни хиве кьуна, я Рабби, ида Ваз нида.

Гьар гунагьдилай къачу гъил, аф ая гьар заман.

Я Ви рагьмет бей нигьаят, я илягьал аламин.

Уьмуьр кьудкъад йисав агакьна, динни Исламдал алаз,

Садвилизни гьахъвилиз Ви, игьтикъад рикlе аваз,

Пел эцигна сажда ийиз, Ваз гьар са кар акваз,

Арза ийиз ваз гьар са гьажат, я илягьал аламин.

Чанда гьич такьат амачиз, гьал гила сефил хьана,

Рикlевай яргъи хияларни вири батlул хьана,

Мергьямат кlанз ви къапудал, зун гила саил хьана,

Кlанзавайди Ви рагьмет я, я илягьал аламин.

Анбияйрин авлия Аллагьдин гьуьрметдай панагь,

Куьмек Вун чаз гьар вахтунда, я Зул Жалали, я Аллагь.

Аф ая ви мергьяматдал, гьар са тахсирни гунагь,

Алуд чалай хажалат, я илягьал аламин.

Дари дуьньядай экъечlна, чаз гзаф мукьвал хьана,

Гьич са гьазурвал авачиз, келле буш, мез лал хьана,

Рикl Ви рагьметдин умуддал са кьадар хуш гьал хьана,

Ви умуд я гьакъикъат, я илягьал аламин.

Я илагьи чун Мугьаммад Мустlафадиз ﷺ бахш ая,

Абубакар, Умар, Алиййул мутазадиз бахш ая,

Гьазрет Усман мукаррам, Зул Жалалдиз бахш ая,

Артух ая чаз инаят, я илягьал аламин.

Агьли байти Мустафа гьам, уммагьатул муъминин,

Гьазрет Гьасан, Гьусейн авлад хайрул мурсалин,

Ин ажузбурун жигьетдай мергьямат кlан я якъин,

Кьисмет ая чаз шафаат, я илягьал аламин.

Ви мукъаддас тир каламуллагьдин гьуьрметдай,

Гьар мусибатни бала, чи чандилай на алуд,

Руьгь акъуддай къуз бедендай камил имандив акъуд,

Дади ферьяд ваз минет я, я илягьал аламин.

Жаннатул Фирдавс (Ву)на кьисмет ая чаз, я Раббана,

Жам авуна вири мукьвабурни дустарни гьана,

Ваз я лайих гьар са касди, ийидай гьамдни сана,

Вун я Гудайди саадат, я илягьал аламин.

Я Расулуллагь, ви гьазретдин саламни салават,

Хьуй гьамиша вун я чи малжау я чаз илтифат,

Бахш ая чаз ви мубарак тир шафаатдал нажат,

Я вири алемдин рагьмат, я илягьал аламин.

Я Расулуллагь, тахьайтlа ви назар чун гьикl жеда,

Ви этег кьуна ийида чна Халикьдиз ﷻ нида,

Лутlфи ая чаз гьар заман, чи чанар хьуй ваз фида,

Чун я ви ажуз тир уьммет, я шафиал музнибин!

Алкьадар агьли Мугьаммад я лагьайди и чlалар,

Агакьайла дустунивай илтимас авай са чар,

Ам Мугьаммад я Цумурдилай, афанди зу-штигьар,

Я илагьи-ргьамгьума фи кулли авкъати ва гьин!

Салигьов Селягь гьажи