Аллагьдин ﷻ лукlар бахтлу я!
Аллагьдин ﷻ лукlар бахтлу я!
Алидхуьр
Алидхуьр чаз диде-ватан,
Чаз кӀани вун азиз-макан.
Гьар са кӀвале ви нур хьурай,
Гьар магьледа эквер хьурай!
Ричал ятар дарман я чаз,
Емиш багълар нямет я чаз.
Дагълар, вацӀар авазва чаз,
Берекетар бул хьурай квез!
Дамах я вун Лезгистанда,
Куьре пата луълуъ я вун.
Муьгьуьббатдин нур я вун,
Халикьди хуьй чи Алидхуьр!
Лайих ксар ава хуьре,
Къурбановар, Аминовар.
Тельман муаллим аваз кьиле,
Сагърай лезги хуьр, Алидхуьр.
Гьар са кӀвале шадвал хьурай,
Алидхуьруьн магьледа.
Гьар са варцик мехъер хьурай,
Алидхуьруьн магьледа.
Рушар ава гуьрчегбур,
Хваяр ава викӀегьбур,
Инсанарни хъсанбур,
Вине хьуй куьн, Алидхуьр.
Мурадазни хьанач чара,
Шиир кхьин тавуна.
Къабула хъсандиз куьне,
Алидхуьруьн инсанар.
Лезгистан
Заз кӀанда Лезгистан,
Зун хва я Лезгидин.
Зун шад я Ватандал,
Лайихлу рухвайрал.
Ватан я чи Лезгистан,
КӀвал я чи Лезгистан.
Дагълар я чи Лезгистан,
Далу я чи Лезгистан.
Кьасумхуьр, СтӀал Сулейман,
Машгьур авур вири алем.
Ашукь Саид Кьуьчхуьрви,
Машгьур авур Лезгистан.
Дагълар, багълар, дереяр,
Лезгистандин дамахар.
Тамар, чуьллер, яйлахар,
Лезгистандин иервал я.
Мурад Тагирбеков,
Хив район, Цlийи Фиригъар.
Къурбанд сувар
Йиса садра илифзавай,
Чаз суфраяр дуьзмишзавай,
ШейтIан иблис къакъудзавай,
Къурбанд сувар мубаракрай!
Шад я вири мусурманар,
Къурбандар гуз пайиз паяр,
Аллагьди ﷻ гурай мурадар,
Къурбанд сувар мубаракрай!
Суварин и гуьзел юкъуз,
Цавар-чилер къвазда нур гуз,
Кьейибуруз рагьметар гуз,
Къурбанд сувар мубаракрай!
Сад Аллагьдин ﷻ гьикмет аваз,
Мугьаммадан ﷺ уммат галаз,
Сувабрин девлет аваз,
Къурбанд сувар мубаракрай!
Япараваз зикирдин ван,
Къурбанд сувар гьикьван хъсан,
Кьабулрай гузвай игьсан,
Къурбанд сувар мубаракрай!
Сад Аллагьдиз ﷻ ибадатиз,
Пайгъамбардиз ﷺ салават гъиз,
Суварин капl ада ийиз,
Къурбанд сувар мубаракрай!
И суварар виш йисара,
Кьисмет хьурай шад гьалара,
Дуьньяд гьалар хъсан хьана,
Къурбанд сувар мубаракрай!
Магьмудова Асият,
Мегьарамдхуьруьн район, Къуюстан.
Вучда закай инсан хьана?
Хайи чlал заз такlан хьайла
Вучда закай инсан хьана?
Чара уьлкве ватан хьайла
Вучда закай инсан хьана?
Рикlе дигед тlал тахьайла,
Мецел дидед чlал тахьайла,
Абур-гьая зал тахьайла
Вучда закай инсан хьана?
Нуькlеризни дидедин чlал
"ЦIив-цIив" ийиз ава гьалал.
Чlал квахьайди жеда гьамбал
Вучда закай инсан хьана?
Пехъерикай лацу лифер,
Серкlверикай къизилгуьлер,
Кафейрикай хьайла кимер
Вучда закай инсан хьана?
Хва гьинватlа, руш гьинватlа
Течиз гьарам фу незватlа,
Йифни югъни сад жезватlа
Вучда закай инсан хьана?
Бубадин юрд - пехъерин муг,
Чарадан кьурт - мехъерин муг,
Кlвал-югъ хьайла сикlерин муг
Вучда закай инсан хьана?
Чина Шагьдин гар такьурла,
И накьвадин бар такурла,
Ярдин вилин зар такурла
Вучда закай инсан хьана?
Куьзуьвал хупl иер тушни?
Ашкъи, муьгьуьббат хьайила рикlел, кьуьзуьвал хупl иер тушни?!
Хтул, штул хьайила метlел, кьуьзуьвал хупl иер тушни?!
Кьисмет тахьуй са касдизни "рехи" чlавуз гъариб уьлкве,
Кlвачер хайи хьайила чилел, кьуьзуьвал хупl иер тушни?!
Кьиле акьул, камал авай чи жегьилрив дамах ийиз
Нянихъ хуьруьн хьайила кимел, кьуьзуьвал хупl иер тушни?!
Гьалалвили абур гъида, иер жеда гьар са инсан -
Виртlедин хъвер хьайила сивел, кьуьзуьвал хупl иер тушни?!
Хайи чlалал шад лирлияр лугьузва чи свас-рушари -
Лайлайрин ван хьайла мецел, кьуьзуьвал хупl иер тушни?!
Халкьар вири сад хьун герек, сада-садазни ийин куьмек,
Сад хьиз къимет хьайила винел, кьуьзуьвал хупl иер тушни?!
Эй Шагьмардан, уьмуьр тар я, сад кьакьанди, сад аскlанди,
Кlани майва хьайила хилел, кьуьзуьвал хупl иер тушни?!
Шагьмардан Агъакишиев
Илим
Зи мал, девлет зи илим я чирнавай,
Илим экв я, нур гузавай са ад я!
Язух ам я, авам яз кьил кlирнава,
Илим Кевсер булахдавай пак яд я!
Рикl авуна кам вегьеда мичlериз,
Нур пайда за илим лугьур чирагъдив.
"Нек" чукlурда и чилерал йифериз
Чирна сирер пака йикъан суракьдив.
Гьар илимдин деринвилиз финивай
Хъел къвезава кьатlунрикай заз жуван.
Гъиле ктаб, рикlиз сабур гъунивай,
Экв къвезва зал "мичlивилиз" кьаз дуван.
Гьикьван четин ятlан илим, ширин я
Адан рекьел жуванни гел эцигун.
Инсан ятlа, адан кlвалах чирун я,
Шейтlандин рехъ кlевирна тlвал илигун.
Эй инсанар, рекьера экв хьун патал,
Чирна сирер чун илимдин кукlвал жен!
Гьар легьзедиз вичин къимет гун патал,
Илим кlелна Аллагьдиз чун мукьвал жен!
Уьмуьр, замана...
Вуч куьруь я, шаир, уьмуьр инсандин,
Гатфарикай зул ийизва фелекди!
Гатайтlани вун гарари замандин,
Какур жезвач, вилик физва дуьз рехъди!
Гьикьван йигин кам вегьейтlан агакьдач
Рикlин къене муг авунвай мурадрив.
И фикирри зун секиндиз ахъайдач
Гзаф яргъа мензил ава хиялрив!
Фагьум, фикир гьикьван яргъа къекъвейтlан
Хайи чили гуж гузава зи тандиз.
Дердери зун гьар кьуд патай чуькьвейтlан
Зи пак гьиссер чкlизава ватандиз!
Жув вегьейтlан йифди-югъди цlаяриз
Вучайтlани чlуруз къведа гьар кlвалах,
Гатун юкъуз дуьшуьш жеда къаяриз
Бахтунин чин элкъвезамаз кирс патахъ.
Са зерре кьван бахтни кIанда инсандиз-
Ичlи гъилив дагъ чкадлай юзурда.
Гьалал фу хьуй, неда, валлагь, явандиз,
За къванцикай жавагьирар гьазурда!
Шагьмардан Агъакишиев
Рубаияр
ХьайитIани гъуьргъуь мефтIер уьцIуьриз,
Жедайди туш дуьнья цIийиз туькIуьриз.
Инсанвилин рехъ гадармир, игит хва,
Са гъед хьуй вун, ишигъ чилел куькIуьриз!
ГалачтIани жуван кьулухъ са чIехи арха,
Рехъ гудай туш за далудлай, зун я зи кавха.
Дагъви я зун, дамарра зи къекъвезва вацIар…
Ватан патал герек чIавуз чанни гуда за.
Гьайиф къвемир жуван чанни Ватан патал гуз,
Аслан хьана экъечIа вун душмандин хуруз.
Герек чIавуз игитвилел кьиникь хъсан я,
Агъузна кьил, вегьедалди кIвачерик намус.
Инсан я ман, вичин шадвал, тIал авай,
Гьиссерихъни чпин сирлу кIвал авай.
Мез атIана, кутIунналди гъилерни,
Кьаз жедай туш шаирдин рикI чIал авай.
Вуч гуьзел я! Гьамиша вун жегьил я, дуьнья.
Кlанзавайди тамашдай ваз кьве вил я, дуьнья.
Сад билбил я ви бахчада, садни, есир хьиз,
Буьркьуь яз рикl ви къузадик, сефил я, дуьнья.
Им дуьнья я, вичик умуд кутаз тежедай,
Чкlайтlани, мад кlалубда хутаз тежедай.
Ша, къенин югъ безетмишин гьунаррив жуван,
Уьмуьр - ганвай легьзе я чаз, мад кьаз тежедай.
Вун гъурбатдиз фида - даим кlвал жеда,
Туькlвей хизан, белки, девлет, мал жеда.
Дарихвили ялиз диде-ватандихъ,
Рикlин пата гьамиша ви тlал жеда.
