Эдебият
Мугьаммад ﷺ ашкар
Я Аллагь, за авур ният
Ля илягьа илляЛлагь,
Кьабула ам тирла мурад
Ля илягьа илляЛлагь.
Я Аллагь, зун гьатна рекье
Жуван вилел акун Кябе.
Капl кьабула а Ви кlвале
Ля илягьа илляЛлагь.
Вибур я хьи чилер, цавар.
Вири алем, ракъар, варцар.
Ваз къуллугъдай малаикар
Ля илягьа илляЛлагь.
Беден михьиз къвазна тlарам,
Алукlна за лацу игьрам,
Лугьузва вирида тамам
Ля илягьа илляЛлагь.
Я Аллагь, це чаз къуват,
Ваз кlанидаз гудай къудрат.
Гьам Ви шейхерин берекат,
Ля илягьа илляЛлагь.
Хатур кlани, дердер чидай,
Гьар са нямет вилик гъидай.
Тек са Вун я вири хуьдай,
Ля илягьа илляЛлагь.
Гьикьван рикlер шад хьанва къе,
Кlватl хьайила вири уьлкве,
«Аллагь-Аллагь» лугьуз мецер,
Ля илягьа илляЛлагь.
Ви дустунин гуьзел шегьер,
Эрзиман жез акур тегьер.
Зикир идай ширин мецер,
Ля илягьа илляЛлагь.
Тарифдин гьич авач къадир,
Дин туькlуьрай гуьзел устlар.
Сад ийидай вири халкьар,
Ля илягьа илляЛлагь.
Гьираъ дагъди экв ганмаз,
Пайгъамбардиз ﷺ ахвар акваз.
Къуръан назил хьана хьи чаз,
Ля илягьа илляЛлагь.
Михьи пlирер ви асгьабар,
Акуна чаз авай кьадар.
Къуй хьурай виридаз ашкар,
Ля илягьа илляЛлагь.
Гьакьван гуьзел дараматар,
Мягьтел жедай аламатар.
Чеб шейхерин зияратар,
Ля илягьа илляЛлагь.
Пайгъамбаррин ﷺ гьуьрмет авай,
Чун мусурман
уммат авай.
Гуьзел Къуръан кьисметнавай,
Ля илягьа илляЛлагь.
Чун умматриз зиярат тир,
Гьам еке чаз аманат тир.
Ахъайна чаз Аллагьдин сир,
Ля илягьа илляЛлагь.
«Хвена» Расул Савр дагъди,
Вичин рикlе бала хьтин.
Чазни къе ам я хьи якъин,
Ля илягьа илляЛлагь.
Магъара чаз хьана масан,
Чи Пайгъамбар ﷺ авур мугьман.
Кьил акахьна хъфей душман,
Ля илягьа илляЛлагь.
Гъизва чна михьи рикlел,
Расулуллагь ﷺ элкъвей чилел.
Чи умудар акъуд винел,
Ля илягьа илляЛлагь.
Шейхерин, пlирерин вини кьил,
Галай вичихъ виридан вил.
Мугьаммад ﷺ я ам чи гуьгьуьл,
Ля илягьа илляЛлагь.
Са кьил Сафа, са кьил Марва,
Кьуд виш метр арадава.
Диде фена акваз дава,
Ля илягьа илляЛлагь.
Земземдин яд чиляй ргаз,
Экъечlна аялдив къугъваз.
Шифа хьана Исмаилаз,
Ля илягьа илляЛлагь.
Гьанал дидеди баладиз кlвал,
Эцигна вич Аллагь ﷻ патал.
Халкьар кьватl жез мукьвал-мукьвал,
Ля илягьа илляЛлагь.
Гьам тир Аллагьдин ﷻ къудрат,
Мусурман халкьдиз гайи къуват,
Михьи ийидай инсан-къамат,
Ля илягьа илляЛлагь.
Ибрагьим пайгъамбар я шагьид,
Вичин вилел акур вири.
Зунни хьурай адан муьруьд,
Ля илягьа илляЛлагь.
Мугьаммад ﷺ я чи саллаЛагь
Алайгьи ва саллам, Аллагь.
Эхиратда тир чи панагь,
Ля илягьа илляЛлагь.
Кlеви дуст тир Абу Бакр,
Умарани кlватlна фикир,
Усман, Али сад ийир сир,
Ля илягьа илляЛлагь.
Шукур Аллагь ﷻ, Ви къудратдиз,
Зун гъайи На и къуватдиз,
Килигай Равзад къаматдиз,
Ля илягьа илляЛлагь.
Я Аллагь ﷻ, чаз ая шифа,
Земземдин яд хъвайи ара,
Дердер, гъамар хьана яргъа,
Ля илягьа илляЛлагь.
Рагъни варзни экв гуз цава,
Ишигълу яз Сафа-Марва.
Малаикар хьана мукьва,
Ля илягьа илляЛлагь.
Чун фида Ви кlвализ багьа,
Аваз рикlе дердер зурба,
Я Аллагь ﷻ, чаз Вакай чара,
Ля илягьа илляЛлагь.
ЛаббайкаЛлагьумма, лаббайк,
Вилик ква зун, це На куьмек,
Эхиратда тахьуй гьелек,
Ля илягьа илляЛлагь.
Адам буба, Гьава диде,
Арафатда хьана бине.
Кьисмет хьурай гьар садаз къе
Ля илягьа илляЛлагь.
Ви къванери цуьк акъудна,
Шейтlан-иблисни къакъуда,
Кlанибур На гъиз агуда,
Ля илягьа илляЛлагь.
Чун миллетар гьар рангунин,
Кябедал вири кlватl хьунин,
Вил гала На мурад гунин,
Ля илягьа илляЛлагь.
Гьикьван ава михьи рикlер,
Вавай кlани гьахълувилер,
Жеда хьи На кхьей тегьер,
Ля илягьа илляЛлагь.
Я Аллагь ﷻ, На зи жемятдиз,
Кьисмет ая Кябедал физ,
Гьич са касни мийир ажиз,
Ля илягьа илляЛлагь.
Я Аллагь ﷻ, Сагьиб чилерин,
Тереф хьуьдай дуьз рикlерин,
Михьивал це чаз руьгьерин,
Ля илягьа илляЛлагь.
Я Аллагь ﷻ, кьабула зикир,
Гьар са касдин михьи фикир,
Амайбурузни хьурай чир,
Ля илягьа илляЛлагь.
Гьазур я чун, гьар са гьажи,
Тухуз кьилиз ферз чи буржи,
Суннатдикай хьана гуьзгуь,
Ля илягьа илляЛлагь.
Шад я чун, шад я хизан,
Гуз садакьа, тукlваз къурбан,
Кьилиз фирай мурад хъсан,
Ля илягьа илляЛлагь.
Ви мискlинда ийида тlаваф,
Чи гунагьар ая На аф,
Им я зи эхиримжи гаф,
Ля илягьа илляЛлагь.
Османаз мад амач дердер,
Дадмишна На гайи бегьер,
Акурла и гуьзел тегьер,
Ля илягьа илляЛлагь.
Мичегьви Осман гьажи, 2007-йис.
Сифте гаф
Башламишзава Аллагьдин ﷻ тlварцlелди, Мергьяматлу, Регьимлу тир.
Шукур хьуй вири халкь авур Сад Аллагьдиз ﷻ, Вич тек тир ва шерик авачир.
Салат-салам хьуй Мугьаммад Пайгъамбардиз ﷺ, Аллагьди ﷻ гьидаят яз алемриз ракъурай.
Аллагьдин ﷻ мергьямат хьуй имам Гъазалидиз, вичин уьмуьр Аллагьдин ﷻ рекье серф авур.
Ва кlел авур гьар са муъминдиз, менфят къачур ктабдикай инсанриз.
Къелем кьуна за таржума ийиз «Игьйа улумуддин» ктаб чи халкьдиз.
Дуьа ийизва за къастунал Аллагьдиз ﷻ, менфят хьун патал кlелай инсанриз.
Аллагь ﷻ куьмек хьуй кьилиз акъудиз, гьар са чинин мана таржума ийиз.
Агакьрай зун ниятдив зи тамамдиз, са савкьват амукьун патал чи халкьдиз.
Тlалабун я кlелун гьар са чин тамамдиз, фикир гана Пайгъамбардин ﷺ гьадисдиз.
Илим нур я, илимсуз хьун – мичlивал, аннамиша Пайгъамбардин ﷺ гафар хъсандиз.
Эгер яб гайитlа Пайгъамбардин ﷺ гьадисдиз, акъатда адан гьар са кар кьилиз хъсандиз.
Пайгъамбарар ракъурна Аллагьди ﷻ инсанриз, тухун патал дуьньядин рехъ тамамдиз.
Гьам кьепlинлай башламишна инсандиз рехъ къалурна агакьдалди лакьандиз.
Гьарам-гьалал къалурна инсанриз, галукь тавуй лугьуз гьарам чиз-течиз.
Эгер хвейитlа гьарамрикай юкъуз-йифиз, хъсан жеда эхиратда а касдиз.
Мукьва жемир куьн фитне ксариз, алахънавай сад-садавай къакъудиз.
Ахьтин мез агъу я, гьич шак алачиз, къекъведа ам дуьнья барбатl ийиз.
Эхир жеда хъсан амалар кана михьиз, килигиз амукьда душман хьайи вичин мециз.
Гьикьван инсанар фида Жегьеннемдиз, тербия тагайла чпин нефсериз.
Кьисмет тахьуй, Рабби, гьич са муъминдиз, аф ая На чавай хьайи гъалатlриз.
Килигзава, Рабби, чун Ви регьимдиз, ачух ая, Рабби, Ви регьим муъминриз.
Рустамов Ариф
