Халикьдиз шукур гъваш!
Сад Аллагьди ﷻ, чун паталди!
Чун паталди халкь авуна Аллагьди ﷻ,
Чилер-цавар, кьилел чими рагъ алай.
Эй инсанар! – вучиз жезвач чIалахъди?
Шадвилихъни югъ галайди нагъв алай.
Цав алахьна гуьлуьшан я – гуьзгуь хьиз
Нур гузва къизилди хьиз гъетери
Фикир ая инсан вуна хъсандиз
Аллагь ﷻ тирди и дуьньядин Иеси.
Сагьиб я Ам, гьар са кардин вахтунин,
Гъиле авай вилик финни кьулухъни.
Тестикьарна алад рекьиз бахтунин,
Ша, Женнетдин нефес къачун хурухъди.
Юкъуз-йифиз рикIиз кIанда ислягьвал,
И дуьньядал ганвай куьруь уьмуьрда.
Тух тахьана къуллугърални девлетрал,
Эй инсанар! – вучиз ава чуьруькда?
Мал-девлетни кутягь жеда, чкIида,
И дуьньядал амукьдайди гьуьрмет я.
Шаклу жемир, эхир са къуз рекьида,
И дуьньядилай тухудайди рагьмет я.
И дуьньядал аквазвайди ахвар я,
Сабурлу хьухь, ам Аллагьдин ﷻ кьадар я.
Кьейилахъди тIварар амаз къванерал,
Руьгь хутахда муъминрин цаварал.
Чилер, цавар халкь авунвай,
Я Сад Аллагь ﷻ, я ЧIехиди.
Эхиратда кьисмет ая чаз,
Ви разивал, я Зурбади!
Диндал ша вун!
Куьруь уьмуьр жедалди кьатI,
Пайгъамбардал ﷺ гъваш салават,
Динэгьли хьухь жемир фасад,
РикIяй-мецяй Аллагь ﷻ талгьуз,
ГьикI фида вун мичIи суруз.
Калам-Къуръан я аманат,
Ам ша чна хуьн саламат,
Иблис ятIани вал гьавалат,
Ягъалмиш яз, тахьуй яб гуз,
Уьтквем хьухь! - туш вун ялгъуз.
Сад Аллагьди ﷻ ганва вири,
Диндал текъвез вуч я кими,
Чи уьмуьр я гзаф куьруь,
Девлетдихъ гъил мийир яргъи,
Диндал ша вун! - гъил ягъ хуруз,
Фана дуьнья чаз са вад къан чара я.
Эй инсанар, фикирар чи пара я,
Геж тавуна ферзер вири ада ая,
Эхиратда жедайвал хийир,
Сад Аллагьдиз ﷻ ая зикир.
Авуна на и гафар гьисс,
РикIяй тадиз акъуд иблис,
Ша имандал! - жедач ваз пис,
Вахтар физва адаз яб гуз,
Диндал ша вун! - гъил ягъ хуруз.
Фирдавусдин къацу либас.
Дин Исламдиз кам вегь!
Яргъа хьухь вун шейтIандивай,
Тестикь ая Аллагь ﷻ тирд сад.
Михьи рикIяй, ширин мецяй,
Вун Исламдин рекьиз алад.
Дин Исламдиз гана къимет,
Акъуд кьилиз шартIар вири,
Къазанмиша жуваз гьуьрмет.
Девлет гуда ислягьвили.
И гафариз гана къимет,
Эхиратдиз кIватIа девлет.
И амал на кьун тавуртIа,
Гатада дуст ахпа кьил-мет.
Расулюллагь Мугьаммад ﷺ я,
Сад Аллагьдив ﷻ мукьва тир кас.
Зунни вун хьиз фикирлу я,
Адан рекьиз финиф я къаст.
Пучмир куьне уьмуьр жегьил,
Муъминрив гице на гъил.
Са кIусни вун жедач сефил,
Дин Ислам я бахтунин гьуьл.
Гь. Гьажимагьамедов
Хвейи сивер мубаракрай!
Я гьуьрметлу мусурман халкь,
Аллагь Сад я, Пайгъамбар ﷺ гьахъ,
ЧIехи Ислам галаз хьуй чахъ,
Хвейи сивер мубаракрай!
ЧIехи Аллагь мецел алаз,
Сиверин варз рикIе аваз,
Исламдивай тежез яргъаз,
Хвейи сивер мубаракрай!
Я къурбанд хьай варз Рамазан,
Вуч ширин я азандин ван,
Лезги халкьдиз хьурай вун кIан,
Хвейи сивер мубаракрай!
Я ишигълу Меккадин къван,
Чан сиверин варз Рамазан,
Лезги халкьдиз хьурай вун кIан,
Хвейи сивер мубаракрай!
Сивер хуьнихъ ава метлеб,
Куьруь жеда гунагьрин еб,
Аллагьдикай ﷻ хьуй квез себеб,
Хвейи сивер мубаракрай!
СиратIал муьгъ язва кьакьан,
Сив хвейидаз жеда аскIан,
Куь гунагьар квахьда накьан,
Хвейи сивер мубаракрай!
ЗатIни туша дуьньядин мал,
Валлагь, фида туна мал-кIвал,
РикIел гъана Женнетдин гьал,
Хвейи сивер мубаракрай!
Карвансара Дуьнья я им,
Эхиратда рахадай сим,
Сад Аллагьдиз хьурай куьн чим,
Хвейи сивер мубаракрай!
Сираждинан хуьр я Кукваз,
ПIирер, Шейхер кIанда акваз,
Аллагьдивай ﷻ жемир яргъаз,
Хвейи сивер мубаракрай!
