Чи бубаяр чаз чешне я
Дегиш жезва инсанар
Аквазамач малар, хипер яйлахда,
Гьич саданни рикI амач ca кIвалахда,
Гадайрини, рушари хьиз, дамахда,
Акъатзамач кьил дишидай-эркекдай.
Лугьузамач лазим хьайла акурди,
КIамашдай кьаз хъсан са кар авурди,
Виридаз кIан я гьамиша гьазурди,
Де, гьиниз зун катин, лагь, и уьлкведай?
ЧIехи касдиз гьуьрмет, хатур хъийизмач,
Кимел, кIвале са гьахъ суьгьбет ийизмач,
ЧIехидан гаф гъвечIид япуз гьич физмач,
Къе зайифда кьазавач вич зирекдай!
Накь гъай сусаз хан жез кIан я утагъда.
Агь, и дуьнья физава терс саягъда,
Ких шагь хьанва, билбилар лал я багъда!
Хъийизамач са кар халкьдиз герекдай.
КIвалин къене канаб хуьзва жегьилри,
Вахт тахьанмаз сусар гъизва жегьилри.
Кьил чIурзава интернетдин шикилри,
Крар пара хьанва ви чан гьелекдай.
Вучда закай и дуьньядал атана?
Вучда закай и дуьньядал атана
Куьмек кIани касдиз куьмек тагайла?
Халкьдин рекье чанни гьайиф татана,
Гьуьрмет хуьнин рекье ерли тахьайла.
Вучда закай и дуьньядал атана
Жуваз хизан кутаз алакь тавурла?
Югъди-йифди кефер чIугваз жув хьана
Тек яшамиш хьун заз хъсан акурла.
Вучда закай и дуьньядал атана
Етим инсан кIевяй акъуд тавурла?
Гьар инсандив ширин мецел рахана
Пис крарал вилер акьал авурла.
Вучда закай и дуьньядал атана
Хатадай кьван дидедин рикI хайитIа?
Зи намусда хкахь тийир цIай кьада
Гъейри касдиз эгер зиян гайитIа.
Вучда закай и дуьньядал атана
Дидед чIалан верцIивал гьисс тавурла?
Жуванбурув лезги чIалал рахана
Хаин касдин кьацIай сив кис тавурла.
Вучда закай и дуьньядал атана
Шиирралди рикIер чими тавурла?
Инсаф течиз етимвили гатана
Гьар аялдин вилерал нагъв акурла.
Дегиш хьанва
Папа хьрак фу чразмач,
Эвелан хьиз гам хразмач,
Кьеб эчIягъдай свас аквазмач,
Дегиш хьанва дуьнья михьиз.
Адан крар женни эхиз?
Къе ришветрихъ авач кьадар,
Пул гвачирдаз дуьнья я дар,
Чизмач багъри инсан, дустар.
Дегиш хьанва дуьнья михьиз,
Адан крар женни эхиз?
Катзава эл кIвалахдикай,
Дуст кьунава ялтахдикай.
Гьиниз катин алчахдикай?
Дегиш хьанва дуьнья михьиз,
Адан крар женни эхиз?
Лап «акьуллу» хьанва жегьил.
Залан кардал вегьезмач гъил,
Маса гузва гъилевай чил,
Дегиш хьанва дуьнья михьиз,
Адан крар женни эхиз?
Садбуру къар акъудиз хъваз,
Садбур ава кьатIар чIугваз,
Акъваз женни и кар акваз?
Дегиш хьанва дуьнья михьиз.
Адан крар женни эхиз?
Эй, Владик, санал акъваз
Ша, жемир вун икьван рахаз.
Вуч хьанватIа чизвачни ваз?
Дегиш хьанва дуьнья михьиз,
Адан крар жезмач эхиз.
Сулейман я, Сулейман!
Сулейман Керимоваз
Элдин патай чIехи гьуьрмет къачурди,
Кесиб касдиз гьич далу гун тавурди,
Гьар са карда куьмек ийиз гьазурди,
Чи кьегьал хва Сулейман я, Сулейман!
Хъсанвилер алатдай туш рикIелай,
Элди «сагърай» лугьузва ваз мецелай,
Алатнач гьич уьмуьрдин дуьз цIарцIелай,
Чи кьегьал хва Сулейман я, Сулейман!
Къара-Куьре, къадим Дербент ватан тир,
Лезги чилин гьар чIиб вичиз масан тир,
Чи рикIера къеле хьанва инсан тир,
Чи кьегьал хва Сулейман я, Сулейман!
Владик БАТМАНОВ, РФ-дин писателрин Союздин член, шаир
