Зал чан ала…
Салам алайкум! Зи 21 йис я. Зун 1999-йисуз Сыктывкар шегьерда хана.
Зи дидедал чан аламач. Буба… Адакай заз саки са затIни чизвач. Зун аял чIавуз дидеди заз ам гьихьтин кьакьанди, иерди тиртIа ахъайдай. Мумкин я, зун адаз ухшар я. Мад зи рикIел алама адан тIвар Эльчин Мамедов тирди. Диде руфунал залан хьайила, бубади ам гадарна ва Сыктывкардай экъечIна фена.
Зун аялрин кIвале чIехи хьана. Зун аниз тухвайла, зи вири фикирар кIвализ катуникай тир. Сагъ са йикъара за фикирзавай, гьикI чилин кIаникай рехъ эгъуьндатIа, гьикI жугъундилай вертолётда аваз лув гудатIа… Амма са гадади лагьана хьи, эгер кьуртIа, виридалай пис аялрин кIвализ акъудда. Зи фикирар дидедикайни бубадикай тир.
Ада атана зун хутахун зи мурад тир… ГьакI атана зун къужахламишда ва хутахда… Заз гзаф кичIевилер авай, заз чIехи гадайрихъай, чара итимрихъай кичIе тир. Заз акI авай хьи, эгер заз зун хуьдай буба авачтIа, виридавай зи кефи хаз жеда. Зун гъвечIи чIавуз чи патав са кичIе жедай итим къведай.
Ам пияндиз жедай, заз адахъай кичIе тир ва зун кIевиз шехьиз гатIумдай. Аквадай гьалда, лап кIевиз. Са сеферда ада зи кIвачер кьуна, балкондал экъечIна (чун вад лагьай мертебада яшамиш жезвай), кьил агъада аваз чахчахрилай куьрсарна ва хъел кваз гьарайна: «Лал хьухь, гъвечIи гьайван, тахьайтIа за вун исятда ахъайда ва вуна кIаник лув гуда!..» Дидедиз акуна ва адавай зун къахчуна…
Бес вун гьина авай, зи буба – Эльчин Мамедов? Вучиз 21 йисан къене вуна зун жагъурнач? Заз зун аялрин кIвале авай етим хьана кIанзавачир, амма диде, буба, аялар, кIанивал авай дуьз хизанра хьиз яшамиш хьана кIанзавай. Чи аялрин кIвале гзаф гадаяр ва рушар авай.
Абурун бубаяр Коми Республикадиз къазанмишиз къвезвай. Ахпа гьакI хъфизвай… Амма зун хьтин аялар амукьзавай ва чаз буба авачирди, етим лугьузвай. За лицейда кIелна, армияда къуллугъна, жуван уьмуьр туькIуьриз алахъзава.
Ингье, Эльчин Мамедов, эгер вуна и газет ва зи кагъаз кIелайтIа, ваз чир хьухь зун и дуьньяда авайди. Зал чан ала ва зун яшамиш жеда вири затIарин аксина, чпин аялриз хаинвал авур ва абур гадарай виридаз аксина. Вучиз лагьайтIа захъ Аллагь гала ва Ада зун гадардач.
