Алай девирда вири мумкинвилер ава
Алай девирда вири мумкинвилер ава
«Ас-Салам» газет кIелзавай гьуьрметлу мусурманар! Къе чун Ахцегь районда Дагъустандин Муфтиятдин дишегьлийриз диндиз эвер гунин отделдин регьбер Аликулиева Аминатахъ Тажидинан рушахъ галаз таниш жеда.
- Ассаламу алайкум Аминат вах, сифте чаз куьне куь уьмуьрдин рекьикай ахъайна кIанзава.
- Ва алайкум салам ва рагьматуллагь, 1992-йисуз зун Ахцегьа дидедиз хьана. Хайи хуьруьн мектеб акьалтIарайдалай кьулухъ зун Махачкъалада авай Дагъустандин Исламдин университетдик (ДИУ) кIелиз экечIна. Ана кIелай 4 йисан къене зи вилик чирвилерин ва арифдарвилин цIийи дуьнья ачухна. Ахпа за са йисан къене Къизлярда ДИУ-дин филиалда муаллимвиле кIвалахна. Адалай кьулухъ зун Ахцегьиз хтана, хуьруьнвидиз гъуьлуьз фена ва ина Ислам дин раиж авунин кIвалах давамарна.
- Аминат вах, куьне мусурман вахариз диндин тарсар гуз ингье 10 йис кьван я. Гьихьтин агалкьунар ава квехъ ва вахарихъ и карда?
- Гьелбетда, сифте кьиляй кIвалах ийиз четин тир, тарсариз лап тIимил инсанар къвезвай, амма вахт финивай хъсан нетижаяр арадал къвез гатIумна. Мисал яз, вишелай гзаф вахариз араб чIалал Къуръан кIелиз чир хьана, яхцIурни цIудалай артух дишегьлийри капI ийиз башламишна, къанни вадалай артух вахари жуван гуьрчегвилер чарабурун вилерихъай кIевунин важиблувал гьиссна ва гьижаб алукIна. Алай вахтунда вишни яхцIурни цIуд кьван дишегьлиди Къуръандин ва Ислам диндин бинеяр чирунин тарсар къачузва. Чи дишегьлияр чирвилерихъ къаних я. Алай девирда вири мумкинвилер ава. Гьа жергедай яз диндин чирвилер къачудай.
- Дишегьлийриз диндин тарсар тек са Ахцегьа гузвани, тахьайтIа маса хуьрерани?
- Ахцегьлай гъейри Луткуна, КьакIа, Хуьруьга, Цуругъа ва Хкема тайин тир вахтара нубатдин тарсар кьиле физва. И хуьрера авай дишегьлийриз дин чириз кIан хьана ва чна абуруз гьа карда куьмек гузва.
- Квекай Ахцегь районда Дагъустандин Муфтиятдин диндиз эвер гунин отделдин регьбер хьана ругуд йисалай гзаф я. Регьбер хьайидалай кьулухъ куьне вуч гьиссна ва куь кIвалахда гьихьтин дегишвилер хьана?
- Ахьтин везифа зи хиве гьатай чIавуз за, гьелбетда, еке жавабдарвал гьиссна ва диндин эвер гун генани гуьрчегдиз, арифдарвилелди ийиз алахъна. Шукур Аллагьдиз, зун кьилди авач, захъ и карда куьмекчиярни ава: Ашуралиева Айша, Манатилова Жаминат, Мегьамедкамилова Хадижат, Гьажимурадова Сабина, Бегагаева Саида, Кайинбекова Заира ва мад вири мусурман вахар са гьихьтин ятIани куьмек гузвай. За абуруз виридаз рикIин сидкьидай чухсагъул лугьузва, къуй Аллагь Таала абурулай ва чалай, гьа и газет кIелзавайбурулайни, виридалай рази хьурай! Амин.
Гьа и вахарихъ галаз санал чна мавлид-межлисар, гьижабдиз ва хизандиз талукьарнавай мярекатар, Рамазандин ифтIарар кьиле тухузва. ГьакIни чун санал зияратрал физва, санал ял язавай вахтарни жезва. ИкI хьайила, чи алакъаяр хъсан жезва. Мусурман дишегьлийрин арада садвал хьайила, жемят сад жеда.
- Газет кIелзавайбуруз куьне гьихьтин меслятар къалурда?
- Мусурман патал виридалайни важиблуди – им ихтибар ийиз жедай, диндин илим авай инсанривай чирвилер къачун я. Интернетдай чирвилер къачузвайбур ягъалмиш жезвай дуьшуьшар гзаф я.
Куь гъиле авай «Ас-Салам» газет, дугъриданни, ихтибар къазанмишнавай чирвилерин хазина я. Ам кIелзавайди дуьз рекьел жеда лагьана умуд ава. Аллагь Таалади чаз гайи сифте эмир «кIела» тир. Гьавиляй за виридаз чирвилер къачунин меслят къалурзава. Къуй Аллагьди ﷻ вири мусурманриз кIеви иман, сагъламвал ва кьве дуьньядани хушбахтвал гурай! Амин.
