Калука мавлид-межлис

Калука мавлид-межлис

14-октябрдиз Ахцегь райондин Калук хуьруьн жуьмя-мискlинда нубатдин мавлид кьиле фена. Къейд ийин хьи, и хуьре гьар йисуз Рабиуль-Авваль вацра Мугьаммад Пайгъамбардин ﷺ гьуьрметдай межлисар тешкилзава.

Пак Къуръандин аятар кlелна ачухай мярекат Калукрин имам Байрамов Сулеймана кьиле тухвана. Ада мискlиндиз атанвайбуруз чухсагъул лагьана ва диндар инсанриз Аллагьди ﷻ гузвай сувабрикай ахъайна.

Гьакlни межлисдал Дагъустандин Огни шегьерда авай са жуьмя-мискlиндин имам Гьусейнов Нуруддина, лезги «Ас-Салам» газетдин редактор Амаханов Гьасана, Стlал-Сулейманан районда Дагъустандин Муфтиятдин диндиз эвер гунин хилен регьбер Рагьманов Шамила, Ахцегь райондин Кьакlарин хуьруьн имам Мегьамедов Алиасгьаба насигьатар авуна. Абур хъелзавай инсанар меслят хъувурдаз жезвай еке сувабдикай, мискlиндиз жемятдин кпlар ийиз атунин фазилатлувиликай, Ислам диндин чирвилер къачуникай ва абур халкьдин арада раиж авуникай, Ярагъ Мугьаммад эфендиди тухвай тасаввуфдин (тlарикъат) пак рекьикай рахана.

Насигьатрин арайра мавлидар кlелна ва эхирдайни вирида санал дуьньядин мусурманриз хийир-дуьа авуна.

Къуй Аллагьди ﷻ и межлисдин берекат вири Дагъустандиз чукlуррай!