Багьа ядигарар ЦIийи Къурушдал
Багьа ядигарар ЦIийи Къурушдал
Чаз тарихдай лугьузвайвал, Къурушвияр Меккада авай Къурейшрин сихилдай атанвайбур я. Аллагьдин Расул Мугьаммад ﷺ гьа тайифадай тир.
И мукьвара Къурушрин хуьруьз, ам зияратдиз элкъуьрай Мугьаммад Пайгъамбардин ﷺ, адан хизанрин ва асгьабрин багьа ядигарар гъана. Иниз гъанвайбурукай виридалайни багьа ядигар Мугьаммад Пайгъамбардин ﷺ чlар тир. Гьакlни чи хуьруьз Пайгъамбардин ﷺ гапурар, ада ишлемишай къапар (бадияр), адан руш Фатlимадин гичин, адан уьмуьрдин юлдаш Айшадин гичин, Абу Бакр асгьабдин чукlул, Халид асгьабдин кьеркь (кольчуга) ва масабур гъанвай.
Ядигарар шагьид Мугьаммад Хидирован тlварцlихъ галай мискlинда эцигай кьуд йикъан къене, абуруз килигиз Дагъустандин вири пипlерай мусурманар атана. Гьакlни иниз чи къуншидал алай республикайрай ва Урусатдин яргъал тир шегьеррай гзаф кьадар динэгьлияр мугьман хьана. Абурун къаст – тарихдиз вил вегьин, ядигаррикай чпиз берекат къачун тир.
Хуьре и мярекат кьиле тухун патал Цlийи Къурушрин имам Панагьов Азима са шумуд йисан къене чалишмишвилер акуна, гьикl хьи ихьтин еке бахт тек-бир хуьрериз кьисмет жезва. Эхирни адан мурад кьилиз акъатна. Къурушар икl сейли авур адалай Аллагь рази хьурай ва мадни еке агалкьунар хьурай! Гьакlни Аллагь рази хьурай и кардик чпин пай кутур вири мусурман стхайрилайни вахарилай. Дугъриданни ядигарар хуьруьз гъун ва и кардихъ галаз алакъалу месэлаяр гьялун патал динэгьлийри ва гьукуматдин къуллугъчийри еке зегьмет чlугуна.
Къуй Аллагьди ﷻ чаз Мугьаммад Пайгъамбардин ﷺ шафаат кьисмет авурай!
