Лезги межлис
Махачкъала ва Каспийск шегьеррин арада эцигзавай Иса пайгъамбардин u тIварцIихъ галай руьгьдинни марифатдин макандин (Духовно-просветительский центр) чIехи дараматда жуьреба-жуьре мярекатар тешкилзава. Мисал яз, республикадин шегьерринни районрин векилрихъ галаз гуьруьшар, диндин серенжемар, субботникар, Дагъустандин халкьарин милли межлисар ва масабур. 11-апрелдиз ина лезги халкьдин чIехи межлис кьиле фена. Къейд ийин хьи, лезгийрилай вилик центрадин мулкарал яхул халкьдиз талукьарнавай мярекат тухванвай.
Дагъустандин Муфтиятди тешкилнавай и межлисда вад агъзурдалай виниз инсанри иштиракна. Абурун арада неинки са лезги халкьдин, гьакI мугьманар яз атанвай маса миллетрин векиларни авай. Мярекатдин кьилин макьсад дагъви халкьарин арада авай дуствал, стхавал, садвал мягькемаруникай, акьалтзавай несилриз тербия гунин карда ахлакьдихъ, эдебдихъ авай важиблувал къейд авуникай ибарат тир.
Межлисда иштиракай РД-дин чилерин ва эменнидин алакъайрин министр Заур Эминова къейд авурвал, ихьтин межлисар мукьвал-мукьвал тешкилунихъ еке метлеб ава, гьикI лагьайтIа, абуру сад хьуниз, руьгьдин жигьетдай девлетлу хьуниз, бязи дуьшуьшра чаз бес тежезвай эдебдиз къуллугъзава.
Гьакъикъатдани, и мярекатди лезги халкь сад авуна. Иниз уьлкведин жуьреба-жуьре регионрай, Кьиблепатан Дагъустандай, гьатта къецепатан уьлквейрайни хейлин ватанэгьлияр атанвай. Абурун арада агъсакъалар, дишегьлияр, жегьилар, аялар авай. Абур патал тешкилатчийри саки пуд сятда давам хьайи хъсан, итижлу программа гьазурнавай.
Межлисдин сергьятра аваз «Хайрат», «Нашидуль Ислам» дестейри, Заур Салигьова ва масабуру нашидар тамамарна, аялри шиирар кIелна, викторинаяр конкурсар кьиле тухвана, гъалибчияр савкьватриз лайихлу хьана. Идалай гъейри, иштиракчийрикай пуд касдиз путёвкаяр къугъунин нетижада пулсуздаказ гъвечIи гьаждал (умра) фидай мумкинвал хьана, вири иштиракчийриз чими хуьрекар, дишегьлийриз цуьквер гана.
Межлисдин гьуьрметлу мугьманрин арада Дагъустандин Муфтиятдин председатель Шамил Алиханов, РД-дин чилерин ва эменнидин алакъайрин министр Заур Эминов, РД-дин Халкьдин Собранидин депутат Фирудин Раджабов, РД-дин милли сиясатдин ва динрин крарин рекьяй министрдин заместитель Мурад Шафиев, Кьурагь райондин кьил Замир Азизов, РД-дин государствойрин закупкайрин рекьяй Комитетдин председатель Жафар Гьажибегов, РД-дин Хатасузвилин Советдин Секретардин заместитель Сефербег Гьамидов, гьукумдин жуьребажуьре органрин векилар, писателар, алимар, диндин, жемятдин деятелар, машгьур спортсменар ва масабур авай.
Къуръандин аятар кIелуналди гатIунай межлисдал сифте гаф Шамил Алиханова лагьана. Ада Дагъустандин Муфтий Агьмад гьажи Абдуллаеван патай виридаз мярекат мубарак авуна, лезги халкьдин тарихдай бязи чинар рикIел хкана, жегьилриз бубайри кутунвай баркаллу рекьер лайихлувилелди давамаруниз эвер гана.
Гуьгъуьнлай мярекатдал рахай Мурад Шафиева, Жафар Гьажибегова, Сефербег Сефербегова, журналист Ханжан Къурбанова, алим МугьаммадБукар Гьамидуллаева, Дербентда авай «Женгинин Баркаллувал» музейдин кьилин пешекар Гуьлпери Мирзебалаевади ва хейлин масабуру мярекатдин важиблувиликай, Ярагъ Мегьамедан хайи хуьр авай мискIин арадиз хкуникай, акьалтзавай несилдиз ватанпересвилин, ахлакьдин тербия гунин кьетIенвиликай чпин фикирар лагьана.
Халкьдин межлис иштиракчийри санал дуьа авуналди акьалтI хьана.
МЕГЬАМЕД ИБРАГЬИМОВ
