Хуьруьга мавлид-межлис
16-августдиз Ахцегь райондин Хуьруьгрин хуьре Мугьаммад Пайгъамбар ﷺ хайи Рабиу-ль-Авваль вацраз талукьарнай гурлу мавлид-межлис кьиле фена. Ам хуьруьн имам Абдурагьманов Мугьаммадсабира хуьруьн жемятдин куьмекдалди тешкилнавай.
Адет тирвал Къуръандин келимайралди ачухай мярекат Кьурагь райондин имам Аливердиев Абубакра кьиле тухвана.
Межлисдал сифте гаф Дагъустандин Огни шегьердин жуьмя мискlиндин имам Ражабов Мугьаммадрамазаназ гана. Ада Аллагьди ﷻ инсан вуч патал халкьнаватlа ахъайна. Гьакlни ада мусурмандиз Мугьаммад Пайгъамбар ﷺ кlан хьунин важиблувиликай насигьат авуна.
Гуьгъуьнлай Кьиблепатан Дагъустанда РД-дин Муфтиятдин векил Рамазанов Къурбан рахана. Ада Аллагьдин ﷻ кьадар-кьисметдин арифдарвиликай ихтилат авуна.
Адалай кьулухъ Докъузпара райондин Усугъчай хуьруьн имам, РД-дин Муфтиятдин Ахцегь ва Докъузпара районра диндиз эвер гузвай хилен (отделдин) регьбер Ашуралиев Гьуснудиназ гаф гана. Ада жемятдиз менфят гузвай садакьайрин къиметлувиликай ва халкьдиз хийир гузвайбуруз жезвай зурба сувабдикай ахъайна. Гьакlни ада кlватl хьанвайбурувай хъсан кlвалахар ийизвайбуруз куьмек гун тlалабна.
Ахпа Дагъустандин Муфтиятдин председателдин куьмекчи Омаров Шамилаз гаф гана. Ада халкьдин, иллаки жегьилрин арада раиж жезвай Исламдихъ галаз алакъалу тир бязи ягъалмишвилерикай ихтилат авуна.
Хуьруьгрин имам Абдурагьманов Мугьаммадсабира кlватl хьанвайбуруз хуьруьн мискlиндин тарихдикай чирвилер гана.
Инал рахай Хуьруьгрин кавха Абасов Ризехана межлис тешкилнавайбуруз ва ана иштирак ийиз атайбуруз чухсагъул лагьана.
Эхирдайни Дербент шегьердин имамрин Советдин председатель ва Дербентда авай имам Ярагъидин тlварцlихъ галай мискlиндин имам Шамилов Узаира диндин межлисрин фазилатлувиликай насигьат авуна.
Гьакlни межлисдал атанвайбурун арада кьве умра чип вегьена ва абур Аллагьди ﷻ Вичи кьисметнавай кьве касдиз акъатна.
Насигьатрин арайра Эфендиев Абдуллагьа гуьзел сесиналди мавлидар-нашидар кlелна. Мярекат хийир дуьадалди акьалтlарна ва кlватl хьанвайбуруз виридаз садакьаяр пайна.
Къуй Аллагьди ﷻ кьабулрай и межлис!
