Ашар хуьре диндин межлис
Ашар хуьре диндин межлис
21-июлдиз Кьурагь райондин Ашар хуьре шейх гьажи Абдуллагь эфендидин тlварцlихъ диндин мярекат кьиле фена. Гьажи Абдуллагь эфенди Аллагьдин ﷻ вали (кlани кас) тир, адаз Ашарин агьалийри гзаф гьуьрметзава. Адан пlир хуьруьн юкьвал ала. Къуй адаз Аллагьди ﷻ рагьмет авурай.
Межлис Къуръандин аятар кlелуналди ачухна. Сад лагьай гаф Стlал-Сулейманан районда РД-дин Муфтиятдин Ислам дин раиж авунин хилен регьбер Рагьманов Шамилаз гана. Ада мусурманди йикъанни йифен къене вад сеферда авуна кlанзавай ферз тир кпlунин сувабдикай ва важиблувиликай насигьат авуна.
Гуьгъуьнлай Стlал-Сулейманан райондин имамрин Советдин председатель Омаров Шамил рахана. Ада пlирерикай ва Исламдин тарихдикай ахъайна.
Адалай кьулухъ лезги чlалал акъатзавай «Ас-Салам» газетдин редактор Амаханов Гьасаназ гаф гана. Ада Исламдин чирвилер къачунин ва абур раиж авунин важиблувиликай насигьат авуна.
Ахпа Дербент райондин Хазар хуьруьн имам Рамазанов Къурбан рахана. Ада акьалтзавай несилдиз диндин тербия гунин чарасузвиликай вяз гана.
Межлис Кьурагь хуьруьн имам Къурбанов Юсуфа кьиле тухвана.
Насигьатрин арайра Кьурагь райондин Штулрин имам Керамов Умара нашидар-мавлидар кlелна.
Гьакlни межлисдал вири мусурманриз ва иллаки зулумдик квай Палестинадин агьалийриз хийир-дуьаяр авуна.
Эхирдайни Ашарин имам Къурбанов Къурбана мярекатдал атанвайбуруз вичин патай чухсагъул лагьана.
Къуй Аллагьди ﷻ и мярекат кьабулрай ва адан берекат вири Дагъустандиз раиж авурай! Амин.
