Цlийи Усурдал мавлид-межлис

Цlийи Усурдал мавлид-межлис

9-октябрдиз Ахцегь райондин Цlийи Усуррин хуьруьн спортзалда Рабиуль-Аввал варз алукьуниз талукьарнавай мавлид-межлис кьиле фена.

Мярекат Къуръан хуралай чизвай гьафиз, Дагъустандин Огни шегьерда авай Мугьаммад Ярагъидин тlварцlихъ галай медресада тарсар гузвай муаллим Ибрагьим Зубайжиди Къуръандин аятралди ачухна. Ам Ахцегь районда Дагъустандин Муфтиятдин диндиз эвер гунин хилен регьбер Ашуралиев Гьуснудина кьиле тухвана.

Межлисдал Дербент райондин Хазар хуьруьн имам Рамазанов Къурбан, гьафиз Ибрагьим Зубайжи, лезги «Ас-Салам» газетдин редактор Амаханов Гьасан, Стlал-Сулейманан районда Дагъустандин Муфтиятдин диндиз эвер гунин хилен регьбер Рагьманов Шамил, хуьруьн имам Мусаев Шихмегьамед ва депутат Насиров Расим рахана. Абуру Мугьаммад Пайгъамбардин ﷺ уьмуьрдин рекьикай, диндин ферзер кьилиз акъудунин чарасузвиликай, аялар чирвилер къачуз медресайриз ракъуруникай авай хийирдикай, Мугьаммад Пайгъамбардин ﷻ Суннадиз табий хьуникай ва акьалтзавай несилдиз диндин тербия гунин важиблувикай насигьатар авуна.

Гьакlни мярекатдал атанвайбурун арада диндин чирвилерин рекьяй акъажунар кьиле фена. Ашуралиев Гьуснудина кlватl хьанвайбуруз жуьреба-жуьре суалар гана ва дуьз жавабар гайибуруз багьа савкьватар пайна.

Насигьатрин арайра мавлидар кlелна ва эхирдайни вирида санал дуьньядин мусурманриз хийир-дуьа авуна.