Вири аялар патал
Вири аялар патал
Са юкъуз жуван дерди аваз зун хуьруьн администрациядин идарадиз физвай. Анин гьаятда авай гъвечlи футболдин майдандал аялар-гадаяр кlватl хьана, хвешивилин гьарай-эвер алаз, футбол къугъвазвай. Абурун арада Къурушрин имам Азим гьажи Панагьов, мискlиндин телевиденидин регьбер Башир Аливердиев, мискlинда аялриз тарсар гузвай муаллим Мугьаммад Нугъаев ва масабур авай.
Зун абурун патав фена ва им вуч мярекат я лагьана хабар кьурла, заз Азим гьажиди: «Бес, къе ина мискlинда гатун тlатlилрин вахтунда тарсар къачузвай гадайрин арада футболдай акъажунар тухузва», - лагьана. И кlвалахдин сирер чирун патал зун Азим гьажидихъ галаз мискlинда авай медресадиз хтана ва за адавай ина кlелзавай аялрин патахъай са гъвечlи суьгьбет авун тlалабна.
- Дагъустандин Муфтиятдин тапшуругъдалди, гатун пуд вацра аялар чеб-чпин ихтиярда тахьун патал, чlуру рекьера гьат тавурай лагьана, абуру дуьз тербия къачудайвал, диндин сирерай кьил акъуддайвал Дагъустандин мискlинра, гьа жергедай яз чи хуьруьн мискlиндани гьар йисуз тарсар гузва.
- Диндин тарсариз къвезвай аялрин кьадар гьикьван я?
- Вири аялрин кьадар кьве вишелай артух я: 104 гада ва 106 руш. Абуруз араб чlалал кlелиз, капl ийиз чир хьанва. Гьакlни абуру Мугьаммад Пайгъамбардин ﷺ уьмуьрдин рекьикай чирвилер къачуна.
- Тарсар гьафтеда шумуд юкъуз кьиле физва?
- Тарсар вад юкъуз гузва, киш ва гьяд йикъара чун спортдал машгъул жезва, вацра кьве сеферда вири аялар галаз сейрдиз (экскурсия) физва, ана чна аялриз недай ва хъвадай затlар гузва, нетижада абур рази яз кlвалериз хквезва. Амай йикъарани аялриз недай жуьреба-жуьре затlар гузва.
- Азим стха, квез и шейэр маса къачудай харжияр гьинай къвезва?
- Диндихъ рикl кузвай вири стхайрини вахари, иллаки мискlиндиз къвезвай жемятди гуьгьуьллудаказ аялриз гун патал садакьаяр пайзава. Кьилди чухсагъул лугьуз кlанзава чаз вири патарихъай пулдин куьмекар гузвай карчи Къулиев Аликъурейшаз. Чпелай виридалай Аллагь ﷻ рази хьурай!
- Азим гьажи, куьне тешкилнавай лагерда тарсар ни гузва?
- Рушаризни гадайриз тарсар гудай кьилди-кьилди классар ава. Гадайриз Нугъаев Мугьаммада, гьафиз Хидиров Расула ва рушаризни Хидирова Жасминади, Хидирова Фатlимади гузва. Абур Ислам диндин чирвилер ва хъсан тежриба авай, диндиз къуллугъзавай муаллимар я.
- Дугъриданни, и алай, телефонрини Интернетди акьалтзавай несил чlуру рекьериз желбзавай вахтунда, Къурушрин хуьруьн имамди тербиядиз куьмек гузвай еке кlвалах тешкилнава. Гьа ихьтин тербия гуз ам ругуд йис я.
Гьуьрметлу Азим гьажи, куьне тухузвай кlвалах зурбади я, къуй квелай сад Аллагь ﷻ рази хьурай, чна квехъ мадни еке агалкьунар хьун гуьзлемишзава.
Гьажи Къазиев, муаллим
