Санкт-Петербургда лезгийрин ифтlар
Санкт-Петербургда лезгийрин ифтlар
И мукьвара чи гьукуматдин къуза патан меркезда лезги халкьдин ифтlар-межлис кьиле фена. Мярекат «Звезда» ресторанда тешкилнавай. Ифтlардиз неинки Санкт-Петербургда яшамиш жезвай, гьакl адан къунши шегьерра авай лезги стхаярни вахар атанвай.
Гьакlни мярекатда иштирак авун патал иниз Дагъустандай лезги чlалал акъатзвай «Ас-Салам» газетдин редактор Гьасан Амаханов, Дагъустандин Огни шегьердин жуьмя мискlиндин имам Нурудин Гьуьсейнов, мавлидар-нашидар кlелзавай Заур Салигьов атанвай.
Къуръандин аятралди ва гуьзел нашидралди ачухай межлисдал сифте гаф Гьасан Амахановаз гана. Ада кlватl хьанвайбуруз алукьнавай Рамазан варз мубаракна ва виридаз хийир-дуьаяр авуна. Ахпа Амаханов Гьасана Рамазан вацран фазилатлувиликай вяз гана.
Гуьгъуьнлай Нурудин Гьуьсейнов рахана. Ада Аллагьдиз ﷻ шукур гъуникай ва Ислам диндиз табий хьунин важиблувиликай ахъайна.
Лезги ифтlардал чеб Дагъустандай тир, амма Санкт-Петербургда Исламдин кlвалах кьиле тухузвай Казим Темирбулатов ва Рамазан Исаев мугьман хьанвай. Абуру рикlин сидкьидай ибадат авунин лайихлувиликай ва мусурманрин везифайрикай вязер гана.
Гьакlни инал лезги журналист Низамидин Каинбеков рахана. Ада кlватl хьанвайбуруз пак Рамазан варз мубаракна ва хийир-дуьаяр авуна.
Эхирдайни ифтlар тешкил авур Бабаев Малик рахана. Ада мярекатдал атайбуруз виридаз чухсагъул лагьана ва виридаз Аллагьдивай ﷻ хушбахтвал тlалабна.
Къейд: вичин ери-бине Дагъустандин Хив райондин Хъукьварин хуьряй тир Бабаев Малика алай вахтунда Санкт-Петербургдин муфтийдин куьмекчивиле кlвалахзава. Гьакlни ада Дагъустандин Муфтиятдихъ галаз сих алакъа хуьзва. Бабаев Малика Санкт-Петербургда лезгийрин ифтlарар ва мавлидар тешкилиз ингье са шумуд йис я.
Малум тирвал, эхиримжи йисара Рамазан вацра дуствилин ва садвилин ифтlарар авун мусурманар яшамиш жезвай вири чкайра хъсан адет хьанва. Гьакl алай йисуз ифтlаррин ва анра иштиракзавай инсанрин кьадар генани артух хьанва. Абурукай виридакай кхьин патал и газетдин чинар бес жедач. Чна лагьайтlа, виридаз хийир-дуьа ийида. Къуй Аллагьди ﷻ вири хъсан межлисар кьабулрай ва абур себеб яз Халикьди ﷻ чаз дуьньядани эхиратда вири хъсанвилер гурай!
