Мугьаммад Пайгъамбар ﷺ хайи варз мубаракрай!
Мугьаммад Пайгъамбар ﷺ хайи варз мубаракрай!
Ассаламу алайкум ва рагьматуллагьи ва баракатугьу!
Играми стхаяр ва вахар! За квез рикIин сидкьидай Раббидин ﷻ вири махлукьатрикай виридалайни тамам, Аллагьдин ﷻ эхиримжи Пайгъамбар – Мугьаммад ﷺ дуьньядиз акур берекатлу варз алукьун мубаракзава.
И пак Раби уль-Авваль вацра чун Аллагьдин Расул ﷺ гзаф рикIел хкиз чалишмиш жезва ва и кар патал адалай тарифар ийизвай межлисар (мавлидар) тешкилзава, адан уьмуьрдин рехъ чирзава.
Иллаки шад жезва акваз, гьикI дагъустанвийри йисалай-суз Аллагьдин Расулдин ﷺ уьмуьрдин рехъ чируналди ва межлисра иштирак авуналди адахъ авай чпин кIанивал къалурзаватIа. Адан уьмуьр чир хьуни адан чIехивилин гъавурда акьаз ва адалай чешне къачуз алахъуниз куьмек гузва.
Раббидин Расул ﷺ кIан хьун – Аллагьдихъай кичIевал къалурунин виридалайни чIехи лишанрикай сад я ва Аллагь Таала кIан хьунин бине я. За Аллагь Тааладивай тIалабзава чи рикIер Мугьаммад Пайгъамбардихъ ﷺ кIанивиляй ацIурдайвал ва чун Адан диндар лукIарин жергеда жедайвал.
Къуръанда лагьанва (баяндин мана): «Аллагьдин Расулда ﷺ куьн патал лап хъсан чешне ава, Аллагьдик ﷻ ва Дувандин йикъак умуд кутазвайбур патал ва Аллагь ﷻ гзаф (мукьвал-мукьвал) рикIел гъизвайбур патал» («Аль-Агьзаб» сурадин 21-аят).
КIани Пайгъамбардилай ﷺ чешне къачудайла, чаз гьар жуьредин имтигьанра сабурлу ва дурумлу жез чир жезва. Адан уьмуьрдин рехъ чируни чаз хъсанвилин ва регьимдин рекьяй физ, чун фитнейрикай ва гужалди писвал авуникай хуьз куьмек гузва. Чна алемрин Халикьдивай ﷻ Мугьаммад Пайгъамбардин ﷺ чIехивиляй чи Ватан, Россия ва дуьньяда авай вири инсанар бедбахтвилерикай ва дявейрикай хуьн тIалабзава.
Къуй Аллагь Таалади чаз виридаз къуват ва берекат гурай, рикIер Адан Пайгъамбардихъ ﷺ кIанивиляй ацIуррай ва вири крара адан рекьяй физ куьмек гурай! Амин.
