Къурушдал Мугьаммад Хидиров рикlел хкана
Къурушдал Мугьаммад Хидиров рикlел хкана
10-июлдин экуьнин кьиляй Европада виридалайни кьакьан Къурушрин хуьруьз гзаф кьадар инсанар мугьман хьана. Абур Мугьаммад гьажидин тlвар рикlел хкун патал тешкилнавай межлисдал атанвай.
Аллагьдин ﷻ рекье чан ганвай шагьид Мугьаммад Хидиров кlанибур, адаз хийир-дуьаяр ийизвайбур Дагъустанда гзаф ава. Гьикl хьи ам виридаз хъсанвал ийиз алахъай кас тир, гьавиляй инсанарни адаз гила чпивай жедай менфят гуз чалишмиш жезва.
Диндин мярекат ширин сесиналди Къуръандин аятар кlелуналди гьафиз (Къуръан хуралай чидайди) Хидиров Расула – шагьид хьайи Мугьаммадан хци ачухна.
Инал сад лагьай гаф Дербент райондин Белиж хуьруьн имам Гьабибов Ризваназ гана. Ада вагьабизмдин хаталувиликай ва ягъалмишвиликай насигьат авуна. Гуьгъуьнлай лезги «Ас-Салам» газетдин кьилин редактор Гьасан Амаханов рахана. Ада вичихъ галаз санал кlвалахай Мугьаммад Хидирован хъсан къилихдикай ахъайна. Гьакlни ада инал шагьиддихъ галаз алакъалу тир бязи кьисаяр гъана. «Кьиблепатан Дагъустанда са хуьре имамдин везифаяр тамамарзавай чlавуз рагьметлу Мугьаммад гьажидиз мавлиддал эверна. Мавлиддин бейтер кlелайдалай кьулухъ кlвалин иесиди мугьманриз вичин рикlик квай диндин са суал гана. Адет тирвал ихьтин арада диндин чирвилер авай касди жаваб гун лазим я хьи, амма алим Мугьаммад Хидирова адаз гьи къайда арифдарвилелди жаваб гуда лагьана фикирзавай арада, адахъ галай илим авачир са мусурман стхади жаваб гуз гатlумна. Мугьаммад гьажидини адаз чуькьни авунач. Гьа икl, межлис акьалтlар хьана ва мавлид кlелиз атанвайбур вири санал улакьда ацукьна хъфидай чlавуз, атlа суалдиз жаваб гайи касди Мугьаммад гьажидивай хабар кьада: «Имам, жаваб гудай чlавуз зун гъалатl хьанани?» Имамдини адаз куьруь, амма акьалтlай жаваб гана: «Чан стха, вун гьанал рахун гъалатl хьана». И гафаралди шагьидди адаз менфятлу тарс гана. Гьикl хьи жавабар гуз гьатта алимри тади авун лазим туш, илим авачир инсанрикай гьич рахун виже къведач», - къейдна Гьасан гьажиди.
Адалай кьулухъ Докъузпара райондин имам Шамилов Узаираз гаф гана. Ада акьалтзавай несил дуьз рекье тунин ва аялар медресайриз кlелиз ракъурунин важиблувиликай насигьат авуна.
Гьакlни инал Кьиблепатан Дагъустанда РД-дин Муфтиятдин векил Гьажиев Гьусейн рахана. Ада Аллагьдин ﷻ рекье чан гайи шагьидрин зурба дережадикай насигьат авуна. «Аллагь Таалади Къуръанда лагьанва (мана): «Аллагьдин ﷻ рекье (Ислам дин раиж авун патал) чан ганвайбур куьне телеф хьайибурай гьисабмир, абурал чан алама ва абуру чпин ризкьи Раббидивай къачузва»» - къейдна Гьусейн гьажиди.
Эхирдайни Хасавюрт райондин Цlийи Къурушрин имам Панагьов Азима кlватl хьанвайбуруз ва вири мусурманриз хийир-дуьаяр авуна, дуьньядилай фенвай мусурманрин, иллаки Хидиров Мугьаммадан руьгьдиз Аллагьдин ﷻ регьим тlалабна.
Мярекат Стlал-Сулейманан райондин имам Омаров Шамила кьиле тухвана. Насигьатрин арайра Хидиров Расула нашидар-мавлидар кlелна. Гьакlни межлисдал кlватl хьанвайбуруз диндин суалар гана ва дуьз жавабар гайибуруз пишкешар пайна.
Къуй Аллагьди ﷻ и межлис кьабулрай, Мугьаммад Хидирован дережа генани хкажрай ва чи халкьдихъ ам хьтин кьегьал рухваяр артух хьурай!
Мугьаммад Хидиров Хидиран хва 1981-йисуз Хасавюрт райондин Къурушрин хуьре дидедиз хьана. 1998-йисуз ада хуьруьн 1-нумрадин юкьван чирвилер гудай мектеб акьалтIарна.
Гьеле мектебда амаз Ислам диндал фикир желбай жегьил, ам акьалтIарнамазди Къизилюрт райондин Комсомольск хуьре медресадик экечIна. 2000-йисалай ада вичин кIелунар Махачкъалада кардик квай СКИУ-да (Кеферпатан Къавкъаздин Исламдин университет, алай вахтунда аникай ДИУ – Дагъустандин Исламдин университет хьанва) давамар хъувуна.
2005-йисуз институт агалкьунралди акьалтIарай Мугьаммад гьажи Дагъустандин мусурманрин Диндин идаради (ДУМД) Дербентдин жуьмя-мискIиндин имамдин куьмекчивиле кIвалахал рекье туна. Гьа йисуз ам заочный къайдада Махачкъалада кардик квай ИТиМО-дикни (Теологидин ва международный алакъайрин институт) кlелиз экечIна ва 2009-йисуз ам акьалтIарна. Дербентда имамвилин пешедин тежриба къачурдалай кьулухъ, Мугьаммад гьажиди Сулейман-Стальский райондин Герейханован хуьруьн 1-отделенида кьве йисуз гьакъисагъвилелди имамвиле кIвалахна. Гуьгъуьнлай ам гьа чIавуз ЦIийи Къурушрин хуьруьн имамдин везифаяр тамамарзавайди тир Пирсагьат Умаханован теклифдалди ЦIийи Къурушдал диндин рекье кIвалахун патал хтана.
2012-йисалай Мугьаммад гьажи Хасавюрт райондин имамри Советдин председателдин куьмекчи яз тайинарна. Гьа йисуз ЦIийи Къурушрин хуьруьн имам Пирсагьат Умаханов вичин хушуналди къуллугъдивай къерех хьана, адан чкадал имамвиле хуьруьн жемятди Мугьаммад гьажи Хидиров хкяна.
Мугьаммад-гьажиди сифте яз гьаж 2003-йисуз кьилиз акъудна, гуьгъуьнлай адаз дестейрин регьбер яз мад вад са шумуд сеферда гьаждал фин кьисмет хьана.
2015-йисан 9-сентябрдиз вичин 12 йис хьанвай хва Рамазанни галаз санал экуьнин кпlунал мискlиндиз фидай рекье къанлуйри Мугьаммад гьажидин чандиз къаст авуна. Ам хайи Цlийи Къурушрин сурара кучудна. Аллагьди ﷻ Вичи адаз регьим авурай!
Аллагьдин ﷻ рекье чан гайи шагьид Мугьаммад гьажидихъ уьмуьрдин юлдаш ва кьуд велед авай. Алай вахтунда адан хендеда Хидирова Жасминади Мугьаммад Хидирован тlварцlихъ галай Цlийи Къурушрин мискlинда рушариз диндин тарсар гузва ва веледрини бубадин рехъ, – Аллагьдиз ﷻ къуллугъ авун ва жуван халкьдиз хийир гун, – давамарзава.
