Цlийи Къурушрин имам Луганскда
Цlийи Къурушрин имам Луганскда
Алай вахтунда Россиядин цlийи регионра, иллаки Луганскдани Донецкда кьиле физвай военный махсус серенжемра агъзурралди дагъустанвийри, абурун жергедай яз саки вад вишев агакьна Хасавюрт райондин Цlийи Къуруш хуьруьн кьегьалрини тафаватлудаказ иштиракзава. Абуру чпин жуьрэтлувални викlегьвал къалурзава.
Гьелбетда, анра яшамиш жезвай агьалийриз секинвални динжвал ахварайни аквазвач. Ихьтин гьалди аваз абур гзаф йисар я. Донбассдин агьалияр гзаф дарвиле, шартlарин къулайсузвиле авайвиляй, аниз вири Урусатдин ва гьакl кьилди Дагъустандин гьар са пипlяй мергьяматлувилин куьмекар ракъурзава.
Гьа икl, и мукьвара Дагъустандин Муфтиятдин къарардалди Хасавюрт райондай Къурушрин имам Панагьов Азим, Сулевкентдин имам Маликов Жамалудин ва «Къуруш-ТВ»-дин оператор Аливердиев Бешир Луганск шегьердиз фена.
Имам Азим гьажиди, хтайла, заз Луганскда кьиле тухвай кIвалахрикай суьгьбетна.
— Чи везифа Луганскдин агьалийриз руьгьдин, ахлакьдин, яшайишдин, марифатдин рекьерай куьмекар гун тир. И кардин патахъай Дагъустандинни Луганскдин муфтиятрин арада икьрар кутIуннава. Гьавиляй аниз гьар вацра Дагъустандин шегьеррайни хуьрерай имамар рекье твазва. Чун ЛНР-дин Муфтий Гамбаров Мугьаммад-Исмаил гьажиди шаддаказ кьабулна. Чун Брянка лугьудай шегьердиз фена, кьиле мискIиндин имам Фаниль-Гьазрет аваз, ана жемятдихъ галаз еке межлис тухвана. Чна агьалийриз «Ассалам» газетар пайна. ДНР-дин муфтиятдин кьил Мугьаммад-Исмаил гьажиди Дагъустандин Муфтий Агьмад эфенди Абдулаеваз сагърай лагьана. Ровеньки шегьерда чна, кьиле Мугьаммад-Исмаил гьажи аваз, Ватандин ЧIехи дяведа телеф хьайибур рикIел хкунин лишан яз, еке мавлид гана, Къуръандай сураяр кIелна, гуьмбетрал цуьквер эцигна.
Гьа ихьтин мярекатар мад Брянскда, Стахановда, Антрацитда, Арчеевскда, Луганскда, Красный Лучда тешкилна. Гьиниз чун фенатIани, виринра чун сивел шадвилин хъвер ва вилерал накъвар алаз къаршиламишна. Гьа икI, чун вири общинайрин имамрихъ галаз гуьруьшмиш хьана, виринра чна инай тухванвай чарасуз тир недай суьрсет (гъуьр, дуьгуь, чIахар, шекер, макаронар, ягълуяр ва маса шейэр) пайна.
Чун дагъустанвийрикай ибарат «Каспий»батальондизни фена, ана чун лап шаддаказ къаршиламишна. Абурузни савкьватар пайна. Чал ана къуллугъзавай чи хуьруьнви Бахишев Ризванни гьалтна.
Эхиримжи юкъуз Алчеевск шегьердин патав гвай яд кIватIдай гьамбарханадал чун фейи вири шегьеррин ва хуьрерин имамар галаз еке мавлид авуна. Сулевкент хуьруьн имам Маликов Жамалудин гьажиди Къуръандай сураяр, чи баркаллу рухваяр сагъ-саламатдиз чпин хизанрин патав хтурай лагьана, дуьаяр кIелна. Луганскдин Муфтиятди инай фенвай виридаз чухсагъулдин чарар ва савкьватар гана. Чпелай виридалай Аллагь ﷻ рази хьурай.
Заз мярекатар видеокамерадиз къачур «Къуруш-ТВ»-дин оператор Аливердиев Бешираз чухсагъул лугьуз кIанзава.
Гьуьрметлу Азим гьажи, ихьтин мергьяматлу кlвалах тешкилай, ваз Аллагь ﷻ куьмек хьурай!
